看山是山看水是水

 褲王楊釗篤信佛學,其持有的上市公司393旭日企業因轉型轉得早,不再投資房地產,買房債,改在低位去投資高息内銀股,收獲滿滿之餘,不忘捐贈多少出來給本港各大學,因此今年三位獲頒大紫荊勳章之一,表揚其做公益造出的貢獻.身為393的小股東,自然替他高興,更希望佢派更多息俾小股東,雖然過去2年派息已派到爆哂錶,派息比率講緊係2百幾巴仙,賺一蚊就派近3蚊俾過你,雖然大部份都係派番俾自已家族,是真金白銀靠收息得番來的,不是靠借錢番來派的,既然係甘,不如派夠300%,股價1.29,一年派夠毫3子都唔過份,若果真如此,我就多一隻可收近20厘的高息股,而且可能可收多數年.

 財務自由定義只是由擁有的資產制造出來的現金流足夠覆蓋全年支出,就算全年躺平唔做野,或㨂工做,都可活得輕輕鬆鬆,資産唔包括自住物業,已供完拿來放租就計.簡單公式如下：假設你居住的城市,1個人或成家人一年使費只要10萬元,只要儲夠25倍使費,即250萬元,就可透過投資,如買股票,債券,房地產物都好,只要每年收益不少於4%,就每年拿4%出來維生,250萬,1年4%回報就有10萬,1年要20萬生活成本,就要有500萬,如此類推,根本唔需要有幾多千萬才可做到,若回報多過4%,你的本金還會不斷增多,理論上到你離開地球,剩下的錢會好大舊,此學說統計,其實不一定要有25倍儲備,因為人到老年,使費並不會如想像般多,若投資得宜,本金越滾越大,根本不需要拿4%出來生活.fire 粗略又分lean fire, regular fire, fat fire. fat fire已無需討論,因已是富豪級,不是財務自由,而是財富自由,錢多到唔駛計要駛幾多.一般人的fire都係介乎lean fire 同 regalur fire之間,lean fire 就係嗰種勉強達標,入超市買野都要看價錢,看有冇優惠才買,若有子女,就只入讀公立學校而非國際學校,看醫生有時都會用政府系統,搭飛機都會搭廉航之類,消費都係要左計右計,避免超標.本金夠多或回報超哂標,就可進化成外出食野唔睇餐牌價錢,仔女讀國際學校,出外旅遊可使豪d之類.近年的確多左人在40歲前做到fire,特别是單身的,若早一些準備好, 避免過渡消費,及早儲蓄和投資,要做到25倍於每年總使費,都不是遥不可及的事,再者一早已初級財務自由並不是叫你不工作,而是已換取有選擇工作的自由,大可㨂鐘意的才做,為興趣工作就不再是偽命道.

 A股今天繼續有市升的全是銀行股,蕊片股,創新藥股.内銀股早2日稍為調整後,好快又掉頭回升,還要升突,建行A股中午收9.68人仔,升左2.57%,財政部千幾億溢價入股只是9.06人仔,5年内禁售.國家隊一日唔沽貨,想跌都難,睇唔過眼又打又打不過但又冇胆中途加入者,就只能天天唱淡,動搖已持貨者信心.已持貨者就不必理會噪音,繼續瞓響度數錢,現在新買入銀行股的主力已擴散至地方政府,地方國資委,升左好多的江蘇銀行,大股東兼實控人已變作江蘇國資委.

 港股通全日成交1340.78億,佔港股全日成交55.35%,淨流入52.2億元.淨買入最多939建行9.57億,981中蕊7.15億.淨沽出700騰訊3.26億,9988阿里巴巴5.51億.

 今天收到3983的股息,本想把股息再買入,除淨股價好像1.89左右,但今天竟已升上2.1元.令我的如意算盤打唔響,3個月前曾出盈警,話去年盈利會大跌55%,但盈利都有10億樓上,若扣除前年出售特殊項目收益,盈利實際只是下跌10幾個巴仙,股價也因此逐步下跌,出埋業績符合盈警預期再加上大減派息,股價一度跌到1.7才停止.個七左右的3983其實十分吸引,息率已達7厘幾8厘,若股價唔升除完淨後隨時1個6毫幾都買到,前年派近2毫子股息,去年就派13港仙,而每年盈利都在10億至10幾億之間,派息比率5成幾,视乎盈利每年拿5億幾或更多出來派息,已確認是一隻能長期每年派6厘以上或更多股息的股份,國内好多貪心的散戶更是看中他手中每年不斷増加的現金,淨現金多達120億人仔,成間公司市值90幾億,A股冇上市,H股市值得30幾億,其餘由大股東持有,坐擁巨資但又不拿來拓展業務或投資,全部拿去4大内銀做理財,早幾年還可以有2厘幾3厘回報,現在有1.75厘回報已要還神.主要做的尿素生意是穩賺不賠,是農業必需品,受國家政策導向,不可暴利,去年更因國家要確保國内有充足的供應而禁止出口到國外,令到尿素價格下跌而影響盈利,但這不是問題,尿素價格有升有跌,今年年中已開始允許部份可出口而令尿素價格上升.早前在海南島舉行的業績講解大會,好多内地散戶專程從全國各地前往出席,目的就是要求分多d錢俾佢地,但換來有俾輕視的感覺,答問會只匆匆答幾條問題就散場,對於為何大把錢唔分多些錢給小股東,換來的答案是以備不時之需,再加上一句在港股中能長期派6厘幾息已很不錯,潛台詞係已對得住你哋,勿當自已好重要,只是小股東,有些公司連問問題的機會都冇,只能坐在房間看直播.是否好官僚,是的,唔鐘意大可沽貨離場,但我相信他們不會,為左有穩定的高息收入,沽左找不到替代品,只能在網路上吐嘈,大罵一番,甚至話會去國資委,中紀委投訴云云.鬧就照鬧,貨就照揸.我就因買在低位,已收左好多股息,只望唔好升甘多,跌多些俾我低位再加d,此股PB0.5唔到,就算官僚到極,都要響應國策,進行市值管理,提升股價.上星期同是國企的同行297中化化肥,巧立名目以上市20年為由,突然派發特別股息给小股東,雖不多,但都有2厘幾3厘,297錢又冇3983甘多,母公司又根本唔同級數,都肯俾d糖給小股東.3983管理層可能受到思想教育或良心發現,話唔定某天會派小小...

