看山是山看水是水

 今早一大堆央企創歷史新高或階段性新高,中移動,農行,長江電力,中海油,寧沪高速,神華,工行等等.2022年4月中海油回A上市,上市價不過是10.8元人仔,當時還有大量的内地散戶像比中海油更早回A的中移動一樣,抽中都唔要,棄權唔俾錢認購.今早中海油A股收市價你估是少？是34.22元人仔,A股上市時883都係在10蚊港錢左右,如今24蚊都未到,A股就34個幾,減唔減股息稅都會有大量資金落來買平好多的883,耐心資本才是大贏家,883升穿15蚊時有好多本地老散沽貨獲利,升到17蚊更多人沽,跟住883就係甘升,只有少數人肯認錯低位估高位買番883,我都多次講拿得住好股才是大勝之道,好好珍惜手中平貨與時間做朋友更是重中之重.就講平保呢間民企保險龍頭,經常做傻事,上個星期以均價4.4購入工行H股數仟萬,持有H股重上13%,但只佔工行發行股本不足3.5%,翻看記錄,今年2月,平保持有13.97%工行H股,但在同月,以均價4.175大手沽出工行,套現近40億,令持股量低於13%,低位賣出高位買回,都係買番部份,點解要甘做,多數係被國家引導做番正確的事.

 深圳北火車站空中的士站已營業,可搭載6人的空中的士,可飛往深圳市任何一個指定降落區,15分鐘更可直達中山,消費就盛惠6人共9千幾蚊.珠海市政府也注資落實大搞低空經濟,不能落後於大灣區其他城市,北京,成都很多大城市好快都會出現低空物流,低空載人等場景.早前沽出中國通號3969獲利轉投中車,趁3969重沒大爆升,都係要買番多少重回佢身邊,談吓感情,一腳踏幾船,做個渣男.財爺波今早在電台節目話香港要轉守為攻,配合國家搞創新科技,地產只要保持平穩,潛台詞係短期內不要大跌,慢慢陰下陰下跌,過往因供求關係而出現的暴升不會也不應再出現.賣地收入減少,唯有以用者自負,收回部份成本作彌補,今天地鐵已加價,公屋也準備封頂式大幅加價,日後不再派糖免租,急症室準備加價雖說是對付濫用者,大學學費已加雖說與財赤無關只是學費太過平.只要樓價和租金下調至合理水平,不再係過往瘋狂式上升,基層始終會最得益,世界上冇絕對公平,照顧大部份人犠牺少數人既有利益也是合理做法.少數過度進取,急於表現自己能力有多高的富人會消失,為數較多的偽中産會高估自己實力想更進一步作出錯誤投資決定而重回貧窮行列.

 中國中車上周五在A,H股同步大升,H股成交額更是激增.當天晚上,中車就出通告說出推出7款新能源加數字化的機車車款,涵蓋内燃機,電氣化電池,氫能電池機車,持航力高1.4倍,耗柴油量減7成,更可大幅減排二氧化碳和有毒的一氧化碳.在内地99.999%高鐵,地鐵,城際鐵路的列車都是用中車的,是壟斷性企業,已建成一套中車標準的產業鏈,無論國内外,.日後的維修保養和更換都離不開中車.其餘訊號通訊,列車輔助設備等業務則由其餘公司爭奪.現時内地採用内燃機的列車有3成,主要是貨運,運煤炭,鐵礦石等大宗商品,其餘7成則是載人的電氣化,新能源列車.大規模設備以舊換新當然包括火車,更明令大批快到期的破舊内燃機列車在2025年前必須全部更換,而在2035年更要内燃機列車成為歷史.明天港股無市A股照開,除非反高潮見光死,否則中車明天在A股會大升,我也不是春江鴨,1766也不是上星期五才買,早幾日已提早買入,主要是人民日報早幾日點名大讚中車,中移動和中石化,另外少量讚許中海油和聯通在新質生產力的貢獻和突破,所以才買入讚得最多的中車,相信會有好消息跟尾.結果呢5隻股份,除了中石化升得較克制外,幾餘4隻都升得相當多.

