看山是山看水是水

 一場鬧劇,2個大人圍住一個細路來揼,呢個細路忍唔住還拖,不理後果,做住民族英雄先算.冷靜過後,司機馬上在X連番出帖表示十分尊重美國,尊重偉大的美國總統,明顯想補鑊.之前在會上被萬斯批評冇感恩之心,一句多謝說話都冇,美國係幫緊你幫緊你,知唔知物野係thankful,侵侵更對司機發爛渣,你根本無牌可打,根本打唔贏俄羅斯,拿唔番失去的土地,一味想打仗,就算引發第三次世界大戰也在所不惜,根本就未準備好和平談判,重想拖美國落水幫手驅趕俄羅斯,咪駛旨意.跟住話真相已在直播中顯現出來,美國是想用和談解決俄烏戰爭.做唔成deal, 就請對手out,趕司機離場.侵侵事後在專用社交平台上話,待司機準備好和平談判,先好過來傾.最好笑是俄羅斯梅德韋傑夫講,侵侵同萬斯冇當衆打實司機是本世紀最大奇蹟.歐盟諸國事後當然嘴裏話會撑烏克蘭,冇左美國呢條水喉射住,有錢同武器撑嗎？誰大誰惡誰正確,公平正義完全不堪一擊,以侵侵甘記仇的性格,司機好快就會消失.

 承諾在25至27年,派息比率不低於45%,視乎每年的盈利情况會適時増加,另外一句我中文唔好,唔識解,25至27年在下限派息下増加5%,是如25年派利潤45%,26年就會派50%,或是到27年才會加到50%,又或者是上一次3年規劃,保底派息率是40%,今次三年規劃一律保底45%,只怪我過去受港英奴化教育塗毒,太過著重英文,才會看篇通告都唔明.點都好,未來保底45%,收幾多息已心中有數,低位買左重持有的朋友可放心長揸收息.還有重要一點,未來會在股價下跌時作常態化回購,保障小股東利益,而不是如過去般一年回購少少就停上,最好做到如中遠海控般不斷回購.應該是國資委的市值管理要求起作用了,管理層想仕途更上層樓,就要做靚股價,回購同加分紅就是最有效率方法. 中海油總發行股數約475億股,2024年頭三季盈利1066億,第三季盈利369.28億,第四季斷估都有3百億以上,油價都跌唔夠10%,唔計増產同採油成本下跌等因素,保守計全年至少賺1400億,拿45%出來派息,共派630億人仔,除番475億股,每股派息1.2港紙以上,10蚊買的朋友,扣埋股息稅,都有10厘以上收益,若之後3年每年賺多過1400億,就重肥.退一萬步,就算油價大跌,883一年盈利大幅減少得番1千億,都會攞450億出來派息,你都重係收緊近10厘息.冇貨者現價買會不會太貴,我就持中性態度,10至12蚊嗰段美好價位任人買的時光應難再見番,若可接受6至7厘為高息股,買左就算唔升甚至下跌,我相信跌極有限,坐吓貨都死唔到人,油價升跌不是某人說了算,大行報告更不可靠,看升同看跌幾乎同一時間出報告,總有一份是對的.最安心是揸左3年或以上,7至10蚊買左883的朋友,三年間收左4.6元股息,再收埋未來3年股息,收股息已收回持貨成本,跟住手中的883就會成世幫你搵錢,名符其實的睡後收入.

港股今天頭二十大成交中,由頭到尾只得一隻中移動上升,大市狂升時佢都有跟升,只是升得少而已,但都係升,潮退時,好多股份會打回原型甚至下跌,唯獨941般高息央企股可倖免,股價仍在高位,内銀股也是一樣,升得多,跌得少,累積的升幅不會被偷去,收左的股息就袋袋平安.納指7雄好快變7熊,Tsla因馬斯克得罪人多,自侵侵皇上登基後,股價日日被人隊,已跌左3成,但馬斯克根本不在意,之前高位不斷減持套現,落左袋的錢才是真錢,甚麼世界首富只是紙上數字,權力是他目前最大的追求,同侵侵一樣,有左權力就可亂甘來,行自已信奉的一套,對於之前反佢害佢的既得利益者,大肆報復務求斬草除根,趕盡殺絕.又不斷向老百姓劃大餅,整個金卡計劃出來,付出5百萬美金就可拿居留權,有一千萬人申請,美國就即時冇哂所有負債,所以就要驅趕所有窮L非法移民離開,吹到有甘大得甘大,效果得唔得之後再算,更離譜是放風要修改總統只能做2任的規定,又要在總統山原有4個貢獻巨大的總統石像上加埋自已個頭像上去.有這樣的美國總統其實是好事,以商業利益來run個國家,冇著數的事唔做,為左利益盟友可以出賣,強大敵人都可做老友,一同搵全世界著數,加關稅對中國影響不大,因加關稅是全球性的,歐盟,加拿大等會更大鑊.隻sqqq最近是跌市奇芭,造空納指100指數,幾天已升左2成幾,過往d人相信納指只升不跌,唔敢買sqqq,怕只跌一天就會被挾番上去,反而會趁跌買Tqqq,或tsla和nvda,以為只會買貴,不會買錯,跌就是大特價俾你買.

 平保又不問價喪買1288農行,均價4.62買左3千7百幾萬股,20號嗰次都係以均價4.5幾買入,計埋24號呢次,持有H股1288已達到6.02%,呢幾日唔知又入左邊隻内銀,揸住幾千億内銀同埋匯豐,一年收息都收幾百億,若早幾年甘做,而家股價肯定過百蚊.

 幾日前出台的中央一號文件,除左講農業政策,如何令農民搵多些錢外,也有講要扶助養牛業,令養牛戶擺脫困境.第一時間就諗2319蒙牛一定會受惠,一定會升,結果的確是升,只是升得慢,升得唔夠癲,慢慢升上20蚊也是大概率的事,升左都冇快感,唔夠過癮,反而忽略同錯過一批牧業股,如1117現代牧業,9858優然牧業,1431原生態牧業.特別是個隻1431,是中國飛鶴的子公司,飛鶴乳業的老板就是民企大會聽習主席訓話,坐在第一排中間位的其中一位,就知他的份量.1431上星期出完盈喜後,股價就急升,今天又大升20%,5天累升50%以上,又走失一隻金鵝,不過話說回頭,畢竟是民企,買入的决心一定唔夠國企大,蒙牛話哂都係國企,又是牛奶龍頭,内需標的,買左完全冇野驚.

 漢口銀行發行新股増資十億,已被當地幾間國企認頭.昨天外媒傳幾所大型内銀會增資4千億,全由中央出或是由錢多的央企認頭,就不好說.由有大量現金的富貴央企持有内銀,絕對是雙贏局面,内銀會因此變得更強大,資本比例更充足,而央企則是耐心資本,長錢長投,只會長擺,不會作短期炒賣,持有時間越長,只會迫佢哋發達.如最多錢的中移動.已揸住上海浦發銀行20年,收息都收回成本,現在每年躺着收股息,前年又獨自接哂郵儲行的新増發股份,已經成手銀行股,每年有穩定的股息收益,

 平安已買到8%農行H股,郵儲行同招行H股都買到7%,唔知買夠未.據統計,平保持倉的H股内銀市值2仟億元.去年12月中至今動用左170億元買入唔同的H股内銀.

 今天電訊三傻逆市下跌,晚間央視新聞就出現李強巡視三大電訊商的科技產業,讚揚和鼓勵中電信的天翼雲,中聯通的5G工業互聯網,中移動的超前6G研發.今天是否有神秘力量在大升市中趁低吸納三傻股份,跟住才出震撼的利好消息.

 2722出了個自願性公告,說均渝投資公司,一間由重慶國資委100%持有的公司,將會以現金和非現金形式,向重慶機電増資50億元,完成後,均渝持股量會升至44.58%,與此同時,重慶國資委會將手中的35.4%重慶機電股份無償給予均渝,均渝也因此成為重慶機電最大股東,持股80%,重慶機電實控股東仍是重慶國資委,以今天2722收市價1.47計,H股加内資股市值已超過50億人仔,加埋増資的50億内資股,已變成一間市值過百億的國企,想令2722造大造強之心顯然而見,相信重組壯大行動未完,今天證監會主席吳清去左重慶見市長,表示會全力支持重慶市國企的重組,在金融政策和資本市場上加以配合,要令重慶成為全新的現代化城市.順便一提,重慶鋼鐵1053,均渝都是其中一個小股東,會不會又做埋佢大股東,我不是春江鴨,不是神,真的不知道.

 下午財爺的答問大會,内地的傳媒多過本地,都是具影響力如中央台,人民日報,中國經濟日報,第一財經等等,問的都是宏觀問題,而不是細眉細眼的長者搭幾多次2蚊車.畢竟現在股票市場過半成交額來自北水,收大量股票印花稅,已是香港的衣食父母.清楚知道香港的未來經濟走勢,北水老散會更加放心狂炒狂買港股.波叔確認已有100間内地大中細企業排緊隊來港上市,去年新股IPO,中金獨佔左近9成,隻中金今天在AH都狂升.

  注項已被接納 金額 獨贏及位置過關4X6 跑馬地星期三獨贏及位置過關4X6 第5場2安遇第6場2喜眼光第7場2赤馬雄風第8場5加州德至$4.16/24 (靈活玩)  $1 00.00  總投注金額:$1 00.00  近排股票贏得太多,馬仔可能會輸番D出去,隨便買番4隻熱門睇跑馬當娱樂.上次個人投注赢到自己都驚,十場開左九場熱門,雖然熱熱地,但六環彩又中,中左好多關孖寶,獨贏過關3串1,4串1,5串1都中.冇可能甘筍次次開熱門派錢.但只要控制注碼,長買熱門都會贏好多.呢個實盤買馬仔遊戲最新結餘正65蚊.