山東艦航母群將會訪港,開放給香港市民參觀.9月3日習主席又會檢閱大型閱兵典禮.種種績象都是要向全世界展示中國軍事力量,而中國的軍備在技術和制造上已全是自給自足,更開始侵佔國際市場份額,軍工股是有前景和成長性.港股的軍工股數來數去都係得2357中航科工同317中船防務2隻,股價不是已升太高,但總體都是向上趨勢,2357多次升完就跌穿4蚊,跟住好快又會上番4蚊樓上,4蚊樓下或4蚊買,升10個8個巴仙又可走一轉,等待回調再買入,若短期如2個月內能做幾次T,都有2成幾3成回報,安全得來又可輕易達成指標.

原名林廣昌的炒股養家71年出生於上海,大學畢業後進入一間國企,一做就做左14年,但因不善交際和玩辦公室政治,一直都不獲重用,多年都只是小職員,但家有年邁雙親,妻子和一對年幼子女要供養,只能做著刻板又看唔到前景的工作來養家.之前他從不炒股,只是運氣好,偶然機會下買股票,那時是2006年,A股狂升至6千幾點,股市小白只要夠勇胡亂買都會賺大錢,他也因此賺了近50萬,同年他工作的國企因有新業務在新疆開展,要派人去開荒,豬頭骨無人想去,呢d好野就落在他身上,上司強制性迫佢去新疆,念及上有老下有小要照顧,離鄉別井放心不下,加上嬴左50萬,全家身家已有90幾萬,心想辭職唔撈,憑炒股都可維生,於是打爛自已隻鐵飯碗,準備炒股為生.但好景不常,憑運氣賺回來的,都會憑實力輸回去,好快A股大幅回調,90幾萬輸淨40萬,他也自知認知不足,潛心苦修股市的走勢和變化,希望悟出能戰勝股市的心法,但她妻子已看不下去,與他大吵一頓,下最後通碟,要佢搵野做幫補家計,否則離婚.當年他已38歲,已找不回當初收入的工作,揾左幾個月都揾唔到工,最後被迫出賣勞力和時間去做苦力,消瘦了十幾斤和提早變老.妻子不忍見此並知丈夫仍不甘心,决定俾次機會佢,俾十萬元讓他再炒股,若再失敗就要永世不再掂股票.他就由此十萬元起家,不知是運氣再降臨或是已悟出真理,幾個月就由十萬變40萬,跟住幾年間就俾佢滾到盈利十億,成為遊資大佬,更在2019年被邀往清華大學演講,講自已的炒股心法,但他強調他的心法只是暫時可領先,但不是真理,世事一切皆會改變,人類所知其實極渺少,根本就冇永存的真理.其實佢個6大條炒股心法的觀點,大部份都同西方的權威專家雷同,有好幾個更是在炒股養家的心法公開後,才開始著書立論,可能是觀察的事情觀點一致,也有可能是抄功課.炒股養家至今仍是活躍於股市中,善於補捉市場,行業趨勢和成交量,還有廣大散戶的情緒變化而作短線炒賣,講得難聽d,其實是專收割認知不足的散戶.

 又係Morgan Housel 呢條友仔,出完本Psycholy of money大賣之後,又整左本Same as ever出來,同樣勁受歡迎.趁無市無聊極透,又買唔到周董啟德演唱會飛,2來又唔想看到年近5張的杰倫已無復當年勇,唱不出當年的水準,雖然看的人大都是抱著回憶過去伴隨成長道路的點滴而來的,不會介意唱成點.扯開話题,啓德體育園開幕至今,舉辦左的所有演唱會,有一半觀衆都是來自內地,也是能搞活香港消费的其中一樣優勢,澳門雖已飲了頭淡湯,香港現在起步追趕也不遲.講same as ever, 書中分23個章節,講左23個故事同見解,不是用來預測未來會發生何事,而是講23個一如既往般會重覆發生,有可控預期的事情.得閑過頭可閱讀一下,應該都會令人行少d冤枉路,早些達到想到的地方.其中一節講貪婪同恐懼的轉換,我覺得最有意思.作者引用心理學大師榮格講的對立轉化理論,見證股市中貪婪和恐懼的轉移,當人們相信好環境是長期持續的,起初會對壞消息視而不見,跟住忽略,接着否認,隨後不得不恐慌地接受,接着會認為有排衰,此時對好消息又是視而不見,忽略,否認,最後又接受,最終又返回原點.就甘如此不斷循環.如何應對,作者認為有2方法,第一接受瘋狂,更瘋狂的事都會發生.第二,覺得（夠了）,就反向而行.

 作者在引言好老實,講窮人應著重儲蓄,稍為有錢或富人應著重投資.雖講得有點涼薄但確是事實.書中指冇較可觀的起動資金,就只能量入為出,在不影響日常生活質素情況下,有閑錢就合埋眼不問價持續買入,不必強迫要儲多少,但若出花紅或加薪,就要把加薪和花紅至少一半拿出來買指數基金,因不會影響你生活質素,如其把錢花在沒必要消費,倒不如持續買入,越早越好,目的是攢存更多的股數,作者經過所谓的精準歷史數據和分析,確定只有指數ETF是會長期向右上角的走勢,但個股就唔敢包,大量上市公司會在股海中消失或一跌不起,一旦棟錯股會一鋪清袋.作者最反對在等指數最低位時才逐步買入,一來你不知何時才是低位,就如假設你有1百萬,遲遲唔入場,俾你等到低位,先至買入5萬,剩下的95萬還是在閑置着,持續買入的人就經過累積買左1百萬,日後指數上升,盈利總比買在低位但只買左5萬元的人多好多,若拉長時間,如S&P指數,派息和升幅更不知是幾多倍.確是事實,就算是香港的2800,長期持繼買入都是回報很好的,因你不是一次過在3萬幾點全部aIl in,只要持續買入,2萬點又買,14000點又買,唔駛上番最高位,你都係冇得輸,當然有更多的高息港股指數ETF會是更好的選擇,持續買入的最終目的是持有大量的指數ETF,永不担憂會執笠消失,長期為你帶來派之不盡的股息,股價大概率也會大賺,只要你趁年青早些持續買入,才不會錯失低位買入的機會,更可享受他日大爆升的果實.講到尾,都是時間和複利帶來的後果.

本周北水淨流入283.81億元,較上周上升75%.全周累積成交6828.21億,較上周上升24%.過去7天,北水淨流入最多為939建行54.1億,981中蕊49.1億,3690美團21.11億,1788國泰君安國際17.78億,1801信達生物14.52億.淨沽出最多為騰迅55.27億,小米47.66億,阿里巴巴34.5億. 