 如一早寫好的劇本,中移動入左A50指數後,股價會不斷上升,中移動A股今日升左近3%,收107.45人仔,中石油大升6.5%,可惜中海油未入指數,3隻電訊股,中石化,神華升幅都在2至3%,四大内銀各升個幾巴仙,甘就可撑起個市,升幾十點,縱使最權重的貴州茅台同中國平安天天都在跌,都阻擋唔到指數上升,重有一隻中國船舶,升左7.5%.其子公司中船防務317呢個零月升到上天花板,但成4百幾倍市盈率,明知會都買唔落手,前身是廣船國際有人話係做潛水艇的,轉左做軍工股中船防務後,變左造船,但唔知是否重有做軍艦,不過母公司中國船舶就成為全球造船之王,過半的新船都是他造的.講番941,若在4,50蚊買左大量中移動的朋友,未來年真係可印印腳享清福,股價已升左一大截,重有上升空間,年年有5蚊樓上股息收,講緊收10厘以上股息,根本無需要再搵股炒.

 ATMJ跌跌不休,央企中特估升過不停,一念天堂,一念地獄,中特估就算下跌,好快就會升番上來,選擇永遠比努力重要,選對股,站在風口上,輕輕鬆鬆每天躺著數錢,央企指數除了十大權重外,11至23同樣有大量寶寶藏,昆侖能源,中國中車,華潤燃氣,中國電力,中交建,中外運等等都是具大幅上升潛力,但買不了甘多,前天沽3969換中車算是成功,中車升幅好過中國通號,揸耐少少看吓可不可賺多2至3成.

 剛看完國新投資出的通告,說央企港股紅利ETF下一步將會在香港上市,吸引持有港元,人民幣或美元的投資者購買,進一步顯現央企的價值,成為穩定港股的壓艙石,但冇仔細說明是再出一批新的ETF,還只是這三隻ETF,呢3隻規模加埋都係34億,應該唔夠賣,應該會有規模更大的ETF出現,央企指數ETF由國新投資制定,選取50隻在港上市的央企標的組成,但不包括内銀,因不是國資委管理的公司,但華潤同招商局是國資委管理的,所以呢2間央企的子公司招商銀行同華潤置地都有份入選.國新投資又指出在十天的認購期間,央企指數大幅跑贏恒生指數.似乎是在暗指恒生指數的組成是何等不濟,他日港股央企ETF大規模在港上市,相信冇人會買2800,國內散戶可透過港股通買入,本地散戶又可買來收高息,唔駛逐隻高息央企分開買,一次過買哂50隻,三桶油,3隻電訊,2隻煤炭,2隻電力已佔權重7成以上,為了令產品更具性價比,這批央企一定會増加派息,而持有大量人仔和美金的中東土豪,東盟商人,也會因高息和高穩定性而買入央企ETF.而港股日後可能會出現一奇怪現象,一邊是央企局部大牛市,另一邊恒生指數長期熊市唔識升甚至微跌.

 國新投資參與首發認購的3隻港股央企ETF今日正式成立,3隻ETF規模都只是34億元,平均每隻11億幾,國新就算認購一半都只需17億元,剩下的17億就俾散戶爭崩頭去認購,反應應該良好,相信類似的H股ETF陸續有來爭住上市,年息率7厘以上,國内根本冇其他金融產品有如此高回報,20年至50年的超長國債,年息2點幾厘,過仟億貨都俾人掃清,國新買番全是國資委旗下公司的H股ETF,本質上就是買入H股收高息,是百分百耐心資本,日後就算港股大跌,只要用少少錢増持H股ETF,就可令在港上市的央企不跌甚至上升,但就救不了其他股份,如ATM,地產股之類,想令港股更平穩,只有等待恒指公司加重央企在恒指的權重,冇理由一間市值萬幾億的央企,權重得2至3%,反而市值得幾千億的公司權重可以去到6至8%,這一天早晚會來.