 中國東方集團,民企鋼鐵龍頭,半年盈利大跌8成,PB得0.2,今早大升5成.國企的馬鋼,鞍鋼,重慶鋼鐵一樣升到傻.隻1053今早竟升左20%,上一輪超高位在個3左右,又來癲過.啱啱波叔話會減收首季差餉,但上限得5舊水,聊勝於無.引人買樓,印花稅收1百蚊提升至樓價400萬,學馬斯克栽減公務員,未來以每年2%速度減少公務員,目標減一萬人,2蚊老人搭車,10蚊以上收2折,十蚊樓下上限240次照舊,高官議員大法官冇減薪,只係凍薪.

 平保昨天又披露増持農行H股1288已超過5%,已是不折不扣的内銀ETF,今早與同是恒指成份股的中人壽一齊升2%,另一隻新華保險連日大升,今早又升4%,話甘快就升穿28蚊.至於機器人股,掟飛標亂買都中,9660地平線機器人升唔停,全無蟹貨,優必選又是大漲小回格局,一跌買入就好快升突,鬼咩,宇樹科技成show肌肉,頻密地出新視頻顯示旗下機器人又學識邊種知識和技能,昨天出左條幾十秒視頻,功夫機器人,教識左機器人打功夫,轉身飛踢物都齊.貨真價實,都冇人敢話係假的,中國只識偷和抄,邊有甘叻等言論都無哂市場,冇人信.另外不得不講番隻2722,唔夠一個月升左1倍以上,過去幾天是狂升,也是我持有的股份中最快升一倍的一隻,十日唔夠就升一倍,讓子彈繼續飛,升夠2倍是下個目標.今早曾想買番隻一樣叫重慶的重慶鋼鐵1053,早一輪曾大升過,不過業績太差,業績差不是問題,馬鋼323一樣由8,9毫子升到痴線,還要虧損幾十億,照升可也,但因PB低,憧憬會重組拉高PB,隻重鋼今早無端成交升又升左4%,都係唔買住.已經有資金開始下注PB超低的國企股,越細隻越好,巨無霸如基建三傻就只會慢升,4大内銀雖已狂升,但PB重係低過1.國家俾央國企的任務是要増大PB,令股價上升是最快途徑,唔需要升到1,只要不是太低如0.2水平,升番0.5股價都番倍.此尋寶玩法只適用於央國企.其他如本地地產股,各類奇型怪狀的垃圾股,PB無論點低,都不會大升,一個唔好彩,加少少溢價私有化左佢,令持有者無仇報.

 季檢被加入恒生綜合指數的9885,相信下個月會成為新一批的港股通成員.衛龍今天逆市上升近4%.過去幾個月內由6蚊附近開始慢慢上升,今天破了52周新高,報9.05元.衛龍是國内零食龍頭,先是辣條最出名,跟住就各種零食如魔芋絲,專搵小朋友和年青人錢,連續幾年營收同盈利都大増,23年收入過百億,盈利近10億,大股東家族持股近8成,去年還加派特別息,派息比率達8成2,相信24年全年業績會非常好,半年盈利已大幅増加.只可惜股價長久只升不跌,冇機會在低位置貨,升到而家,變左低息股,3厘都冇.而家市盈率約18倍,在内需股來講,股價唔算貴,若盈利持續上升,股價唔升的話就會令市盈率降低.國内散戶似乎好渴望能在港股通買到衛龍,不知是真是假,有老散留說他的女兒發現衛龍辣條的包裝袋上寫上是香港上市公司,叫他可否把替她保管的利是錢拿去買衛龍股票,賺左錢可以買更多辣條來食.另一個散戶說她女兒問他為何買甘少衛龍股票,他回答只要賺到錢,已夠她免費食2年零食,她女兒說他冇大志,應買多些,賺夠5萬元才夠皮.

 剛入左國指和港股通的半新股地平線機器人9660,由於上市不久,股價又冇大跌,基本上冇蟹貨,想炒到幾高都得,做的是自動駕駛,冇司機就以非人型機器代替,另外集無人車雷達的速騰聚會2498一樣升升跌跌由30蚊升到50幾蚊,而微創機器人2550,更是在手術中的機器人,幫助醫生精準進行手術,此股也已短期累積升左倍幾.中國的機器人發展之快已超乎西方的想像.波士頓動力,非中國的機器人龍頭企業的創始人,對中國能創造DS大感意外,更不諱言已買左最新的宇樹人型機器人,和其他一大堆小型機器人回去研究,希望共同努力一起學習,令機器人未來的發展更好.

 A股寒武紀早前創歷史新高時收市價為777.77人仔.冇貨或唔敢買的散戶話此價乃魔咒,以後都見唔番,股價只會不斷下跌.之後股價確是下跌,一度跌落620幾,但好快就俾人買番上去,昨天已再破新高,今早又升多4%以上,中午收813蚊.港股的981中蕊又是強到冇朋友,先跌後倒升3%以上,另一強股小米也是相同走勢.另外個隻2722重慶機電今早又升14%,升到你唔信,有貨的散戶相信已走得七七八八,貨源已落在強者手中.從已知和已確認的資訊,重慶國資委在上個月已將另一重慶上市公司重慶輕紡控股的管理權交俾重慶機電營運,重慶輕紡市值大過重慶機電,擁有多間A股上市公司,可能業績達唔到國資委要求,於是把2722的高管調去輕紡並負責管理業務.市場推測最終目的是將幾間重慶國企結合在一起,交由重慶機電管理,令他成為一間可做大做強的央企集團.多人信或者春江鴨進場,股價自不然就會直線連升3日,升左6成幾.

 幾間國内互聯網大廠如阿里都話要増加資本支出,搞好雲業務,増加硬件設備,為爭奪市場,進行軍備競賽,起更多的數據中心是必然的,而電力就是大動脈,一旦冇左電力,等於冇左心跳,會死人的,因此所有數據中心都會配備柴油發動機,以防出現估唔到的短暫停電時可以補救,蕊片廠也是如此,經常停電的台灣,台積電也配置左大量柴油發動機來發電.而柴油發動機在國内有需求,有市場,25年和以後更會需求大増,識造的企業得幾間,其中一間是在A股上市的濰柴電機,不是濰柴動力,濰柴電機已不停上升,今天又10%,另一間是在美上市的玉柴國際Cyd,但市場龍頭,最強的是重慶康明斯,是2722一間子公司,和美國發動機巨企康明斯CMI各佔50%而組成的合營公司,24年上半年盈利大爆發,大増64%,盈利5.2億,一人一半都有2.6億,而2722在23年全年盈利只有3億元,24年盈利幾可肯定爆燈,今天收市價計1.03計,市值只有30幾億,H股11億幾,冇在A股上市但已發行的内資股則有20億左右,單一間重慶康明斯預計25年都會為2722帶來6至7億盈利,再加上重慶機電的其他業務帶來的盈利,樂觀的持有者認為股價還有100至200%的升幅.是否如此,我當然希望但願如此,只可惜我得知此等資訊太遲,若早一些知道,我會在6毫幾7毫時大大注,而家可做的事就是惜2722如金,不會再沽,靜看她是否還會不停大升.高追再加貨就唔會.還有國企重組的事在進行中,若重組順利要令估值大升的話,可能又是一隻升幾倍的爆升股,能否如願就交給時間去處理.

 由高盛,瑞銀牽頭的蜜雪集團新股上市,集資得幾十億,股數少,每股要200蚊,一手100股,一手黨2萬蚊就抽得,銀碼相對較大,升一成都有2千蚊執去飲茶食飯,升夠2成或以上,就有4,5千執,一杯茶飲都係十蚊樓下,毛利率可以做到2成幾,係香港做一定冇可能,但佢個4萬幾間分店同加盟店絕大部份在内地和東南亞,就真的有可能做到.剛入左港股通行列的華潤飲料,今天已偷步升左10%,重有隻蒙牛,連日大成交下上升,加上一號文件說要舒解養豬養牛業的困境,多d人飲奶,養牛戶先至可解困,蒙牛近日都升唔少,已冇平貨買.

 中人壽,新華升幅最顯著,最大隻的平保都升得幾好,平保上星期把持有的汽車之家股份賣哂俾海爾智家,套番十幾億美金,同當年買入價差不多,當初諗住藉汽車之家賣車俾客人可順手幫平保買保險,揸左41%,做左大股東,但如意算盤打不响,比公司長期冇貢獻,而家趁有人要,沽出這些非核心資產,套番d錢,買多幾隻内銀長期收息好過.另外,今早澤連司機竟開口,話在達成俄烏和談停戰同戰後重建上,希望得到中國幫助,搞到一大堆只在A股上市的一帶一路基建股狂升.烏克蘭的命運已掌握在美俄,一個息率勁過大耳窿,借一千要還五千,之前都係借,係俾冇話要還,冇得還就要你家的礦產資源,另一個戰勝者,要你割地賠款就必然會做,叢林法則下,誰大誰惡誰正確,要另一強者中國入來幫助重建,有甚麼著數先,總不能無償吧,說不定劇本已一早寫好,全球三大強者一同瓜分利益.

 上星期五以0.81沽出部份重慶機電2722獲利,今早此股又大升,一度升到1.04,看似自已做左傻仔,又賺少近20%,其實心裏暗喜,因還有好平的2722在手,再爆升更好,而另一隻697又拿得住,伺機升高d才食,沽左2722,跟手又増持6680,升幅可能不及2722,但短炒都是要保持貨如輪轉,儘量分散投資態度,一句老土話不能把所有雞蛋都放在一個藍裡,aII in押中就威,萬一看錯就萬劫不復.之前的短炒愛股1860,6682等人工智能軟件股現在要抖一抖,畢竟已喪升左好多,食都食到飽哂,而家讓位俾機器人相關股接力如425,6680,697,升幅一樣可以好瘋狂,而且可能維持一段長時間,蕊片,人工智能,機器人一定是今年短炒題材,同時上升或版塊輪動上升都有可能,低買高沽就冇得輸,幾時是高何時是低,就看每一個人的認知,我都是傻散一個,更不是股神,不會買入某隻股份,馬上就狂升,買入十隻,有8隻大升已好和味,另外2隻平手或大跌都影響唔到大局,有容錯的能力和空間,今天錯可能未來會是對,有足夠盈利才有不認輸不認錯的能力,單車他日會變摩托,變路虎都重得.

