阿里巴巴擬買入前身為怡東酒店的甲級商廈港島一號作總部之用

 在2019年被英資文華東方拆卸改建成甲級商廈的怡東酒店,今年才落成,叫港島一號,由置地管理.怡東酒店我曾留下唔少腳毛,過去經常幫襯他的㗎啡廳和自助餐,價錢相宜兼環境一流,為左賺更多錢拆左佢改建成25層甲級商厦真是可惜,但事與願違,落成之時碰上甲級寫字樓供應過剩,租又租唔出成燙手山芋之際,難得遇上阿里巴巴有意購入最高13層自用並擁有大厦命名權,而出價只是70億,2萬零蚊呎買入全新甲級商厦確是抵到爛,70億對巴巴來講只是毛毛雨小菜一碟,都唔夠打一場燒錢的外賣大戰.而阿里巴巴本身是九倉時代廣場的大租客,租用10層樓面,若成功買入港島一號並將之改名為阿里巴巴中心或其他名後,九倉將是最大受害者,冇左個大租戶,好難揾番過同類租戶.英資也逐漸淡出本地寫字樓市場,之前證監會買入太古的鰂魚涌多層商厦,及後又有港交所買入交易廣場第三期,現在就輪到大型中國巨企阿里巴巴插旗,天要下雨,娘要嫁人,大勢是不可逆轉的,相信只要有買家,英資如太古,置地的商厦都會賣而不是過往的只租唔賣的狀況.腦海中又想起樱花樹下一句歌詞,如有天置地門外,乘電車跨過大海......明日花昨日已開.有時聽到是成碟青瓜過大海.