看山是山看水是水

 這是紐約時報12日刊登的一篇文章標題,難怪侵侵甘仇恨紐約日報,成日話佢係民主黨的打手,左膠上腦,只識造假新聞.今次對皮褸黃窮追猛打,口誅筆伐,誓要打殘佢.皮衣黃令全球皮褸收藏愛好者蒙羞,大條道理,講到佢十惡不赦,最大罪過可能是令皮褸價大幅下跌,今年7月,一件美國名牌Tom Ford的黃仁勳親筆簽名的黑色皮衣,在蘇富皮拍賣俾人以96萬美元買左.

巴巴跌穿9字頭,企鵝跌3個幾點,2隻成交額都是頭2大,資金在砸盤逃命,傻散在用埋最後彈藥去溝貨,數不清的蟹貨在路上.珍惜生命,遠離恒科.要活命和長期能留在股市中博弈只能買高息央國企.

 升的又是權重的內銀3桶油電訊煤炭電力公路碼頭另加消費等中特估,跌的就是升左唔少的科技股,中特估有高息可長揸再加上散戶唔會買,只會買刺激的真假科技股,但見過鬼怕黑,唔敢再長揸或加槓桿去持有,有一定升幅就會鬥快走,跌完再買過,所謂的版塊切換都是看股價,升得多就會回,跌得多就會升.而中特估就波幅不大,但行的是慢牛,股價不會大跌,但走勢是持續向上,叠加持續派高息又可頂住個指數.

蒙牛升穿20蚊後,每天只是升少許,唔覺唔覺今早又升多10%,升到22蚊.10幾蚊時佢已不停回購,央國企不停回購都是在覺得股價太過便宜,為免股價太低要市值管理,以免在班中排名太低,交唔到成績,回購完成後或持續回購,過一段日子後,股價就會上另一個上升階段,就算唔再升,起碼都唔會碌番落山.中遠海控,中石化就是長年都回購的代表,尤其是在股價不振時就會回購得更多,股價唔跌時就買少d,最終股價都會有頗大升幅甚至創新高.近期發覺拖拉機同華潤飲料開始持續回購股份,38是剛開始,起初還嫌棄佢唔積極,隨便回購極少股數當交差,但呢幾日回購力度大增,由每天回購4千股逐日大增至40幾萬股,短短幾天已回購左0.3%回購上限.而2460就因股價升左同回購左唔少,呢2天回購的股數反而少左,但股價仍是在上升中.

只要不是在高位才走去買,長期持有的感覺確是十分之爽,財息兼收之外,更周不時有大特價時段俾你加倉短炒揾真錢落袋為安,剩下的平貨底倉就繼續雷打不動在大幅浮盈下收高息,電力同公路呢d有剛性需求的國有資產,絕不容許股價大幅下跌甚至國有資產流失,分别只是你買的是管理良好的資優生或是行業的包尾生,贏多贏少的問題.電力股如836,902,1071等悶是非常悶,但股價是持續向上,不理指數上升或大跌,都唔關佢哋事,擺埋一邊就完事.而公路港口電力等的潛在價值一直隱藏在相關央國企的資產負債表上,可透過發行reits兑現他的價值,人話是先收未來錢,把部份公路,部份地區的電力打包成reits上市,讓内地散户有份參與呢塊蛋糕.隻107四川成渝高速的A股,呢排股價已創左多年新高或歷史新高,去到7蚊人仔樓上,H股107還是在5蚊港紙左右上上落落,等一年派一次高息,未來3年,派息比率至少60%,盈利增就派得多,有數得計,每年至少3毫幾港元股息,股價升得太高息率自然會下跌,有大特價就是加倉入貨良機.若你是在個幾,2蚊,3蚊甚至4蚊買的並一直持有,你已經冇得輸,收息都收到傻,每年8至20厘股息,股價就算升多1蚊都大可不理,沽出後佢唔跌的話,等同炒左個唔駛出糧兼不停能為你揾錢的員工,炒左佢你去邊處揾番個如此人才,内銀,石油,煤炭,電訊等中特估的底層邏輯都是如此,能趁早上左車就已完事,無需努力,躺著贏,選擇永遠比努力重要,在錯誤的道路上,越努力死得越慘.

 坊間有不少打著獨立外匯黃金磚家的明燈,長期佔據財經媒體,以專業人仕形象推測外匯黃金走勢,又開班收錢教人炒外匯炒金揾錢.半年前,3個月前,甚至幾天前,在媒體前講的野都是一樣,短期美金會跌,金價會大升,油價會跌到60美元以下,但每次結果掉轉,都會話係時機未到,但好快就要到,憑我的經驗,我好有信心我的推測一定會出現.萬物都有限期,沒有限期的推測是冇得輸的,總有一天會中但唔知要等到幾時.見到佢出現,就知金價會瀬野,美匯會大升,今晩金價跌左百幾美元,跌到得番3800幾,真想見佢點兜落去.