 日期/時間投注類别細節 23-02-20 2510:38  獨贏過關2X3  沙田星期日獨贏過關2X3 第2場1魔術控制第3場2首飾天空$10  10 $147.00 終於有錢收,冇子彈只能買10蚊注,充番血,最新結餘正165元.下次又可買番100蚊注.                                細節 支出存人 沙田星期日獨贏過關3X4 第2場1魔術控制第3場2首飾天空第4場8跨境寶马$10  $40.00 $379.50  參考編號日期/時間投注類别細節 1901  分享注項 23-02-20 2513:13  支出存入 孖寶沙田星期日孖寳第2場1魔術控制/ 2首飾天空$10  $10.00 $66.50  買哂熱門細細都有d肉食,重有好多關叫緊胡等食. https://photos.google.com/photo/AF1QipNPIKPZzGgkkb5qvvyIplABAniFD0iPvc6ydWPI

 馬斯克揸旗的Doge政府效率部,以外部電郵形式向所有政府聯邦僱員發放,要求要在星期一前回覆,過去一星期做左物野實質工作,若不回覆,就當自願離職,要執包袱走人.交出報告的就會審視所做工作是否符合入職時的工作要求.可能又係搵人工智能快速審視報告,睇吓邊d非我族類有冇犯錯,特別是民主黨支持者,要瓦解deep state深層政府,換哂自己人上去.馬斯克在X上發帖說,這份報告應該可在5分鐘内寫完,只需寫5個bullet point即重點就得.皇上侵侵跟住在社交媒體大讚馬斯克做得好,若能更激進就更好.跟住好多民主黨政客質疑錦衣衛馬斯克是否有權甘做.點會冇權,侵侵欽點的欽差大臣,重係唔收錢,大把錢冇人可收賣佢的馬救國,一心maga.馬斯克查左幾個政府部門數,稱已阻截貪腐同浪費達550億美元,但距離目標1萬至2萬億重好遠,若真係慳到甘多錢,過去美國可能是全世界貪腐最離害的國家.其實香港好多公司,特別是外资,都有寫timesheet同 billable hour制度,但都是例行公事.作得就作,純為交差同年尾份亞披蘇寫得靚d而已.好少話因此就俾人炒,都係嗰句,趁後生儘早累積財富,快些財務自由,就唔駛為5斗米折腰,甚麼中年危機都唔關你事.

  金額 獨贏過關2X3 沙田星期日獨贏過關2X3 第2場1魔術控制第3場2首飾天空$10  $30.00  總投注金額:$30.00  冇哂子彈甘滯,最新結餘正18元.

 重點有：2024年巴郡每股股價升左27%,略好過標普500去年的升幅25%.表示永遠都會偏好持有優質股票,上市同冇上市都會揸,永遠不會大量持有現金,講係甘講,但去年第四季沽出101億美元股票,買入34億股票,已是連續第九季淨流出股票.71%持股包括美國運通,蘋果,美國銀行,雪弗龍,可口可樂.最引以為傲是自1965年至2024年呢六十年,每股複合年増長率19.7%,升值55022倍,即係60年前,買1蚊而家就有55022蚊,但人生有幾多個60年,最多2個,純是數學遊戲,一要夠長命,二要多錢多到富可敵國,揀中幾間可永續經營又年年派息的優質企業,不停收股息,收左息再買落去,儲的股越儲越多,用十年計的時間換取厚利.現今一般散戶都會當佢係廢老,揸埋d廢老股,一年連埋收息,得個27%升幅,去年是但買隻美國妖股,或者加密貨幣,一日或幾日的升幅隨時多過佢揸成年,正因如此,今年封致股東書好似完全冇提人工智能,蕊片,英偉達,比特幣,機械人等看法.畢竟大部份人都是想短期致富,用長時間去換財富的方法應該冇物市場.另外他又提及之前買入5隻日本商社高息股,即是日特估,現時市值235億美元,收埋息成本價138億美元,日後會増持呢5隻日特估,佢應該都係在超低位入貨,先至會在短時間賺甘多.

 中國移動旗下中國移動智慧家庭今天在公衆號宣佈已成立中國移動具身智能製造創新中心,目標要成為全國和世界最大的人型機器人運營商,並即時大量招聘相關員工.去年中移動在全球5G大會上,已展示出懂戡車递水的機器人.三大電訊商的新藍海除左已實現大量盈利的雲和算力外,現在還多了機器人,隨着機器人日後會逐漸普遍,一定會有指定營運商負責管理,加上機器人離不開5G,6G,蕊片,算力等支援下才可運作,現有國有運營商接手營運也理所當然,可能以後每個人型機器人像現在的電話一樣,每台都有一個號碼,以便管理,否則天下大亂.製造和設計機器人的企業和零部件供應商可繼續賺大錢,而人型機器人營運商更加可永續經營同增加盈利.智慧家庭加上人型機器人相結合,會有無限想像空間.

 看到某視頻的上述標題,笑左.原本歌詞接住的好似是難離難捨,總有一些.常情如此,不可推卸.任世間再冷酷,想起這單車還有幸福可惜.

 國指2出2進,剔走李寧和中國生物製藥,新加入百濟神州同中通快遞.恒指成份股不變.而我最關心的697,順利重回港股通行列.騰迅音樂同地平線機器人就新加入科指.而港股通加入左一大堆半新股,同埋智能駕駛,高新科技股,剔走大批地產股,同股價識跌唔識升的股份,毛戈平,華潤飲料,訊飛醫療科技,小菜園等上市不久的都有份入港股通.賣蝦條的衛龍都有份,擺明目標是想多d北水來港股買佢地熟悉的内地品牌,甚麼怡寶礦泉水,毛戈平化妝品,本港散戶多數唔知係物.至於港產的新創建,惠理等股份就被剔走.

 今早0.81沽左0.72買入増持的股份,收市收0.84.下午才發覺國資委國企動向披露,重慶機電在一月份營收増加14.3%,盈利増加21.2%,30項創新技術會在上半年投入生產中去,若早些得知此消息,一定唔會甘快沽出,尚幸還有批更平買入的重慶機電股份在手.春江鴨真是快人一步,回想今早2722大成交下急升,一定是他們在搶籌入貨.另外高等法院否决利福中國私有化,因反對票達4成,北水散戶最高興,他們覺得被當是乞兒打發,還發動散戶増持股份,増加投反對票力度,就算私有化失敗會令他們輸錢也在所不惜,利福出手甘低,若大部份散戶是香港老散,就一定可以過骨,但如今是面對國內散戶就行唔通.

 昨天増持1.5元買的貨,如今1.8元,20%利潤,都是上午收市後出的消息造成,擬成立機器人產業公司,又可以炒一大輪,最好炒到等北水接力才獲利.

 早前馬斯克已話要清點金庫,看吓有冇人出估惑,虛報黃金儲備.畢竟個金庫近50年都冇人核點過,今早馬克龍更話要查埋聯儲局,看吓有冇貪腐.而特朗普今日也開聲支持盤點金庫.繼消除Usaid, 跟住又殺埋NED美國民主基金會,話出錢顛覆外國政權同輸出顏色革命都是On九的,對美國毫無好處,都是民主黨做的傻事.烏克蘭澤連司機重慘,被侵侵盡情侮辱,又話佢是個諧星出身,做左獨裁者,發動俄烏戰爭,民望極低得番4%,又非法做總統唔肯大選,但打緊仗點樣搞選舉,最攞命是侵侵要收番拜登援助烏克蘭的3千億美金,冇錢還就拿稀土同其他礦產來還,俾左又唔保證烏克蘭安全,同普京一起搵烏克蘭著數,但司機話呢3年只收左900億美國援助,其他d錢去咗邊,唔駛查,一定入哂拜登,民主黨手中.侵侵一直覺得上次輸俾拜登係對手出千,今次一定大報復,馬斯克查到美國得3.3億人,但有3.8億人拿緊社會福利,有2千萬人年齡100歲以上,160歲都有1個,離譜至此,選票更大可能可以造假,侵侵輸個一次總統選舉,一定覺得是被人為操縱.司機衰在落錯注,全落在拜登身上,又去美國國會演講,大講民主,平權.而家美國已不做冇錢搵的國際警察,下下講利益,同強者只會互惠互利,如中俄,侵侵一直話同2國最高領導人是要好朋友,相反弱國同無經濟利益價值的國家就盡力壓榨,世界真係已變天,新規則要新訂立過.

 隻敏實425一話識造機器人零部件,股價又繼續發酵狂升,隻697成立機器人產業公司,又有故事憧憬.李強鼓勵民眾多增加科技消費,電子產品消費,遲d機器人大量生產,好快大人細路都會有機器人作伴和幫助工作.

 上星期官方已確認2722會進行架構重組,造大造強,増加盈利,我第一時間沖入去増持,買入價0.72,並估計短期會大升,但之後幾天股價毫無反應,在0.7至0.72低成交下遊走,今早大升10%以上,創1年新高,一度高見0.84,就算有憧憬,都係把増持部份沽出,在0.81沽出,剩下的讓他放紙鳶.今時今日,短炒賺十零個巴仙已不是甚麼大不了的事,竟然已是常態.至於昨天長編大論提及的697,昨天在收市前以1.5元買多左些少,擺耐少少睇位減持獲利.

 新加入的恒指成份股並不重要,多數是股價已升左好多的股份,如泡泡碼特等必是大熱門.反而被剔走和新加入的港股通股份更重要,若北水心儀的股份在港股通名單上,而A股又冇上市的一定會被買爆,股價也會升得好誇張.又可以玩尋寶遊戲.暫時可留意697首程控股,去年10月被剔出港股通,股價跌到唔夠1蚊,但最近一個月,股價升左5成,今日收1.5元,市值100億多d,早幾日曾升到1.69元,主要業務經營國内停車場,去年賺4億左右,現價市盈率近30倍,因股價升左50%,派息比率9成幾,近乎賺幾多派幾多俾小股東同國家,此公司是大型國企首鋼轉型而來的,主要小股東有外資Orix,同周大福新創建,新創建好似持有8%,為何697近來升甘多,原來在2023年底同北京商管共組100億元基金專投機械人獨角獸企業,包括現今最巴閉的宇樹科技和銀河,今日宣佈再加碼投資由螞蟻牽頭的雲海圖作第六輪融資.今日收市前,另一大型國企中集集團,其持有少量的697股份只有2.38%,因此697就算大賺,也不會為集團的盈利帶來太大的影響.若宇樹未來盈利可觀,若上市就更不得了,697的股權收益會是天文數字.若明天能重回港股通行列,因市值同成交量已符合番標準,北水傻散好大可能會喪買.若不入選就是另一故事,要等一等.