 港股通全日成交1538.73億,佔港股全日成交55.93%,淨流入30.37億.淨流入買得最多係939建行13.4億,981中蕊6.3億.沽得最狠淨流出的都係嗰3隻1810小米32.5億,9988阿里巴巴7.97億,700騰迅7.7億.股價越升就沽得越狠,小米借新款車又平又有20萬輛預購的消息高開7%以上並破歷史新高,跟住就俾人沽到升幅大幅收窄.呢3隻恒指權重股,北水要沽到幾時,賺夠先收手,真係唔知道.可能換馬到其他版塊.今天北水又用左幾十億元出出入入炒賣256冠城珠寶,最癫時升1倍以上,跟住就大幅回調,收市升3成了事.

 不久前匯豐披露増持的美的股份在19號已達5.9%,今天又披露在23號,持股已由5.2%減至4.72%.由於已低過5%,之後若再沽貸就不用再披露,估唔到匯豐都係跟大勢,跟散戶一樣,有得賺就走.睇番佢個持倉,持貨超過5%的股份不多,長擺唔走的有持63%恒生銀行,40%H股交通銀行,擺左幾年冇郁的有國泰航空,名創優品,遠東宏信,海爾智家等.重有少量相信已瀬野中伏如李寧,跌到甘,只能長期持有做長期股東.

 港股通全日成交1672.11億,佔港股全日成交63.89%,淨流入52.86億,已是連續第22天淨流入.全日都是以買貨為主,沽得最多浄流出得一隻700騰訊5.71億.浄流入買入981中芯8.96億,1801信達生物6.75億,939建行5.82億,308中旅5.3億,9988阿里巴巴4.83億,1788國泰君安國際2.59億.北水成交越來越大,今日已佔港股全日成交近64%,政府庫房有呢班財神長期關照,應該好快冇財赤.

 由5月1日到昨日為止,北水一共沽左700億元的騰迅,阿里巴巴和小米股份,金額比同期被沽出的另外400隻股份還要多,呢400隻股份加埋都係得520億,700,9988,1810絕對是北水全力沽貨對像.而同期北水淨流入左870億元,若扣除呢3隻沽出的700億元,5月1日至今北水實則大幅流入港股1570億元.春節後個一波由deepseek帶動的升市,呢3隻野都係升得最多的,北水已部署割韭菜,等緊人接盤,要沽貨當然不能一天就完,最好越升越沽,唔升就慢慢逐日逐日沽,呢3隻畢竟不是中特估,沒有在内地上市更不是高息股,國家隊資金同長線收息投資者是不會買來長擺的,買入者都是買入後求賺差價而鬥快走,低位大量買入後,就會獲利沽貨,直至股價跌到夠一定幅度才會買回,再籍好消息或等好消息拉升股價等待高追的接盤俠幫手.但為何美團北水就不停甘買入,只因之前升得太多,升到200蚊樓上,北水不停甘沽,沽到得番120蚊左近,就開始補回,之前在高位一路沽一路鎖定利潤,跟手在低位又再收集,等待大升又出貨.至於北水覺得幾時巴巴,騰迅已跌夠再買上,真係冇人知,點都好,千萬不要在高位追貨,就算一眾磚家講到天花亂墜,點好點好,恒指升佢地一定大升,會升好多好多,恒指由低位升左4千幾點,你睇隻巴巴升左幾多,跌得少已要還神,高位追入者只會覺得有買貴冇買錯,有9981注本錢的話只會不斷溝貨,直至信仰崩潰為止.真係點都要買的話,都只能等好低位至好買,最好是出現北水持續買入狀況就可跟吓車.唔好信甚麼偉大目標,如700先見700蚊,再上1000蚊,巴巴重上300蚊之類的故事.有夢想係好,日後成真都有可能,但以目前資金走向就不是那回事,大型資金都係在做緊波段上落,做番幾個大T,賺下差價,散戶只能顺勢而為才可活得更好.

 308下午繼續發癫狂升,成交20億,升左120%,北水玩物野？狂升總有理由吧,春江鴨先知我們散戸稍後才知？冇理由係中旅搞穩定幣,或是自由行遊客都要俾過路錢中旅使.從來只會覺得死左都唔知點解會死,現在最新認知係只要在塲上,贏到笑都唔知原因.

 今早升得最勁的不是因炒穩定幣概念而升左一段日子的165光大控股,而是長期唔識升甚至下跌,盈利極少甚至冇盈利,派息極少的308香港中旅,國資委一再要求旗下央國企要解决嚴重破淨問題並有所行動,PB為1看似簡單,要短期達到有點難度,増加PB只能以市值管理提升股價,強如中移動,中海油這類每年盈利千億以上的大央企,PB都是剛過1字頭少許,之前還有大堆有盈利或蝕緊錢的國企PB只得0.2至0.3,不要奢望佢地短期上番1PB,股價能升5成至1倍,PB也會升番上0.6以上,對國資委或小股東都有交待.冇盈利323馬鋼同347鞍鋼的股價在一年内股價都升左1倍以上,雖然重係破浄狀態,但已提升PB不少.隻308主要業務在香港,最賺錢係辦回鄉卡,但需求有限,冇可能有增長,反而搞左好多同地產有關業務,如買酒店等.最近政府出招救酒店,客許酒店免補地價轉做學生宿舍,中旅有可能因此得益.但今早大升6成幾原因是PB太低,未升前得0.2至0.3,平時成交甚少,今早竟然有5億成交,308入左港股通不久,可能又係北水傑作,我本有意埋伏308,但見佢近乎冇息收,又長期冇成交,就放棄,反而買左幾隻低PB的國企,好快有收獲,獲利甚豐已沽出,遺憾的就是買得太少但也是必然之事,現在只剩下1隻派高息,現在尚沒除淨,但股價已升左近1倍的1292長安民生物流,升左甘多,PB還是只得0.22,也是我遲遲唔沽的原因.連最垃圾的308都識大升,趕快尋找還有哪些低PB,又肯派息,冇點升過的國企,就算買左唔知何時先有表現,但起碼不會大跌,又有高息兜底,隨時有驚喜. 下午不知是何人,跳高16格買左1手1千股1292,令股價開升到3.16創多年新高,今早也是得1條友仔買1千股令股價上升,今早至今只得2千股成交,已經算多的,過去6個交易日,有3日係零成交,有一日得1千股成交,d貨都唔知去哂邊個手中,成交太少,有多少少貨的人想沽貨都有困難,反而可能被迫長揸收息,重好大可能迫你贏更多,隨時掉埋一邊唔理,再看番時股價已倍升或更多.

 港股通全日成交1416.41亿,佔港股全日成交52.89%,淨流入95.74亿.淨買入最多係俾佢地炒到單日升2倍的1788國泰均安國際16.62億,981中蕊14.25億,939建行8.93億,6060衆安在線2.43億.淨流走沽得最多都係熟口熟面的700騰訊5.52億,9988阿里巴巴4.66億,1810小米3.06億.

