A股史無前例13連升,成交放量大增

 今日A股成交大増至2萬八千幾億,已是十三連陽,連續升十三天,自A股開檔以來首次.升穿並企穩4千點也僅是第三次,第一次2007年是升在山頂時,當時平均市盈率50幾倍,企業營收増長48%,無以為繼的代價就是大跌快速碌落山底,第二次2015年是升在山腰,當時市盈率18倍,營收増長16%.今次升穿4千點是升在谷底,平均市盈率16倍,營收增長只有0.63%,只要踢走更多垃圾公司,如長年冇盈利又唔派息被強制退市,而又嚴控垃圾公司上市,指上市目的純為劃大餅和宏大敘事而拉升股價,跟住大幅減持收割小股民,而另一方面要更多龍頭公司變大變強,長期有穩定持續盈利又重視股東回報持續分紅和回購,另外再加上有長期資金不離不棄,在谷底慢慢向山腰,山頂穩步前進,保障唔會出現爬得高跌得深的景況.若A股真如高盛預估今年會升15至20%,A股今年就會見5千點.而A股同港股已成命運共同體,升跌就算不同步也不會相差太遠.若相信中港股市都會行慢牛長期上升模式,就要長期,全倉或幾乎滿倉持有優質股份,不要以為自已骨骼精奇,天生異禀,是天選之子,像開掛般能在最低位買入,最高位逃走而持貨不足甚至空倉等機會.一早有貨在手,股市大升才關你事,拿得住才能享受到時代紅利,財神要送錢俾你使,你都要拿載體去接先成事.就如上星期,恒指累積跌超過1千點,一大堆自稱從不持有任何股份的磚家財演,苦口婆心,異口同聲叫大家唔好全力入貨,睇定d,揸住現金,唔駛心急等機會,等確認跌完先逐些買,通街平貨任買偏叫人唔好買,待3天大升1千點收復失地後,就說既已錯失機會,就無謂高追,要買都要等到跌到唔知甚麼位才買,低位時唔買,升左又怕高追,到升完再升,磚家話睇圖已確認轉勢會不斷升時,先至走去買,跟住就被綁,到時磚家又會話,嚴守止蝕,跌10%就要蝕住走,結果蝕住走後股價就大幅上升,大部份韭菜就是如此練成的.止蝕論都是簡單數學題得啖笑,買10隻股票,若有5隻或更多跌10%就止蝕,本金得番1半或更少,剩下的股票要升多少才能打和,要有盈利難度更高,除非是高手或是量化,經常出出入入又動不動就止蝕就是來股市做善事送錢俾人使的.