 去年二月,長盛軸承的股價不過10.84,市值只有30億多些,今日此股在深圳大升15%,股價升到116,足足升左10倍,市值大増至300幾億,此股同金力永磁唔同,不是生產稀土,而是做潤滑關節,不知港股中有冇類似或掹車邊公司,若有,一定趁早埋伏等爆升.宇樹話在量產同技術進步下,普通人型機器人價格可低至3到4仟蚊,現在最平都要近萬元一台確實有點貴,普通百姓負擔不起.宇樹班人都係一班有理想的癲佬,賺大錢不是最大目的,而是要完成夢想,若是其他公司有如此能力和優勢,一定會賺到盡,不停加價.

 呢隻425平時成交不大,專做汽車零部件,又有做自動駕駛,最大賣點是7成生產在美國,在美國設有廠房,就算侵侵狂加汽車稅,對他影響不大,甚至有得益,侵侵發夢都想制造業重回美國,可以行MAGA模式,make America great again.美國要重啟汽車工業,造車企業一定會找本地汽車零部件廠商,減低成本.今早425已升左20幾巴仙,升完未我都唔知.

 美團過往從不為龐大的外賣員工交社保,壓榨員工以獲得更多利潤,政府當局一直以來都對此不滿,頻頻施壓要求改善,如今迷途知返,構建和諧勞動關係,雖然支出會大增,但長期是好事,會令長期成為龍頭的地位更鞏固.新加入者如京東就更加難突圍取勝.

 以研究蘋果供應鏈股份走勢聞名的天風證券,下午出左份詳細報告,說每台人型機器人要用3.5KG的稀土永磁,是新能源汽車用量的1.75倍,因此稀土永磁未來會是一片藍海云云.我中午講6680金力永磁的優點只是講述我的觀點,並不是鼓勵大家去高追,繼續狂升固然可喜,若高追後股價回落被綁就不要賴我,我不是財演,更不是開披床收錢教人買股票的人,只是想將有用,最新財經訊息同大家一起分享.

金額 位置過關3X4 跑馬地星期三位置過關3X4 第7場5多利彩駒第8場5椒椒醒第9場5新意马$10  $40.00  總投注金額:$40.00  上次買4隻熱門,冇一隻中,大敗而回,利潤所剩無幾,得番88蚊,今次唯有買番條廖康銘位置3穿4,希望結餘中翻100蚊.最新結餘正48元.

我講緊係金力永磁6680,在10蚊樓下橫行左好耐,我都納悶為何不大升,近來一棍升穿10蚊後,就慢慢地爬升,升幅不顯眼,今早終於似樣地大升17%,一個月都升左5成,呢間公司開採稀土永磁,是機器人副壳同關節的原材料,用左佢機器人才會靈活,健步如飛,跑得快過人類,去年已傳出馬斯克已向6680落左大單,交貨期要排幾年,但股價不升反跌.今天大升原因可能是宇樹王興興說今年旗下人形機器人會量產,並大舉推出市場.稀土就有價有市,更成為反制美國的最強武器,禁運稀土往美國.所以侵侵一上台就打格陵蘭島主意,個度大把稀土.近日重出賣烏克蘭,要佢割地俾俄羅斯,美國保佢安全,代價係要烏克蘭交出50%的稀土開採權俾美國,是否能成事有待事態發展.另一隻9880優必選也大升,但畢竟尚是冇盈利的企業,制造的機器人一定唔夠宇樹勁,但在港股中,他是機器人制造的僅有標的,有排炒,不理有冇盈利,各路資金都會追逐,又是大漲小回格局,之前因大股東頻頻減持套現搞到股價大跌,但好快又升番哂,定力唔夠,心血少的人就唔好搞9880.6880話哂有盈利,派息又爽手,派息比率6成以上,但息率因股價大升得番2厘幾.另一隻牛股中蕊981,估頂是不切實際的,今早升穿埋50蚊,大把十幾蚊買入的散戶,升到40蚊時多數走人,拿得住的人,坐多一陣,由40升到50,又升多25%,分別好大.

 今晚央視新聞的頭條當然是習近平出席民營經濟坐談會的講話,跟住就出現比亞迪王傳福,小米雷軍,宇樹王興興的回應,王傳福話會聚焦主業,要報效國家.雷軍話要把人工智能都帶入生產的產品中,令中國產品在國際更具影響力,王興興則話深受習主席講話鼓勵,會更訓身發展業務.但ATM的雙馬一王,影都唔見,可見電商平台不是中央杯茶,中國製造,新質生產力,高新科技才是中央最重視的.難怪今天小米,比亞迪在港股中破哂位,創哂新高.

 根據未經確認的專家測試,功能略勝DS同Chatgpt,已訓練左好耐,推出時間已遲了半年,最重要是此大模型消耗了二十萬塊英偉達H100蕊片和大量電力才造出來,性能雖略勝DS,但DS的優勢和亮點是平靚正,動搖不了DS.但消息一出,A股的DS概念股先跌為敬.而美國的電力供應應付不了人工智能的發展,大起核電廠是唯一出路,美股的電力股可能又會喪升,早前已經升到飛天.人工智能,算力的盡頭會是電力,冇左電力,物鬼都做唔成.而馬斯克的Grog3明顯是要來對付openAI的,馬斯克同比爾蓋茨是世仇死對頭,蓋茨成日大手沽空特斯拉,但次次特斯拉都大步檻過,跌唔死重翻生大升,依家重係侵侵的得力悍將,查死你們,近日重抄埋佩洛西家,搬走大量文件同電腦硬件返去慢慢查,美國現在其實已發生緊一場沒有煙火的内戰,侵侵明顯佔盡風,想將民主黨勢力連根拔起,民主黨只能發動支持者在各民主黨控制的州份舉行反特朗普,馬斯克示威,但人數,聲勢不大.侵侵借馬斯克之手不惜揭露大量美國邪惡的一面和貪腐,並直指是民主黨幹的好事,民望反而大増.民主黨也真窩囊,被人㩒住打,快振作起來,同共和黨鬥過平手,鬥過三五七年,世界才會獲得和平,東方大國才會越來越強大.

 早前十幾隻升得多的deepseek概念股下跌10%,下跌股份4200隻,但指數都係跌幾點,拉升内銀就可穩住指數.高息中特估最穩陣,不會急升升到離哂譜,跌也跌唔出物野出樣.大部份股份上升時,他們會唔升甚至跌少少.到其他股份全部下跌,這批股份就會上升,頂住個市,高息中特估就具股市穩定器作用,買左等財息兼收是大概率的事.

 今早A股先跌後升,全靠内銀,工中建農齊創歷史新高,42隻銀行股全部上升.中國目標要成為金融強國,邏輯上銀行股一定不能跌,已有貨的可安心長期持有,日日數錢.

 939,3988 keep住創多年新高,非指數股3618光大銀行又創3年新高,因個倉持有呢3隻内銀,故特别留意,其他内銀相信都有類似走勢.班磚家之前成日叫人不要高追内銀,想買都要等股價跌到幾多幾多值得買,又懶醒教人唔好貪息在除淨前買,除淨後股價一定大跌任你買,結果係同預計完全相反,從未持有任何股份的磚家門,市跌看跌,市升看升,而家紛紛轉呔話看好内銀股,但依然死性不改,等股價跌到幾多幾多才可買,低位時又唔敢買,股價大升後又怕高追唔敢買,到頭來永遠不會買.這也是他們從不持有股份的原因.

 隻1860繼續破新高,另一隻美圖1357,擁有女士們最鐘意用來P圖扮美女的app,連升多日後,今日再大棍抽高,再創新高.呢2隻野有一特點,都是有盈利的公司,而且盈利持續上升,有實質業務支撑股價狂升.講番個市,4個字形容,氣勢如虹.有大量平貨在手,帳面浮盈好多好多的朋友,繼續揸落去,唔好亂甘沽.雖然早沽早享受,但遲沽可能會多幾球,延遲滿足會令財富増值更多.

 工行,建行,農行今天再創新高,已不計派息因素,中行差一格就創新高,3988後天就派中期息,又有錢返來,揸住四大内銀,就知真正的財息兼收是甚麼體驗.細内銀一樣升飛起,3618重農行竟見5蚊,大幅跑贏3988,幾乎差唔多價位一齊起步升,但股價同派息一直跑贏中行.内銀大局已定,跟住會大升的是電訊三傻,762垂直式上升,嘆為觀止,電訊三傻根本就是會派高息的真科技股,應給予科技股的估值,中移動在内蒙古擁有全中國全世界最大規模的算力中心,有幾萬塊高端蕊片支撑,由於市值太大,又是權重指數股,不可指望單日可急升7至10%,每天升少少就足夠,已升穿80,100蚊還會遠嗎？每年收5蚊以上股息不好嗎,40至60蚊買入者會有誘因沽出嗎？

 在發表講話前,先由6間民企負責人上台講話,包括華為任正非,宇樹王興興,比亞迪王傳福,小米雷軍,新希望劉永好和上海韋爾半導體老總.跟住到習大大總結,主要是要民企統一想思,跟隨中央對國内外經濟的走勢研判,鼓勵企業和企業家要有創業和報效國家的精神.目前民企是存在一定困難,但只是暫時性,只要跟住國家制定的大方向走,一定見到陽光,見到明天.又說中國是實行社會主義市場經濟,任何形式的企業都不能違規,會令民企在一個公平守法下的市場營運.講一大堆話,只是表達一個訊息,要賺錢就要跟隨國家的戰略佈局.聽教聽話才有運行.