 2個星期前,已講左新華保險同中人壽共組的150億第三期股市基金會買的股份是A500指數的超大型權重股包括A股同H股.跟住問左人工智能大神會是哪些股份？答案是十大權重中,只有3隻同時在AH上市,分別是招行,美的集團同平保.呢2個星期呢3隻野都升左唔少,招商已經升爆左,300同2318就叫做追落後,新華同中人壽d資金都可能未入市,呢3隻野已被人包括外資先行買上.今天披露的公開訊息,美的同招行都被迫舉牌示衆,即某機構持有5%就要公開,5%樓下就買左幾多沽左幾多都無從知曉.首先美的俾滙豐銀行由持股不足5%買到持有5.9%,招行就俾摩根大通買到超過5%.而一向持有中國平安超過5%的貝萊德就進一步増持2318.是Al大神告訴他們要買,或是他們高薪請番來的硏究團隊嘔心瀝血作出的决定,普通的老散如我都可問Al提早得到結論,看來甚麼專門行業分析師好快會失業.就算在冇Al的年代,不合格的分析導致基金表現較同行差劣,都會被請離開,若大家都甘差,就鬥唔係最差個一位,間中有個别跑贏大市的就被吹棒,據統計,任何時間,全球80%的股票基金都係跑輸大市.想投資致富或増加財富,千萬不要信基金,靠自己信自已好過,信基金同掟錢落海冇分別.

 不是傳聞,港交所已出公告.難怪1788下午還沒散水,重升緊8成.

包括工中建農在内的大堆内銀A股持續創歷史新高.有些散戶留言十分抵死.同志們,打不過就加入吧,我雖然遲了好久才加入,但眼見内銀股天天創新高,讓我不停賺錢之餘還可以天天不停大罵内銀股不是東西,天理不容. 

風力發電龍頭,已完全切割火電業務,盈利持續增長可期.拜托財演門不要老是講電力股不可靠,會受煤價上升而影響盈利甚至出現虧損.風電,光伏,水電跟煤炭價格有啥關係？越多錯誤垃圾訊息越好,相關股份會升得慢一些,直至甚麼50天線升穿250天線出現黃金交叉出現後,就會像發現新大陸般,不惜打倒昨日的我,說已確認升勢可追入.今早又見一所謂圖表派磚家,推介工行,說符合哂物線物線,可看高一線云云.早幾個月就講基本因素唔好,圖表未出現買入訊號.股價大升後才拿幅圖出來講,正宗股跌看跌,股升看升的韭菜思維,股價持續上升的股份隻隻都一樣好鬼靚,鬼唔知阿媽係女人,有甚麼意義,更大鑊是股價已到頂開始回落,摸頂位先叫人沖入去,就唔係甘好.雖然大部份磚家都從不持有上述講及股份,只係齋講只是嗡吓,冇人叫你信.但現實中真係好多人見磚家一本正經,道貿岸然而不加思考信哂.

 2722做完路演後,股價沒有如估計般上升,甚至輕微下跌,但只是遲左2天才發力,今早升近1成,報1.24,不久前加倉的貨已有20%浮盈,繼續貪下去,冇50%盈利都唔考慮沽出獲利.

 券商股1788一度升60%,只因一個消息,指已獲香港證監發穩定幣牌照,超大成交下喪升.而一眾中資卷商股也全部上升,升得最少反而是合併後最大個隻國泰海通.連巻商股都喪升,不能不承認港股已是行緊牛市,只看是快牛或慢牛,快牛來得快走得也快,都係長期局部股份慢牛最好.

 内地高息民企雅戈爾只是賣恤衫,便服,24年盈利27億,其中22億來自投資,本業賺的不多,但已是業內龍頭,已經十分難得,再冇物増長空間.昨天公司公告已出售大量中信267和H股中信銀行,渉款40億元以上,佔公司資產10%.此公司在2015年大量買入港股中信和中信銀行,坐貨坐足10年,期間有被套住,也有上升回本時刻,但都選擇長期持有,至少揸10年,收足10年息和賺取可觀股價升幅才減持部份獲利.呢間公司長年派高息俾内地股民,是少有甘做的内地民企.去年底更以74億元超低價買入令亞里巴巴輸左幾百億的銀泰百貨,換左人做反而有錢賺.

 相信對準備長期持有如941,939之類的非賣品高息中特估的朋友,對於股價升太高反而不太高興,係甘意升少少就得了,升得太多除左少左意慾再加貨,更隨時把持不住手多多沽出,跟住股價繼續升買唔番,特別是在低位買入,而家收緊10厘或更高股息,股價升跌都唔多關你事,如在4個幾買入建行100萬元計,每年收10萬股息,股價升到6個幾,7蚊甚至8蚊沽出都不是沽出誘因,除非你是先知,肯定股價在你沽出後會大幅下跌,俾你買番,若在6個幾7蚊已忍唔住沽出,好大可能又會在7個幾又再買番,同自已銀包過唔去,1年有10厘息以上,股價又有近1倍容跌空間,靠收息都好快收回持貨成本,若揸得夠耐,好多揸内銀的人,特别是貎似物都唔識的長者,牛頭角順嫂,大家口中只識買廢老股的廢佬等,一早就零成本持有内銀,年年收高息,提供無盡的睡後收入,個個一年都有幾十萬股息收,少都有10萬8萬,有能創造更多錢的錢才是真正的財富,有更多的錢唔代表是財富,亂甘使,胡亂投資,或唔識正確運用,錢呢個工具會好快冇埋,連能制造財富的工具都失去,就只能再靠出賣時間做牛做馬去揾錢,但人生苦短,時不待人,無論是人是事,一旦錯過就不再.近日被網絡神曲你看時間等過誰強力洗腦.歌詞太過貼地扎心. 你看時間啊它等過誰？你看那個人啊多麼可悲.   你看當初啊甚麼都不對,你看後來啊只會掉眼淚.

 港股通全日成交1212.61億,佔港股全日成交50.42%,淨流入25.95億.浄流入最多股份3690外賣仔7.85億,981中蕊7.24億,939建行6.93億,1801信達生物5.99億,9992泡泡瑪特5.26億.淨流出沽得最多為1810小米15.51億,700騰迅9.45億,9988阿里巴巴7.51億,883中海油3.42億.

