看山是山看水是水

 昨天買入下跌的939,今天又有近3%的帳面收益,來緊快除淨的有中石化,工行,中行.前2隻今早更創年內新高,呢個幾月買左超過十隻在除淨前下跌高息股,全部都係短炒,隻隻執幾個巴仙就閃,投入資金不過是十萬元,貨如輪轉,一隻接一隻,一個月就執左4萬蚊,若隻隻是長揸,升幅更可觀,不過隻隻都長揸,就要動用多十倍資金,而且已有4大天王重倉長期持有天天數錢,犯不著再長揸更多股份,十萬蚊本金,去銀行做定期要擺多少年才有4萬蚊息？若短炒繼續有可觀盈利,會增加短炒的銀碼,但不忘初心,長期持有優質股份收高息,透過世界第八奇績複利效應儲多更多股份,才是王道,才可在股市活得比人長.

 今早華潤電力836,中國電力2380再創年内新高,潤電新能源裝機較早,加上管理完善,現在一半新能源,一半火電,兩邊都賺盡,新能源裝機持續進行中,更多新能源電廠完成並進入電網,盈利將進一步増加.中國電力新能源發電起步較慢,但年前已决定全心發展新能源,特別是水力發電,2至3年完工後,會有一番新景像,加上母公司不斷回購支持股價,市場資金也因前景好而炒上先,另一間916龍源電力,最早發展新能源發電,但需大量項目發展,管理又不如潤電,盈利又麻麻,股價由20蚊跌到4個幾,今年股價才大幅反彈,一度衝上8蚊後輕微回落,近來母公司國家能源集團不停注入風電項目,増加916實力,呢幾年是916的任務期,就像多年前的中移動,投入大量資源投資5G,致股價大幅滑落,任務完成就進入收成期.國家投入萬億計資金落電力央企,一定不會令其蝕本,本利歸還一定會出現,幾年後916一定會大幅盈利,資金也是趁低買入916等收成,至於1816中廣核就更簡單,股價狂升只因獨沽一味,核電發電,技術已是世界級,若國家電仍不足,只會起更多核電廠.今年三中全會一定會出台電改革的政策,應該都是傾斜於可再生能源發電方面.

 600941中移動A股今日收110.21元人仔,是不計這2年半的派息,2022年1月5日回A上市,上市價57.58元人仔,有多達5%散戶抽中而棄購,而941當時股價約49元,由於有保薦人回購保護機制,出來護盤才能力保招股價,而棄購的5%股份由保薦人接哂,無端端發達.2022年年初中移動無論是内地或香港都是不受散戶歡迎的.如今中移動入左上證指數才數天,已急不及待拉升12蚊,要升上120蚊人仔,只需GJD有需要及出多些少力就可達成,GJD的漢語拼音縮寫其中一個意思是國家隊.内地有個有d錢的散戶曹總,在中移動回A後就極度看好600941,一注獨買中移動,並改名為鎖倉移動的曹哥,揚言長期持有中移動,每次收息就會再複投下去,並邀請志同道合的同路人,即長期持有中移動以年計但不一定需要複投,相約每五年相聚一次,看看財富増加左多少,我不知有多少内地散戶陪佢癲,如今三年不到,股價已翻倍,收左息再複投,所持股數更多,他現在最大願望是600941不要升太多,以免幾個月後收埋中移動中期息後,不能買更多的中移動.常說錢多人傻,邊有人唔想自已持有的股票大升,可能真正傻的是凡人,格局,高度都唔夠,反而常人認為是傻子的才真正智者.

 2個星期前曾估883和836誰先升上25蚊,早些時曾估836和883誰先升上20蚊,自已估836,今次又係估836會先上25蚊,此2股太勵害,升到你唔信,836夠低調,冇物人留意,好多財演甚至連836是做甚麼生意都唔知,更唔識判斷盈利會是多少,唔識就自然少提.講番題,下一站,836和883邊一隻會先上28蚊,我都係估836會先到達.

奢侈品消費稅是國内唯一未實施的地方和中央政府共收的稅種.08年曾以奢侈品種類不夠多為由而告吹,國家審計處受國務院委託作出的調研,相信會以名貴手錶,珠寶首飾作試點,跟着就會是私人飛機,遊艇,馬術活動,高級私人會所服務等等,中國富人為數不少,預估可帶來萬億的稅收,富人不會因有消費稅而不消費,相反中產或偽中產就會減少高端消費,以這群中產為目標而起的高端商場,可能會生意不似如期,而恒隆,太古,新地這批香港地產發展商近年大力拓展内地高級商場,可能會為自已挖左個深坑,自已會唔會跌落去就不得而知,只能祝他們好運.

 中海油A股最高升到34.98,中午收34.97人仔,市盈率都只是12倍,883就更單位數PE,冇中特估在手的内地散戶天天大罵中特估是抱團式上升,好快就爆煲,但又唔諗吓自已揸住個堆過去式的抱團股,動不動就升到過百倍,股價腰斬再腰斬後,市盈率還是幾十倍,高過哂所有中特估,盈利又冇穩定性,又冇壟斷性,更冇成長性可言,派息又低,最重要一點是冇國家隊資金背書,估值回歸合理水平而導致股價大跌,更冇人會出手相救,又你要等到股價再大幅回落變做高息股才有人會買,中特估有排都未收復回合理估值,短期根本冇甚麼爆煲可能.