 出席的包括宇樹王興興,巴巴馬雲,華為任正非,小米雷軍,比亞迪王傳福,寧德時代曾毓群,新希望劉永好,吉利,飛鶴乳業,韋爾蕊片等等一大堆,好像沒有美團王興,騰訊馬化騰,只根據照片顯示,尚在查證中,官方尚未出正式通告.李書福提議在小學就要改制,利用AR,VR教學,找出有潛質,有興趣的小朋友專攻科技,為國家培養更多科技人才. 美團黃興,騰訊馬化騰都有份出席,當然還有深度求索的梁文峰.習主席向他們訓話的内容,要看今晚的央視新聞才知.應該離不開中國製造2025,大舉進軍海内外場.小米剛宣佈除了手機和電動車,還會開拓大型中央空調,另一年收入萬億的市場,對標大金冷氣,日本小家電已敗走,現在輪到大型空調都要受到挑戰.

 原估計上星期五股價會發癲的1860,結果股價只升5%,今天才狂升15%,5%加15%,重未計過去幾天的升幅,升幅的確是好誇張,牛市買中牛股不要估頂,升起上來會好得人驚,只要不是在高位追貨,在低位買左貨的,不妨任紙鳶高飛,飛天好,直飛天國都好,揸得住的感覺真係十分良好.

 電訊三傻繼續大升,越細隻越升得勁,762一放絕塵,大牛龟941都升穿80蚊,唔計已收左的十幾蚊股息,買入價至今3年内已有近倍升幅,已穿越牛熊,持有者笑逐顏開,希望繼續笑下去.

 要央企進行煥新行動.在保持原有業務優勢外,更要開展高端的產業升級.會不斷提升央企上市控股公司的質量,也會進一步加強市值管理.雖是老調重彈,但是重要的事情是要講唔止三次的,顯然重係對大型央企的估值唔多滿意,股價要升升升,升到滿意為止.

 金庸熱愛中國文化,這幾句改自金剛經經文的詩句,成為倚天屠龍記中九陽真經的武功口訣,張無忌練成九陽神功後,強橫霸道的滅絕師太都不是對手.2天前,中國外長王毅在出席世界人工智能大會,被記者問及如何看待中美關係,王毅就說中國人從不信邪,不怕鬼,新中國都是在歷盡險阻下成長壯大起來的,並引用易經中,天行健君子自強不息作為答案.跟住才拋出他強由他強,清風拂山崗.他橫任他橫,明月照大江.任爾東西南北風,我自泰然處之,巍然不動.最抵死係剩機賣廣告,若記者唔明佢講物,可找deepseek幫手,效果非常好,翻譯精準並能指出真正含意.最後當然是講番d客套話,互相尊重,共同合作,互利共贏才是中美關係的最好方向.

 小米雷軍寄予厚望的智能眼鏡尚未面世,但聯通已在去年底推出低端的運動型智能眼鏡,功能冇甘多,都係測心跳,通話,拍攝之類.但都要3千幾蚊人仔.中移動則表示會在第一季推出三款特定高端人工智能眼鏡,中電信則會在年中推出.高端意思即是多左好多想唔到的功能,如可以透過觀察實物如食物,可快速計算食品的卡路里,營養成份等資料.

16-02-20 2510:06  獨贏及位置過關4X6  支出存入 沙田星期日獨贏及位置過關4X6 第1場4焦點第8場7駿跑得第9場7翠紅第10場1駿步騰飛$4.1667/24 (靈活玩)  $1 00.00  最新結餘正88元.就快負數啦,今天一定要中.揀游達榮同廖康銘呢2個鬥志鮮明的新倉的熱門馬來買,每個倉2隻.

 新錦衣衛組織Doge在馬斯克帶領下,對聯邦政府各部門查數揭露貪腐,有證有據就大量在X公開,民主黨完全不能反駁,因為是事實,只能轉移視線質疑馬斯克是否有權查數,但侵侵聖上全力支持,贈予尚方寶劍,可斬殺貪官污吏.侵侵同習大大是好朋友,我信是真的,侵侵整頓政府貪腐的招數可能是習大大教的.曾有記者問馬斯克現時深層政府架構呢個蘋果有幾爛,馬回答是成個蘋果已注滿蛆蟲,已爛哂,冇得救,要掉左佢.現在每天看最年青白宮發言Karoline Leavitt的新聞發佈會已最大娱樂,今天又準備充足,拿住成Usaid同其他部門的罪證,娱樂大眾,拿幾萬美金去斯里蘭卡教佢地天氣遷移,賓州有一聯邦僱員出糧出到150歲,而家重出緊米又用幾百萬去巴西研究如何令飼養的牛產生的牛屎少點放出甲烷,減少碳排放,又如用5千幾萬美元安排非法移民住五星級酒店,但查數發現只用左1900萬,另外3千幾萬唔知去左邊,她說這些事完全唔關美國事,點解要浪費公帑,她説這全是浪費同貪腐,若有唔同意的人歡迎拿出證據反駁.跟住Doge準備查FBI,CIA同國防部.甘查法,會唔會有生命危險？

 傍晚財政部把三大AMC資產管理公司,中國信達,長城資產,東方資產的股權全部無償地轉給中央匯金,另外同樣由財政部持有的中國國際金融也轉給中央匯金管理,三大資產管理公司是過去幾次為救市而成立的產物,專接收頻臨破產的國有資產,主要是來自4大内銀的不良資產,而中國國際金融則持有大量内銀股份,這樣一來,中央匯金就成為超級巨無霸,實力雄厚.甘樣做,除左是為整合國家隊,更有人認為是為建立平準基金作準備,平準基金即是拿正牌明刀明槍的護盤資金,去年九月,人行行長潘功勝已承認開始研究成立平準基金,另一推測是利用三大資產管理公司接收4大内銀的壞賬,令内銀盤數更加靚.唯一唔駛估的就是此舉是為左令A股長期保持上升態勢.

 不在内地上市而選擇在港上市明顯是想搞旺搞好港股市場,海外資金也會被吸引入來買貨,此小龍尚在虧損階段,但營收大増,虧損連續3年下降,主業前景亮麗,一定抽到爆燈,若然放深度求索來港上市,恒指會升到幾多點？

 中國製造2025已勢不可擋,24年對世界各國的貿易順差大増29%,有7679億美元,破哂紀錄.科技力量一直在示人以弱,磨利把劍先出手,殺對手一個措手不及,電動車,家電,新能源已無敵,而家出左杭州6小龍,宇樹機器人同深度求索震驚天下,一下子把對手幹翻,華為,小米的手機及各類電子產品在國内銷路已大幅拋離蘋果產品,若能成功出海,立足海外市場,隨時干翻蘋果,騰迅的手遊仍佔主導地位,若能進一步霸佔海外市場就更好不過,阿里巴巴的電商若能在海外市場更進一步,聯同拼多多攻城掠地,霸佔更多市場,美國納指7雄就各自有可怕的對手,再難單靠財技和食老本獨霸市場,只能鬥技術,鬥科技同鬥卷.路透社說下星期習大大會和各民營科企巨頭開座談會,如傳聞屬實,相信是最高領導人派發最新任務.下午三點過後,在此消息傳出後,本已大升的恒指升得更多,升夠800點收市.

 DS概念股金山雲,醫渡科技升得最誇張,前者回完又創歷史新高,連帶做本地數據中心的新意網都趁勢一棍升左26%,重有隻高息股,長期為電訊三傻服務,中移動揸左近2成股份的亞信科技1675,都升2成幾3成,業務多元化,物鬼火山大模型,阿里大模型,百度大模型的構建,佢都係主要供應商.而電訊三傻下午越升越有,勢不可擋.728有天翼雲,中移動有移動雲,聯通則有前老總在朝中任要職,不能再將三傻是冇増長或低増長的廢老股,隨時成為有高盈利的成長股.

 成立左唔夠一年的國家數據局,首任局長即現任局長劉烈宏是聯通前話事人,被中央借調去做局長.可見中央一早就部署用數據搵大錢,電訊三傻是最大受惠者.今早聯通762升近5%也合情合理,連大牛龜941唔計派息都創3年新高,三傻儲埋d數據,好快就會成為資產,可列入資產負債表,而且唔會如房地產般海鮮價,可大升也會大跌,畢竟是國家機密,是國有資產.香港的公司註冊處同土地註册處晨早已自負盈虧,唔需要使政府錢,專利運營等同數據更新的查冊服務,就足夠養起成個部門.

 美股APP昨天盤後出左份唔錯的業績,今晚一開市就喪升3成幾,股價升穿500美元,市值已達1700億美元,是升得好離譜,只是用人工智能做網上廣告,你輸入某些文字或搜尋某些線上遊戲,佢就會第一時間彈出大量相關廣告,在中國和東南亞做相同業務的港股是1860匯量科技,半年股價都升左4倍幾,但升幅同市值仍低applovin十條街,因APP由低位已升左4580%,論升幅英偉達都要靠邊站,若APP收市仍高收3成以上,1860明早又會發癲,北水傻散又會沖沖沖.

 此央企並不是單純整合數據,目的是要商業化,是要令數據成為資產,產生盈利.三大電訊商過去已起左大量數據中心,特別是中移動,相信此央企的成立電訊三寶必有份參與,更可從中取得大量盈利,數據是國家機密和可變現資產,一定要由央企掌控.

 杭州6小龍的崛起,在科技上已有超越深圳的勢頭,騰迅都有研發機器人,但機器人的成就遠不及世界領頭羊宇樹科技,廣東省去年GDP已跌去頭5位,5%都冇,已被杭州,重慶爬頭,幸深圳還有増長,廣東省過去過度注重房地產,忽略科創,如今唯有急起直追,深圳是騰迅,華為,平保的大本營,借助騰迅的實力,機器人性能隨時又會有所突破.機器人也不是宇樹科技做哂.已投入服務的公安機器狗,機器狼也是由四川省的大學和企業研發的.各省市之間的競爭是激烈的,這樣才會有進步.早幾日廣州省已宣佈在年中會開辦十幾條用飛行器或直昇機的低空載人航線,其中一條是飛香港,只需26分鐘,收費460至600元之間.