 港股市塲將會是內險境外投資的首選,今早中人壽,平保的股價已升唔少,連日創新高的新華保險繼續升不停,這些内險會來港股買物野,一定係會長期派息的股份,除内銀外,具壟斷屬性的央國企是主要標的,也是俗稱的中特估.平保早幾年投資失誤,把大量資金投入同房地產相關的高息債卷,股份身上,搞到幾乎沒頂玩完,股價也腰斬一半以上,尚幸迷途知返,1年前已開始大量買入高息内銀H股,確保每年都有安全又穩定的回報.慢慢塡番之前用來埋葬自已的大坑.股價一定會升得比同業慢,但都唔會再跌到甚麼出樣.港交所400蚊樓上多獲利沽盤,短暫跌穿400蚊後,就重返400樓上,只要有低位出現,冇貨的可以考慮買入,有貨的繼續揸.只要北水成交持續場加,大量内地公司排住隊來港上市,恒指大升或大跌,佢都會受益,港交所就像一間拿正牌的娱樂塲所,提供平台,地方俾金融消費顧客來消費,顧客之間之嬴輸唔關佢事,他只負責抽水.只要環境好,吸引更多顧客光顧,佢就可越揾越多.

 之前建行以溢價增發A股以提高資本充足比率,接貨的是中國財政部,發行價9.06元人仔,共115.89億股,禁售期5年.當時建行A股8個幾,今天A股建行收9.45元人仔,939就收7.8元港紙.就算要割人韭菜都要等5年後,況且機會應不大.收足5年息之餘,股價大概率也會慢牛式上升,更主要目的是要籍此股穩住指數,應該會超長期持有.這也是内銀股近期不停上升的主要原因.

 港股通全日成交988.34億,佔港股全日成交49.76%,淨流入78.95億.淨流入買得最多是3690外賣仔15.15億,939建行8.44億,981中蕊6.78億,9992泡泡瑪特4.12億.淨流出沽得最多是9988阿里巴巴12.86億,1810小米3.18億.

除左中行外,另外五大行再加一衆銀行共14間齊創歷史新高,是誰在買？中央匯金和國家隊資金一早買夠貨,冇必有再買,冇買内銀股但買左一大堆甚麼白酒股的散戶,已視内銀股為萬惡根源,天天大鬧冇天理,為何白酒股已跌左4至5年,股價已腰斬過半,說甚麼現價股息率已高過銀行股云云,為何大家唔買反而走去買内銀股,事實是過去一衆白酒股被炒到天甘高,估值高到離哂地,當時買入者的股息率只有厘幾,買來的目的根本不是用來收息,只是寄望泡沫不會爆破,股價繼續亂甘升.跌左好幾年,股價腰斬,但估值仍然好高,現在的所謂高息是由股價大幅下跌而跌出來的,若未來盈利繼續跌,股價跟住跌,再大幅減派息,到時還是所謂的高息股,已買左好耐兼是高位買入者,真係有苦自已知,如100蚊買左1隻股份,股價跌到得10蚊時,派4毫子息俾你,10蚊時買入會話正啊,有4厘息,好過買内銀,100蚊買左的人,收緊幾多厘息？一個唔好彩,假若盈利再大跌,股價又跌一半到5厘,派息再減一半,得番2毫子,到時重係隻4厘的所謂高息股,唔同的係又綁住班10蚊時買入的蟹民,收緊2厘息,股價還已跌一半,就算股價5蚊已見底唔再跌,但股價唔升,你要收多25年息先至可以返到家鄉價,來股市玩,用25年時間來求返家鄉,只要唔輸就當贏左,似是來做扶貧公益活動多過是想獲利,至於個d左1百蚊買左的,就唔好指望返家鄉,當輸左好過,只買左一注還好些,輸哂都有數計,最慘係唔服輸,不斷溝貸企圖尋底個班人,溝到彈盡糧絕,永不翻身.至於是甚麼人在狂買内銀,離不開各内險同公私募基金,點解要買,最大原因是具確定性,國家幾乎已背書確認會長期穩定派息,就算股價已大升,但仍然有3厘幾4厘,是稀有的國家資產,至於持相反意見的,如内銀爆雷在即,有數唔清的壞賬,會減派息之類的言論,講左十幾二十年都未停過.但從沒發生過,只要不受噪音影響,晨早買左内銀股的人已經係冇得輸,一早本利歸還.

超過10隻内銀A股今早再創歷史新高,包括建行,工行,農行. 大量冇買入内銀的人天天在罵這類股份股價升得太離譜,早晚會大跌.股價是離譜地高嗎？低PE,PB細過1,更重要是國家隊資大量持股,不會做拉升股價跟住割散户韭菜的事.反而那些高位買入過百倍市盈率,股價已升左好多倍股份的人,就覺得冇風險問題,每逢見内銀持續上升,自已手揸的高危股就不停下跌,就會發洩不滿,自已做得唔好,都望人家PK.投資心態遠比遠比操作機巧,技術重要得多.大量韭菜也是如此練成的.

 這本書講的是財富,貪婪,幸福三者之間的平衡.金錢只是三者互相交換的工具.無止境追逐金錢會帶來危機,不懂知足,會減低風險意識,過度高估自已能力,動不動show hand, all in,甚至加槓杆,一旦遇上巨大黑天鵝,就會完蛋,這本書已是幾年前面世的,若現在大量在濒死邊緣的富二代早些讀左呢本書,相信目前環境會大不同.作者第一條建議就是達到財富目標後,就要停止再追逐金錢,要有謙卑,知足的心態,更要有謹慎防備風險之心,而非以為自己天下無敵,加大注碼去更進一步.第二條建議是要做睡得安穩,一夜能眠的長期投資者,用時間同複利效應去收成.第三條建議是不要和社會作比較和較量,投資是你個人的事,有自已的目標,犯不着執意是否跑贏指數才算成功或失敗,更無需要戰勝市場上90%的對手才叫叻仔,證明自己聰明過其他人是沒必要的,能長期留在市場兼有財富増長的才叫真正贏,今個月贏100%,下個月輸番50%就打回原型,跟住每個月再輸10個8個巴仙,輸多幾個月就萬劫不復,這也符合巴菲特的投资戒律,一定不可令本金虧錢,巴老也不是買物升物,也經常買錯野,但只要賺得超多,蝕的蝕得少,整體是赢,有時甚至回報率低過指數回報,但時間複利效應是他最大武器,財富只會越來越高.第四條是不要過渡悲觀,他以截至2020年,170年内的美國股市表現作分析,這170年間悲觀主義者絕對正確,出現過多次股市大暴跌,跌幅超過10%的就有103次,4名總統被行刺身亡,天災人禍不斷,期間上市的企業百95%已消失,但股市始終是一直向上的態勢,悲觀主義者永遠不敢入市,只會做定期,直至等到所有利好因素出現左,才會入市,而多數是在最高位入市,做等人收割的韭菜.而樂觀主義者則負責賺錢,年年都話艱難,經濟不景,講左幾十年都好似冇物改善過.樂觀主義者入市,未必是在最低位入市,也要付出入市成本,就是要承受股市短期下跌帶來的震盪和帳面上損失,只要相信跌完就會上升,低位入市和不受股價下跌影響,只要長期留在市場内就一定會有豐厚回報.作者結論是要接受市場是一個混亂的世界,有人樂觀有人悲觀,只要找到一套適合自已又有效的投資系統就可以,你可以追求快感追漲殺跌作短線炒賣,也可以用可一夜安眠的長年複利效應方式長揸.作者明顯是傾向後者.

