唔怕悶夠耐性可考慮3996中國能源建設

 呢隻央企中國能建同另一隻在A股上市但冇在香港上市的中國電建是能源基建孖寶,做哂國家指派的任務,國內國外的新能源基建都做,未來幾年內要完工的萬幾億雅鲁藏布江項目,一定係佢2兄弟負责興建同設計,但有冇份成為此項目的股東就至今沒有披露,建成後就會成為規模,盈利多過長江電力幾倍的印鈔機,若有份就不得了.3996年内低位0.9,元,之前由0.5元升上來,幾個月前借西藏水電站喪炒到1.8元跟住大幅回落,在1個1毫幾至1個2毫幾橫行,幾乎天天得一格上落.此股市值遠比中國電建低,A十H市值唔夠500億,H股百零億,A股300幾億,一年做萬幾億工程生意,又要研發新質生產力,1年都係賺幾十億,A股股價是H股的2倍,派息比率得2成幾,PB低到殘,現價3厘幾息,近期股價最低都係1.17,而且是一瞬即逝,應該係跌冇可跌的底位,就算知係谷底,但彈又彈唔起,最多升到1個2毫幾就停,就算未來有大升幾倍的潛力,但唔知幾時先至升,息又唔高,得個悶字,唔怕悶者先好買.我一個月前試過在1.19元買入少少,足足悶足2星期先等到佢升上1.25元,拿拿聲沽走佢,今天大跌市,佢都係跌一格,收1.19,去番我上次買入價,但我沒買番,一來幅度太少,二來又唔知要坐幾耐先至有少許升幅,浪費機會成本.此股最新搞作是政府搵埋銀行以極低息借錢俾佢,要佢起一個全球最大的氫能項目,年產80萬噸綠色氢氨醇用來循環發電,總投資296億,第一期25年底投產,頭幾年收益歸政府,之後才獨自享用,而氢氨醇的發展也在最新的能源規劃中指明是重點項目.今天一衆冇盈利的氫能股大升,唯獨有盈利的3996唔升,上海重塑能源2570一度升7成,收市升近4成,其他如2582國富氢能,9663國鴻氫能,2402億華通都逆市上升.不知是否一日貨仔或是年收入萬億新題材新跑道有排炒.還有隻賣飛股2039中集集團,早3個月唔知點解日日升,日日回購,估佢係海洋經濟相關股,由4個幾天天升少少,升到8個7至停,我都係在8蚊頭走哂,近月已逐步下跌至7個幾,今天A股中集集團漲停,H股又大升10幾個巴仙,上番8蚊樓上,據聞又是關儲能事,可以用儲能令船隻運行,可能又走左寶,呢隻野到今天仍然不停在回購H股,應該有些散户唔知的利好因素存在.