 共推出2款娱樂機械人,平的G1型號9萬9人仔,45天交貨.進階版H1型號65萬人仔,60天交貨.在京東平台上架,被搶購一空,一天就下架.想買的就只能聯絡宇樹銷售部.十皮野買個玩具返來,好多人買得起,你對住佢跳幾次阿白痴,阿白痴,啊啊,佢學識後,同你一齊跳唱阿白痴,阿白痴,諗都好好笑.隨著技術,材料供應鏈完善後,成本一定會大減,據聞稀土是副計的主要材料,難怪侵侵要打格陵蘭島主意,個度稀土資源豐富.相信好快就會有機器人兵團出現,唔會怕死只懂執行危險任務,邊個多機器人就勝算大.中國人民解放軍演習視頻多次出現機器狗,機器狼孭住武器發射,直立機器人揸住武器就尚未出現,到出個日一定又超越衆人的認知.

 絕大部份内銀股的PB都低過1,A股同H股都是,唯獨招行3968昨天A股,PB已重上1,而H股也在1樓上,AH冇溢價,隨時日後H貴過A,4大内銀會否如招行般的走向,若PB去到1,股價就有排升,PB唔駛升到1,升多少少股價都可以升好多,國策要大幅改善央國企的破淨率,内銀就首先做個良好示範,跟住就到其他版塊跟上.

1860一開市就大成交升近25%, 我當然馬上鬥快走,幸好不貪心冇set沽出價,交給運氣隨市價决定,沽出價都有近20%利潤,沽左當然望佢大跌,又可低位買番,但似乎跌唔落,重升緊十幾個巴仙,北水傻散人多錢又多,真傻可能是如我這般唔敢大大注買入的人,但我已十分滿足同感恩,幸福不是必然的,不能貪勝不知輸,遇着長期有波幅有升幅的好股,堅持不高追,跌才増持,適時獲利,在暫時是對的事情上不斷重覆做,不需要訓身,收獲會超乎想像.類似的北水鐘愛的AI應用股一大堆,都是波幅可觀,跌完好快又大升,有些甚至冇物跌過,這堆股份幾個月前已提過,包括第四範式,速騰聚創,康耐特光學,醫渡科技等等,個遊戲幾時完我唔知,可能只是元年剛開始都話唔埋.其實重有堆同機器人產業鏈有關的公司已升左好多,只是升得冇甘揚而已.

呢2隻野去年大市升到2萬3仟幾點時,升得最癲同升得最快,但回調下跌時也是跌得最甘同最快.今日隻新股茗茶上市,首日已改穿招股價約6%,但超額認購成170倍,不管靚股或垃圾股,都有人搶住買,月底隻蜜雪冰城又會上市,巨無霸寧德時代也已正式申請來港上市,來緊重有成100間内地公司來港上市,相反年頭至今,A股零間公司新上市,當局嚴控垃圾公司上市,想上市圈錢就請去港股或美國.申請來港上市的内地公司有好公司,也有許多垃圾公司,但對港交所來講只有好處沒有壞處,多一間公司上市就多一份盈利,上市後股價升或跌港交所都係袋袋平安,若每日成交保持2千幾億,港交所想唔大升都難.另一隻平保,已變左内銀ETF,再不是内房ETF,瘋狂買入内銀,加埋持有的匯控,每年近乎無風險收股息都收到傻,派息一定大増,股價冇可能唔升,任由息率去到10厘以上,再加上呢2隻又是指數權重股,特別是2318,同3隻内銀加埋已成穩住指數的新勢力.科技類個6隻成份股股,除左騰迅同網易升得少外,其餘中蕊,比亞迪電子,小米,聯想全部已升到飛天.只要呢2個版塊保持強勢,恒指還有大升空間,只是消費類版塊有太多股份,股價長期升的少跌的多,就算有近期大升的巴巴跑出,但又會有美團下跌拖後腿,若今天美團跟市升,今日恒指肯定升得更多.

 同國企冇物分別的萬科下午一度急升15%,深圳地鐵已全面控制了萬科,低價買哂佢d值錢野,揾哂自已友入董事局,深圳市政府又低息貸款俾萬科,萬科肯定不要倒,假以時日,過往賺大錢的萬科又會返番來.

獨贏及位置過關3X7  金額 沙田星期三獨贏及位置過關3X7 第1場11隼閣第2場4快马加鞭第3場9火神神樂$3.84/26 (靈活玩)  $1 00.00  總投注金額:$1 00.00 子彈已所剩不多,最新結餘正125元.  1104 位置Q過關6X15 沙田星期三位置Q過關6X15  第1場10朗日雪峰拖4醒目勇駒+11隼閣第2場4快马加鞭拖2漣心星+9南區旺第3場9火神神樂拖4贏得自然+11日日奬第5場6渑來勇士拖2酷霸王+4譽友駿駒第7場8昇瀧駒拖4同祥和順+6好友心得第8場2假面騎士拖9智跑得+10德心知遇$1.66/60 (靈活玩)  $1 00.00  總投注金額:$1 00.00  遊戲外的個人投注注項供參考

 京東攪埋外賣業務,要取代美團談何容易,能否干得過餓了麼都有問號,餓了麼都快做唔住,阿里最好趁早賣埋餓了麼這堆非核心又冇錢賺的業務,專注電商同人工智能好過.任由京東同美團内卷,打生打死,若玩埋一份,只能不斷燒錢但又冇錢賺.

 上海電氣2727之前因逐漸轉型到機器人製造而狂升,升幅以倍計,高位回調過後,現在又來顛過.至於1072東方電氣同1133哈爾濱電氣,2者業務極度相似,1133的管理層全是東方電氣的人調過去的,過往1133衰到貼地,又貪腐,業務又差長期虧損,如今重生,股價也大翻身.相反東方電氣,無講規模,科技創新能力均是領先者,但股價升幅就相對極度落後,可能是要執行國家任務,成為國之重器,不斷成功研制各類產品,不需再靠國外,甚至超越外國,並能成功在國内使用,將來一定會帶來可觀盈利,股價短期冇太大驚喜,長期則看好.另一利好因素會是憧憬1133同1072結合成世界級企業,但這都是靠估的,不一定成真.因此,今早已把早前在9個2増持的1072沽出,執得個10%,留下的部份就長揸,升得太慢和太少竟成為沽出原因,已有違我的初心,明知是好股,但衡量過機會成本和貪婪心作崇下,都係要換過第二隻升得多的,但第一重倉941一定唔會沽,就算升得慢同升得少.升得多的内銀股都唔會亂沽.

 3838出左盈喜,預計除稅前全年盈利8億至8億4千萬人仔,去年同期則為1.77億元,全年盈利為1.08億.今年上半年盈利已有2.3億,股價也升左一大截,但始終升不穿0.2元,以今天收市價計,市值夠12億.但此公司手頭現金12億元,去年還左5億多元債,已近乎冇債,又是一隻現金牛,只是派息比率不太高,只有3成幾唔夠4成.23年業績倒退,才導致股價被嚴重低估,才有13仙任人買.通告說盈利大増因原材料玉米粒價格低過23年,但前景並非一直可賺甘多,因產品價格隨時會因供過於求而受影響.但今年實在賺了太多,市值才12億,除稅前盈利有8億,除稅後加埋可能的計提,盈利至少有6至7億或更多,就算派息比率不變,派息金額也會大増.在毫幾子買左的朋友已穩坐釣魚船,等收高息.若然明早股價唔升,重係2毫子,值得加貨,升得太多就無謂高追.

 據内地傳媒報導,重慶市國資委主任10日下午參觀重慶機電,應說會加快重慶機電整合重組的進度,會在三月底前完成,是否是另一國企重組的前奏,早幾日東風汽車在收市後公佈會和另外的國企車企重組,翌日開市曾狂升80%,收市升2成幾,今天計還有3成以上升幅.2722此時升5%,應該消息尚未擴散,之後會否大升我唔知,只是快一步講出此消息.相信央國企之間的重組壯大會不斷發生.

中信把2715份市值2億以上的基金季報餵給deepseek R1模型進行分析對比,佢當然唔會講俾大家聽邊幾隻股票會大升,只講基金選股的模式,作風,取態,又細分地域,華東,華中,華南的基金經理會買邊類型股份,長線或短線.結論係基金選股最著重政策的可行性.相信好快,甚麼研究部高級分析員,經濟研究員都要失業同消失,會計師行的審計員也會好快被取替,過往查數要搬幾十箱文件翻公司,日以繼夜工作才能完成盡職審查,馬克龍只派出6名熟悉人工智能的年青人,一天就找到無數USAID亂使錢的證據並公之於世.DS創辦人梁文峯之前是做量化投資基金,利用人工智能技術收集大量數據,專收割做短線投機或利用槓杆的對手韭菜,普通散戶哪是對手,輸多過贏,若是堅定的價值投資者,如買高息股長期收息,就不會被收割,因不需被迫止蝕.

 港股今早也是相同情況,絕大部份科技股都回調,非指數的AI股繼續精采,上上落落,大把波幅俾人炒,穩住指數不大跌就靠有股價話語權的權重中特估頂住,内銀,電訊,3桶油全部上升.恒指慢升最好,急升反而會引來大量沽盤,升吓回吓,長期個個星期都有幾百點升幅已足夠.

 去年年中曾揚言All in China的對沖基金大鱷David Tepper, 一早低位買定貨,跟住大力唱好中港股市,相信十月個轉大升市已執唔少,彭博發覺在去年第四季,佢管理的基金又大手增持中概股,包括京東,巴巴,拼多多,貝壳等,另外又狂買2隻A股指數ETF,對沖基金往往較早傳統長線基金一步入市,跟住又快速趁高獲利,希望佢今次揸耐些,唔好甘快走人.佢個基金目前持股最多的是9988巴巴.