 原子習慣講的是只要每天進步1%,1年就會進步370%,愛因斯坦講的世界第八大奇績複利就會出現,若每天退步1%,就幾乎歸零.引申到只要每天做多少少好習慣,就會成長期性,如每天多做15分鐘運動,一定會減到磅,反之若天天有多食垃圾食物的壞習慣,就會變超肥,諸如此類.複利效應就由一名億萬富翁所寫,講的是複利會令人發達,人人都可做到,方程式是每月資產都有増長十持之以恒复投再加上最重要的時間,得出的結果會令你難以置信.他舉的例子是你和你的朋友會獲得一項獎賞,選項一是馬上俾300萬美金過你,二是第一天只俾1毫子美金,之後每天以100%增幅俾你,為期31天,你諗都唔諗就㨂馬上要300萬美元,你朋友就選一毫子日計,你會覺得你朋友是傻仔,5天過後,你老友只是得1.6美元,你還是揸住300萬美金,完全唔擔心自已㨂錯左,10天過後,你老友都係收左51元多d,20天後,你朋友都係得5千幾蚊,你心諗過多11天就到期,而家重嬴緊你幾百條街,冇可能會少過你老友,但你不知第20天正是臨界點,5千幾蚊起步,倍升十一天,埋單會收到千零萬美元,收的錢係你的3倍幾.帶出的訊息是複利起頭難,只要捱得住初頭的苦楚,跟住就會否極泰來.看似是呃細路,但實際是可行的,只要不是甘極端,要求連續31天每天都要升1倍,1毫子起跑31天後會變1千萬甘戲劇性,改為1百萬或更多起跑,每年10幾個巴仙増長,多年後都會有滾雪球效應,慢慢變富,但前提是起動資金不能太少,除非你好年輕,又夠長命,有足夠時間進行複利效應,甘少少錢起步都可以滾到好大舊錢.我貪得意走去問Al大神,假若我只有一百蚊投資,揾到一項目,每星期會有20%盈利增長,甘18個月後同24個月我會有幾多錢？答案係年半後會有1490萬,2年後會有1.8億元,但結論是現實中不太可能有能長期提供如此高回報的投資項目,除非是龐氏騙局.其實我心中覺得馬會是最有可能的平台,特别是足球,不像跑馬,馬會只是抽佣,永遠只會嬴錢不會輸錢.足球則是對賭,馬會有時是會輸的,馬會的足球投注,由早到晚24小時都有得玩,一星期起碼百幾二百場波任你玩,一星期賺20%輕易而舉,只要不是場場都參与,1百蚊本,專㨂99%會勝出的賽事或相關注項,賠率越低越好,1.2倍回報的波一般人都唔會買,1.1樓下更冇人問津,一星期買一至2場達標就收手,除非你買左個1%出現黑天鵝的赛事,撞到都只是冇左1百蚊,難就難在要...

最近無聊得很,無所事事,痴起條筋,忽然熱衷於閱讀,看番d所謂經典著作,不是想扮文化人,實則自已仍是俗不可耐,還未達到無慾無求的出世境地.這本書又是一個西人寫的,作者是經濟和心理學專家,攞過諾貝爾經濟學獎,斷估d理論都不會係亂吹,有一定參考價值.呢本書面世左20年以上,之後一直長期佔據最高銷量榜入面.自問英文程度尚可就看英文版會更明個中真意,中文版就因翻譯水平有所偏差,唔夠精準,中文版書名多叫做快思慢想.作者首先設定人腦有2個思考系統,姑且叫佢做1號系統和2號系統,1號系經是人們最愛用的思考方式,如受一些根深蒂固的認知所左右,如人家問你1加1等於幾,你會立刻答係2,完全唔會用2號系統,1號系統是指快速思考而作决定,2號系統是指要經深思熟慮才作决定.作者舉左一個簡單例子,問左在名牌大學就讀如哈佛,普林斯顿,麻省理工的學生同野鶏大學學生同一條問題.一條棒球棍加埋個波一共值110蚊,但支棍貴過個波100蚊,甘個波值幾多錢？大多數人會答錯的答案10蚊,若個波值10蚊,隻棍就是100蚊,何來會貴過個波100蚊,正確答案應是個波值5蚊,支棍值105蚊,其實條問题並不複雜,只要用2號系統去思考,用簡單的數學代入法計算,就唔會計錯.調查結果名牌精英大學有一半以上的人答錯,普通大學答錯的人更高達8成以上,說明思考方式的錯對同讀書多唔多冇太大關係.最可怕的是有人用左一些錯的認知去思考,但又用左2號系統去計算,以為自已已深思熟慮,冇犯錯,冇計漏野,例如用來做投資决定一定冇得輸,往往這些人結果會輸得好慘,甚至點解會輸都唔知,因為他們只會找一些利好自已觀點的資訊來圍爐取暖自我安慰,而對一些持相反觀點的真實資訊視而不見,充耳不聞.這只是書裏開頭的小部份,有時間睇完成本書會有更大得著.我始終是個凡人,停左一個星期的本地馬賽事明天又重開,又係時候要度下馬仔,明天揾馬會出糧俾我使.

 港股通全日成交929.7億,只佔港股全日成交41.8%,過去5天全在5成幾,但今天港股大幅反彈,意味著有外資趁低入來買貨.北水今天淨流入27.93億,流入買得最多仍是939建行6.9億,其次是981中蕊5.29億.浄流出沽得最多排頭位仍是騰訊12.34億,接着是泡泡瑪特6.55億,3988中行6.49億,中海油5.28億.3988中行雖被北水力沽,但本周跌幅不足0.5%,應該是部份人或基金賺住走换馬至其他股份.

剛在6月2號除淨,每股派8毫半股息,息率十幾厘,2510在除淨後已快速填權,十幾厘息的台灣航運股,只要不信航運股是周期股,非常唔穩陣,不可沾手之類的偉論.無理由在今天資產荒底下,十幾厘息的股份冇人吼,今天就一棍升35%俾你睇,升到股息得番8厘幾.好多已除咗淨的高息股都已快速完成填權或快速地進行中,實則股價已是創哂新高.我個集郵倉裏有好幾隻,如152深圳國際今天已收到0.598元股息又唔駛扣股税,今天收7.6元,實則已是8.2元,已是一年新高.又如393旭日集團,影子内銀股,已填權成功,派左5.8仙股後,又上番1.29元.呢d股份,全部都係在你睡覺發緊春夢時,都會為你不停揾錢的股份,要好好珍惜,唔好手多多以為是高位,沽左後可在低位買番.

 被北水連續大幅淨買入十天八天的939建行今天又升近3.3%,完全收復昨天跌幅,工行曾再破1年新高.呢2間行有6間有份參與内地與香港的轉數快即時跨境支付系统,其餘4間本地銀行為匯豐,恒生,東亞,中銀香港.内地則為六大内銀.今個星期天生效.南向跨境支付每天不設上限,但全年不能超過5萬美元,即39萬,北向就每天上限1萬,每年上限20萬.話就話是用來交學費,水電煤,管理費,同小額匯款,但邊駛交甘多錢,甘樣玩法擺明係合法放多d冇50萬入場費做港股通的北水老散落來開戶口做即時跨境買港股,嬴左錢又可以螞蟻搬家方式每天一萬匯番上内地,由於全年有39萬元額度,唔駛再做特種兵,每天合法地運2萬蚊落來,難怪匯豐前天出公告話沒有停止為内地居民開香港綜合户口,歡迎他們親身落來開戶,但最好在網上搞,以免人手應付不了.現在港股每天成交,港股通已佔5成幾,若加埋呢d隱形北水,日後港股每天成交隨時6至7成來自北水,本地散户若喜歡短炒,就要適應同理解北水炒股的作風,話哂都係主場,冇理由俾佢地割韭菜,應該割番佢哋至啱數.内險股新華保險已升到近40蚊,中人壽升左近5%,平保永遠都係行得最慢個隻.

 杭州銀行,浦發銀行,南京銀行都創歷史新高,其他內銀也絕大部份升幅不俗.港股中的光大銀行又是多年新高,4大内銀都收復昨天的大部份跌幅,内銀總不能天天都升,間中回調些少完全不是問题,反正是買來長期收息的,而非買來賺差價的,要寄望這些内銀大幅下跌俾人上車的機會也十分渺茫.隻浦發銀行可惜冇在香港上市,現在要打造上海成最牛的金融中心,身處上海的浦發銀行一定佔盡先機,發過豬頭.中移動在2010年投資浦發銀行,入股2成以上,經過多次送股,持有股份佔比被攤薄,但現時仍持有18.18%,1股未沽,收左十幾年股息之餘,股價還要創歷史新高,中移動同樣肥過豬頭.近期杭州6小龍龍頭大哥宇樹科技完成C輪融資,帶頭投錢佔最多的是中移動,其餘跟隊的就是騰迅,阿里,吉利,螞蟻.他日宇樹的機器人造到成熟,而轉化成盈利而上市,股價大升之時,中移動又會發過豬頭.前不久中移動又用4百幾億被指定獨家以溢價買入郵儲行增發的新股,成為第二大股東,中移動同時也投資左好多其他公司,甚麼行業都有,9成9都是大賺特賺,已搞不清他是甚麼類型公司,只知她有能力持續每年幾個巴仙盈利増長,又能把盈利75%分給小股東,已足夠支撑股價慢牛式持續上升.

 港股通全日成交1188.61億,佔港股全日成交54%.浄流入買最多的股份為1810小米4.96億,939建行3.7億,6060衆安在線2.78億.淨流出沽得最多是700騰迅13.09億,9992泡泡瑪特8.35億,9988阿里巴巴2.06億.今日北水已停左繼續買入外賣仔,今天已變作淨流出少許,騰訊已被沽到500蚊都穿埋,但重係沽緊,巴巴冇左北水持續買入後,掉轉頭沽貨,沽吓沽吓股價就跌到110蚊邊,隨時又要沽到100蚊才收手.939建行跟大市跌,但北水仍天天大手増持,天天都在十大成交榜上出現,而且都是淨買入,不是沽貨.

 前任村長在23年陸家嘴論壇提出要搞好中特估,無耐現任村長吳清就接手,而呢批中特估股價就一路狂奔,升到而家還沒有出現停止的勢頭.一早信村長一早全身投入中特估行列的投資者,已經享受到極豐厚回報,不管是A股港股,只要是在開初買入,根本無需理會指數升跌,自己行自已的大牛市.今次村長講話又有物野提示俾大家,最重要係準備俾一批暫時沒有盈利能力的創新科技企業在科創版以第五套規則上市,而業務指定係做人工智能,生物科技,商業航天,低空經濟.而國資委也一早引導國有資本早投這些中小型獨角獸,而且要投得多,最好做埋主要持分者,既然央國企已有大量資金流入這批企業,村長開綠橙俾佢地上市也合情合理.其實香港在18年已先行替國家試行18條,即是允許冇盈利的生物醫藥股來港上市,不同的是當時的基石投資者絕大部份都不是國家資本,而是見好即收割的巨企.正因如此,呢排B仔股在上市後初段升左一大輪後就開始漫長跌浪,跌8至9成比比皆是,但經過6至7年的硏發同經營,好多公司已修成正果,硏發有進展,開始有盈利,個別公司更急不及待申請除去B字標記,而在一年之間,已有至少4間公司從低位升左10倍以上,升一倍至幾倍更多不勝數,而家先走去追就一定有極大風險,早買的就已經享受緊收成.村長見到香港都可以令到呢類公司能修成正果,雖然途中要經歷孫悟空的72難,但最終都能開花結果.於是村長又要將呢一套搬番内地照做,不同之處是這類公司的主要投資者是國資,睇塲的又是村長,途中應不會有太多的磨難,只要走出幾間有貨交的企業,一早買定的投資者和散户可能到時又會贏到爆.