之前短炒過幾次的醫渡科技,都係北水愛股,都係涉及人工智能應用,那時DS未大爆發,但股價已屢創新高,勢估唔到今天成25%,由早到收市都保持升2成幾,醫療器材,技術加上人工智能可令成本大幅減低,不需再進口昂貴的進口貨,反過來更可卷到國外,國内外平民百姓都可受惠,生產商又有可觀利潤,是雙贏局面.今日除左2158大升外,微創機器人都2成,都是搞醫療的,另一隻去年底才在港上市的2506訊飛醫學科技,上市價好似82蚊,其母公司科大訊飛是内地科技龍頭,已開始留意,之後股價長期在70幾至80蚊上落,每天成交稀疏,因此冇落注買番多少擺吓等運到,但唔知幾時開始慢慢上升,今天股價已是107元以上,若買左,唔駛個半月就有3成以上利潤,港股真是遍地寶藏,另一隻中視金橋,識講係好野,因有大量現金同揸住5%的325,個3買唔到,又孤寒唔肯高2格買,之後就日日升少少,升到而家1個8毫幾.真係應面十面埋伏的歌詞,只差一點點先可以再會面,可惜偏偏剛剛擦過.悔不當初,輕輕放過,現在懲罰我,分手分錯了嗎.

 特朗普在接受霍士電視台,僅有的一間親共和黨和支持特朗普的傳媒訪問時,說要將加拿大納入美國版圖是認真的,不是講笑.原因是加拿大令美國每年損失2000億美元,他不會令此事再次發生.

 馬斯克掌管的DOGE奉旨去CIA查數,交待有幾多人出緊糧或被收賣用左幾多錢都要呈報,但偏偏負責回覆的人竟是一名科技盲,在傳送電郵名單時居然冇加密,一封刊載尚在試用期,懂中文,非美國公民,大部份是中國籍的特工名單被曝光,民主黨控制的紐約時報大肆報導,美國國家安全委員會衆議院議長話這本來是一場可避免事情,只是有人犯左低級錯誤.拜登任内的中情局局長在2021推出中國計劃,高薪招聘中國特工,並話計劃好成功,對中國一切舉動瞭如指掌.有人認為是中情局絕大部份人不願食肥雞餐離職,栽員減開支目的做唔到,於是馬斯克故意放料,令原有人員,管理層冇法再留低,也有人話被逼走的人為左報復故意洩密,當然也有人說發放的名單是假的,為左迷惑中方,這不大靠譜,你估中方情報機構是食素的嗎,甘易被迷惑到.我估馬斯克又稱馬一龍是想清洗中情局的民主黨勢力,之後換哂自已人入去,免得日後中情局又設局或找到新罪證找馬一龍和侵侵麻煩.犠牲現有滲透中國的特工,中國會稱為漢奸,馬一龍不會在意,最緊要慳錢或請個班新的就得.中國一定會好高興,一定會順勢揪出在國内外潛伏的特工.冇左大水喉金主照住,短期内可能好多反中視頻和KOL會消失.我甚至懷疑,馬一龍是中國的好朋友,為左商業利益,送份厚禮俾中國當投名狀.呢個世界越來越好玩,真真假假,令人摸不着頭腦

 去年年尾港股個轉急升到2萬3千點,升得太急大快,主要是對沖基金和外資一早買哂貨,短時間升得太多,於是沽貨割韭菜走人.搞到恒指幾乎打回原型.今次唔同,外資一樣轉呔大讚中港股票有大升空間,連已走左的長線基金中最球最大的挪威全球養老主權基金都大手増持港股,由於買得平,相信會揸好耐.如今港股走慢牛,一星期升幾百點就夠,好快就會升2,3仟點,更重要是國家大力撑港股,國内資金已成港股主力,優質高息央國企他們買到已有股價話語權,而大量他們喜愛的,市值低的科技股,更是炒到飛起,輪流炒上,波幅同升幅一樣驚人,若自問身手好,走位靈活,心態良好,出出入入隨時贏爆廠,割内地老散韭菜.唔想攪甘多野,長揸住d高息中特估,一樣有可觀回報,而且毫無壓力,不需担驚受怕.

 三大電訊商已全部接入deepseek,941同728更有自已的領先大模型,最離譜是外國講DS是中移動扶持的.其實3大電訊根本就是科技股,今次DS引發的狂潮點可以冇份.A股一開市,中電信漲停,中聯通6%,中移動升4%.H股3隻全部上升.

 一直受電價可能會下跌致影響股價的綠電股,即新能源發電股,前天出台了新裝機電價的計算方法,利好綠電股,雖然電價還有下跌空間,但確保了綠電穩定的盈利,不再會担心新起電廠會起一間蝕一間,起得越多將來盈利越豐厚.916應該最受惠,其次是836,是否如我估計般,今天可留意此2股走勢.

  金額 位置Q過關5X15 沙田星期日位置Q過關5X15  第1場13帝豪歡星拖1文明福星+11背背龙第4場2嘉應巨昇+4開心五月 第6場6巧眼光+7鼓浪好友+8川河型駒第7場7光年魅力+9糖不甩 第9場7和平波+8銀亮奔騰$3.12/32(靈活玩)  $1 00.00  總投注金額:$1 00.00  今天全買游達榮加巫偉傑組合,純属測試性質,最新結餘正204元.

 近日的士行業大罵阿里巴巴旗下高德叫車不講武德,背信棄義,做埋網約白牌車業務,損害的士行業利益.的士牌價格近年已由高峯期的7百幾萬跌到二百幾萬,慘過在超高位買樓.高德地圖是阿里非核心業務中做得最好的,估唔到甘快就殺入香港市場,内地網約車已盛行多年,隨住科技不斷進步,將來隨時都會被淘汰,更何況是的士.更大鑊的是深圳在2021年已免費發的士牌,你要就俾你,香港就後知後覺,不當一回事,唔好講甚麼超前部署,就連網約車都遲内地好多年先至有,更有甚者是不少人相信的士牌有價有市,只升不跌.現在的士牌重值2百幾3百萬算跌得少.有有朝一天,若香港學深圳免費發的士牌,的士牌會值幾多錢.專做的士小巴按揭的財仔上市公司,業績都是蝕到喊,不知有否本地銀行專做呢種業務,有就大件事,就算有都應該份額不大.

凡是拜登贊成的, 特朗普一定會推倒重來.拜登任内,禁用塑膠飲管,要用可分解的紙製飲管.侵侵在第一任内已講明唔信有地球暖化,是環保人士制造出來的大騙局,地球根本就無病.如今重新上台,就立刻做所謂的撥亂反正動作,有些事是做得對,有些事就是亂來,更引來對手質疑有利益輸送之嫌,石油巨企是捐款俾侵侵參選最多的行業,侵侵一做番總統,就取消大規模起電動車充電站計劃,又要不斷鑽鑽鑽掘多d石油,連細眉細眼的塑膠飲管都要用多d,用多d石化燃料,同世界主流取態完全相反,最開心肯定是石油公司,難免令人覺得是利益輸送.做得啱的是用左個27歲年輕貌美的白宮女發言人,次次答記者提問如宣讀聖旨,簡單直接,不轉灣兜圈,封住記者把口.又把所有美國不是,做得唔好的事入哂拜登數.印象深刻的美國只有男人同女人.又將USAID的糊塗賬巨細無遺講出來.跟手侵侵又出行政命令禁止跨性別人士參加任何女性體育比賽.馬斯克跟手就搵6個後生仔女團滅USAlD.看似特朗普佔盡上風,但必引來利益受損者及反對者強力對抗,邊個能笑到最後都難講.民主黨過去一直控制住傳媒,荷里活娱樂事業,宣揚他們的普世價值,如今特朗普來個文化大革命,要重定遊戲規則,一個國家若嚴重分化内耗,國力同影響力必會下降,最好呢4年美國内部鬥個你死我活.

 侵侵今日話deepseek是好東西,不會對國家安全構成威脅,又話美國可透過deepseek從中得益,特別是在發展人工智能上,因為深度求索令人工智能應用比想像中便宜,有利美國,講得有紋有路.反而一班長期唱衰中國又移居外地的KOL,跟車太貼,dayone就話DS是流野,中國識鬼做人工智能,而家點兜,點兜都冇用,越講得多越冇公信力,好快就收檔.侵侵而家重點在國内清除民主黨的勢力,揾馬斯克去剷除既得利益者,搵6個18至24歲的年青人去查數,所有唔見得光的東西都爆出來,跟住侵侵又簽大堆特別行政指令,繞過2院,大筆一揮,要炒邊個就炒邊個,要摺埋甚麼部門也只要一張A4紙,最新動作係唔俾任何政府訊息俾拜登,當然民主黨也不會坐以待斃,尤其是當損害到幕後金主利益時,一定會反抗,還擊.最希望雙方半斤八両,冇人壓倒性佔優,不停内耗内鬥,越亂越好,甘樣世界新秩序好快就會重新洗過牌.

呢十大内險總資產約30萬億,買金上限不能超過資產上限1%,即係有3千億資金買黃金,講明係要作中長期配置,令長期投資如養老金等有更多配置. 世界秩序已有所改變,黃金不停創歷史新高也印證了這一點,以前個套十年黃金變爛銅理論已不合時宜.

就憑這則消息,2533一度升幅達50%.比亞迪將在10號公佈智能汽車大計,昨天1211已大升一成,逼近歷史新高,一眾汽車股也發力,看來中國在蕊片上已大有突破,越制栽越激進步,隨時後發先至,電動車已幹死傳統汽車強國德國和日本,再來個量產智能駕駛,真不得了.松下昨天已宣佈摺panasonic,唔再玩家電,唔夠中國玩 .原來港股都有冷靜機制,2533因短時間升得太多,自動停止交易5分鐘才重開.

 Yolo You only live once的意思.在高息環境下,舊有經濟理論會講人們會傾向儲蓄,收高息,股市不會大升,但現今年青人特別是西方,就採取相反操作,他們大都是在餓又餓唔死,彈又彈唔起的階段.儲錢根本不能致富,既然如此,就放開包袱去吃喝玩樂,今天有酒今朝醉,才不枉來到人間一行,有錢投資的就更會加槓杆投資高風險高回報的事上,虛擬貨幣,追逐已升到爆燈的股份,能否目標達成,能全身而退都不重要,最緊要參與過.幸好有錢的中國老百姓都是喜歡儲錢,不會冒險,但政府都係想他們拿些少儲蓄去股票市場投資,買些冇大跌風險,長揸必賺的高息股.

 中軟354不停升,另一隻浪潮數字596,又升穿5蚊,52周新高,硬件有硬件升,992短期已3成幾,小米又快出智能眼鏡,不停有憧憬令股價不斷創新高.愛股6862同1860更可愛,輪流大升,升完又跌下,轉頭又升至更高,短炒極品,甚麼資金在炒,當然是北水.要講誇張非老鋪黃金6181莫屬,上市價幾十蚊,1年就升10倍,變左幾百蚊,同樣係賣金的周大福,六福等與之相比,股價直頭係天堂和煉獄之比,去年國内私募基金回報最佳的首位升左51%,全因重倉左老鋪黃金而有此佳績.股票除了基本面和預期表現外,資金買入長揸更是重要因素.

 是否又在老屈,專家聲稱DS的伺服器在中國境内,極大可能用的就是中移動的電腦基礎置施,用家的資訊會源源不絕傳往中移動,會危害國家安全,伺服器在中國内地有毛病嗎,唔通要放在美國,另外又懷疑成立不夠2年的深度求索幕後金主是中移動,一個年青人冇可能有如此財力,但不要忘記人家搞人工智能大模型前是搞私募量化基金的,用人工智能炒股賺大錢的,普通散戶哪是他對手.無論是否老屈老作,都影響唔到DS同中移動,中移動一早被制栽,DS全世界都爭相使用,就算被美國禁用也沒甚麼大不了.

 明天冬亞會在哈爾濱開幕,連李家超都要上去,泰國女總理都會出席.中央預計冰雪經濟會帶來每年過萬億收入,不只東三省經濟受惠,南方好多城市都有人造滑雪,冰雪樂園.各種冰雪活動的裝備,設施,都會有生產需求,衣食行也會受惠.A股的冰雪股已一早升飛天,但港股好似冇物相關股份,應該係有的但我唔知係邊幾隻,可能在低位儲貨階段,收集完成又會升到痴線.較大可能的是安踏同波司登,造鞋同造冬服的,一旦成功打造出成功的冰雪品牌,就大有錢途.另外一隻冷門的復星旅遊文化,在内地開左十幾個滑雪場.呢3隻都係靠估唔一定啱.波司登呢排不停回購,又有大量現金,股價又唔多升甚至下跌,可優先注意走勢.

 AI眼鏡,AI手機,AI PC甚至AI玩具都令產品不停轉換,可制造更多盈利.AI又離不開蕊片,不一定要昂貴蕊片,因此中蕊981又創歷史新高,人工智能眼鏡股康特光學2276再創歷史新高,聯想,一眾手機設備股近日都強勢上升,AI軟件股更是長炒長有,已大升的高位徘徊伺機再上,落後的就從後力追,354中軟從低位已升左唔少,deepseek的出現令AI熱潮更熾熱,應該有排炒,全世界各科技巨頭的大模型都紛紛接入deepseek,同早前話DS是假的,山寨貨,侵權的,冇用的說法180度轉變.昨晚,中移動的大模型也接入左DS.唔想炒炒賣賣出出入入的就安心揸高息中特估,有機會大跌出現低位,就加倉買入,升番多少有一定利潤就沽出加倉都份,令持貨成本不停減低,更早達致零成本持貨.

獨贏及位置過關4X6  支出存入 跑馬地星期三獨贏及位置過關4X6 第4場1智取神駒第5場2金滙昇昇第6場2北海盗第8場4太陽勇士$4.1667/24 (靈活玩)  $1 00.00 $124.50 終於有24.5元進賬,最新結餘正304元.

 都叫做走程序依法辦事,不是夾硬來,但多數都係要交出港口營運權.長和甘多業務在外,若被定性為中資公司但實際又不是,無隊可站,變左孤兒仔都幾頭痕,可惜長和的熊證和put輪冇證券商敢出,出的全是冇人買的看升牛證,否則長put長和,日日收錢.

獨贏及位置過關4X6 跑马地星期三獨贏及位置過關4X6 第4場1智取神駒第5場2金匯昇昇第6場2北海盗第8場4太陽勇士$4.16/24 (靈活玩)  $1 00.00  總投注金额:$1 00.00  子彈已剩不多,要搵番d彈藥補充下,買條潘頓WP過關希望增到值.最新結餘正179.5元.

 主要是石油,液化天然氣,煤炭,全部加10%至15%關稅,油氣仍是中國唔夠用的資源,但有俄羅斯,中東等國可以替代,另外又管控鎢第25種稀有金属及相關技術出口,關稅戰誰能笑到最後還說不定.做好自已,發展高新生產力,能自給自足,超前部署,誰怕誰.好戲在後頭.

 中蕊創歷史新高最值得高興,贏大錢事少,見証從0到1事大,從1到10也必然會發生.今天連中特估都開車,恒指大升也是必然的.AI應用繼續熱炒,輪到AI眼鏡2276康耐特今天大升,創完新高後根本冇物跌過,至於6682,1860繼續升升升,升完又跌些少,轉頭又升,好不熱鬧.

 地大人少的加拿大,面積大過美國,人口唔夠4千萬,擁有大量天然資源,過去長久受到好朋友兼鄰居美國照顧,國内7成貨品及能源只運往美國,成單一大客戶,貿易盈餘越來越多,靠賣天然資源都可躺平收錢.絕對是活在舒適圈中,如今面對好朋友兼大佬反面同你計數,過往食喝玩樂全部大佬照,世上邊有甘著數的事,出得來行,預左要還.侵侵睇死加拿大二仔底,冇料到,憑甚麼同我鬥？杜魯多呼籲國民抵制美國貨,只用加拿大貨,相信都是得過講字,幾分鐘熱度而已,唔飲可口可樂,改飲貴成倍的加拿大可樂,唔幫襯Costco, Walmart,加拿大又冇替代品,成個生活模式,消費習慣都俾美國企業牽住走.一度被形容為世上最宜居地方的加拿大,若經濟搞唔掂,通脹高企,走向貧窮,幾最宜居的地方都會令移左民的人掉頭走.

有個成日喊打喊殺的鄰居,巴拿馬只能屈服,退出一帶一路協議,減少侵侵口中所謂的中國控制巴拿馬運河的可信性,由始至終,擁有巴拿馬運河首尾2個港口營運權是長和旗下的和記港口子公司,而且還剛續了新約,根本不代表中國.相信下一步就是踢走呢間公司,揾個借口斗零唔賠反過來索償都重得,李首富對住侵侵可以點,完全冇計可施,同中國關係又近乎不相往來,可謂内外不是人.長和股價已跌穿40蚊,係好平,而且股價不是急跌,是天天陰跌,幾時是底冇人知,長和系股份都係避之則吉為上,無謂博.

 黑盤高開底下,短炒愛股6682第四範式,1860匯量科技一樣俾10%升幅俾你賺,最誇張係雷軍隻金山雲3896,升夠30%以上.春晚19個宇樹機器人大跳秧歌舞令人眼前一亮,原來配置左優騰聚創2498的雷達,隻野又升10%以上,優必選9880相對升得保守,最落後軟件股是354中國事件,真係大升的都是真科技股,981變左炒股,大把位俾人炒,不過炒還炒,一定要食胡,不斷出出入入,真金白銀入袋,一定會有低位俾你買番,跟住又升,做多幾次T,贏100%絕非難事.星期三A股才開市,港股的中特估最好今明天跌多些,星期三北水又會趁低狂掃.感覺今年真的會出現中升西降局面,侵侵周圍辣火頭,盟友隨時變敵人.今天港股隨時倒升收場.

 侵侵一上台,就立刻清洗民主黨高度崇尚的DEI作風,diversity, equity, inclusion, 多元,平等,共融.強調大愛包容,個餅劃到好大,有如人間樂土,政府帶頭在招聘上要有一定男女,種族,膚色比例,大企業也要政治正確,増聘左一大班人,再加埋甚麼ESG等多種無助盈利的使費,對於侵侵呢種大商家,早已看不過眼,一上台就退出世界氣候組織,唔相信地球暖化,立刻炒左環保署千幾人,又推出肥雞餐,吸引聯邦僱員離職,若唔走,遲d搵個借口炒哂班人都重得,乘機清洗民主黨勢力,搵自已友頂替.侵侵得4年時間俾佢改革,時間已不多,若搞唔掂民主黨,下届俾民主黨執番政,美國就會不斷内耗,自已搞死自已.

就快落台的杜魯多,面對侵侵對加拿大進口商品徵收増加25%關稅,能源只加10%一事,採取反枱措施,宣佈對美國總值1550億加元進口貨同樣増加25%關稅,並揚言此舉會令大量美國人丟了工作,美國的通脹也會急升,一向以來,美加長期存著貿易逆差,去年1至11月,加拿大輸美貨品高達3772億,中國也只不過是4014億美元,排第二,排第一是墨西哥,4667億美元輸美產品.之前的美加墨自由貿易協定已經被侵侵認定是揾美國笨的協議,美國在特朗普首任期間,出口的美國貨被人收左6000億美元關稅,而家第二度任職美國總統,一定會以商人逐利心態施政,對民主黨之前的做大佬但要俾d靚搵著數的作為十分不滿,現在首要是搵錢,過往跟車太貼的盟友可能成為最大的輸家.美國的農產品,肉類,生果大部份來自墨西哥和加拿大,而鋼材,木材,能源則靠加拿大,加拿大一年近4千億美元產品輸美,美國產品輸只有千六億美元,同樣是加25%關稅,相信加拿大會更加多人丟失工作,最好笑是加拿13個省中,有幾個省話即時不再入口由美國共和黨執政的州份的酒和產品,民主黨執政的就照買,早前企錯邊下注民主黨會贏,侵侵敗部復活,重唔有仇報仇.若加拿大日後搞唔掂經濟,唔駛打仗,加拿大成為美國第51個州絕非天方夜譚.