 呢本書係一個西人在22年寫的,以歷年美股市場為主導同研究,悟出股海的絕世武功,就是書名just keep buying,三個字買買買.呢本書係亞馬遜同類型書籍暢銷榜長期第一名,應該有d影響力.若唔想睇英文版,内地同台灣都有好多唔同的中譯版本,書名好似叫持績買進,持續買入之類.作者雖是以美國市場數據作研究而得出一些新理倫,放在全世界都是可行和有效的.好多觀點都是打破一些全世界都以為係對的,但實際係呃左你好多年的誤區.有時間可慢慢去看,會對投資有甚大幫助.長話短說,書中所講的絕世武功係人都可以練成,唔需要係博士,唔需要係金融專家,唔需要技術或物鬼圖表,只需要持之而恒,越早進行持續買入能為你揾到錢的資產,主要是股票,並將之成為習慣,目的並不是要揾天文數字的錢,而是達到真正的財務自由,真正的財務自由是可自由控制時間,做自已想做的事,而非被時間控制你一生.而要達到儘早做到財務自由,也無需節衣縮食,死慳死抵才儲到資本去投資.他認為節流是效用不大的,降低生活質素都唔會儲到好多,更會影響心理同身體健康,不要相信每天唔飲一杯星巴克,幾多年後你就會有幾多錢之類的鬼古.而投資方面,儘量不要集中一隻個股,甚至單吊.最好儘量買指數ETF,如標普500指數ETF,MSCI全球股票ETF.任何時間,就算在最高位買入,只要keep buying,儘量早些買入,收益不但會大幅跑贏大市,更會比那些長期等候最低位才買的人,就算俾你在低位買左,都敵不過just keep buying.

 港股通全日成交939.21億,佔港股全日成交52.98%,淨流入12.42億.十大成交股份中,只有3隻是淨入,其餘全是淨流走.浄流入最多是建行2.1億,山東墨龍0.27億,467聯合能源0.25億.淨沽出最多仍是騰訊6.13億,泡泡瑪特6.12億,港交所4.22億.呢3隻都是息率不高或是唔派息的股份,500蚊樓上的700,北水已連續沽左好多日,賺住走.另一隻400蚊樓上的388,今天開始獲利估貨,都係賺住走,9992更是任何位走都係賺住走.可能要等700跌番落400幾蚊,港交所碌番落380蚊,已沽左貨的北水先會買番.至於買來收長揸收息的中特估就會越買越多.恒指呢排上得番2萬4,都係靠權重的中特估頂住,一旦ATMJX就像今天全線下跌,單靠中特估都頂唔住,今天跌2百幾點已算小.

 今次陸家嘴會議,講一大堆如何鞏固中國金融市場的穩定,令中國在國際金融市場上更具影響力,上海也必成為金融龍頭,新建立的數字人民幣結算營運中心也設在上海,一系列健康,嚴格完善的證券監券措施也是以上交所為依歸,要在上交所新上市的公司一定要經過嚴格審查,確保是好公司才上到市,不達標的就請移玉步去香港上市.中國本身唔搞也唔信加密貨幣,但却容許香港搞穩定幣,加密幣.一切唔確定好唔好的事情都俾哂香港做,一來可増加香港收益之餘,又可為國家排雷,他日經實際運作下吸收經驗覺得有得做,中國到時才做也不遲.另外大量有好有壞的公司湧哂去香港上市,因香港是一個國際大賭場,唔保證來上市的公司的好壞,狂升或大跌都不會干預,只要唔出老千就可以.大部份來港上市的公司都是為圈錢和融資.但中國可不是這想,今日已講明企業在中國上市並不是終點,不是只為融資而來或一上到市就快速套現,卷一大筆錢走.企業上到市應是起點而非終點,要通過上市令企業長久發展並壯大.有這種意向和情懷的企業相信不多,想快速掠水走的企業就會被轉移到香港去.

 港股通全日成交1138.72億,佔港股全日成交56.33%,淨流入63.02億元,已是連續15天淨流入港股.浄流入最多是建行11.22億,阿里巴巴5.99億,泡泡瑪特2.71億,小米2.21億.浄流出最多是騰訊7.14億,石藥6.18億.

 剛查閱近期38的股權變動,發現美資富達持有2798萬股第一拖拉機H股,佔H股總數的7.14%.在4月尾以均價5.819増持左66萬股,在6月2日在均價6.515沽走呢66萬股.但轉頭6月10日又以7.065増持70萬股,今朝38曾升至7.7元,不知富達是否又趁高食胡.嗰2千幾萬股應該是長倉擺响度唔郁,應該係在好便宜時買入,趁股價跌又買少少做T,升10%就走,發現沽早左,又不惜以更高價再買入,呢d基金經理先至算稱職,不會買左就擺埋一邊唔理就收管理費,起碼都會做下T减低持貨成本.

 1個月前出左盈喜話盈利會增加5成,呢隻生産代理何濟公,保濟丸,飛鷹活絡油等多款中成藥,又大買廣告的股份已升左一大棍,1個月升左近4成,一年更升左200%.6月12日業績對辦,盈利大增52%,派息又大加1倍幾,搞到變左高息股,若來緊中期息又大増,息率會更高,昨天又公布以3800萬收購左一間擁有20間診所的中醫集團,今天股價再升5%以上,真是看少左佢的潛力,他的母公司雅各臣一樣都是長期上升趨勢,只是升幅冇2161甘多.2161升左甘多,現價率都有5厘幾,算幾吸引,但不了解香港中醫市場是否會有好大發展潛力.

 .已升左好多倍的泡泡瑪特,布鲁可,蜜雪等升左甘多,大跌已是預計之中,是一次過下跌,然後再慢慢上升,還是持續性下跌,跌回合理估值才停,再加上基石投資者一到禁售期,會盡抛手中平到冇朋友的股份,轉移到高位接盤的散户手裏,隨時綁住三五七年,又冇息收的苦日子,哪一種可能會大些,真不好估計.冇賺過這些股份大錢的人,就冇必要去撈底,邊度是底冇人知.今天新聞說河南天河機場截獲2名走免税通道的入境者,暗藏144套拉布布3.0公仔盲盒,供稱是受託從國外買入回國圖利,海關暫時不發還該批公仔.日後若當局覺得炒風熾熱,影響社會,隨時會出手打壓,單是盲盒已可被視作賭博,出海進軍海外市場揾哂外國人錢,當局會無任歡迎,更會視作文化輸出,不會打壓,但若把貨物回流番國内炒賣圖利就一定唔可以.

 257已除淨,全年派2次息,24年派23仙,其實已創1年新高.916尚未除淨,都已創半年新高.呢2隻野若在相對低位買入,已是非常穩妥的持續増加派息股.257在2個幾任人買的機會相信已好難見到,整年在3個零至3個7橫行,3個幾買入都還可以,收6厘幾息加不用扣股息稅,加派息的話會去到8厘以上,股價也會因此上升,令股價升後的息率跌番落6厘幾.可能已有資金看中佢,呢幾日把他買到4蚊樓上,2年前太保早已舉牌257,好似3蚊頭買的,買左股價都冇即時升,2年後已收左4角半股息,股價也升左近3成,這正是内險買入同所追求的東西.瑞衆人壽單吊狂買916也是此目的,買在低位沒人問津時.

 之前已多次講553是國企中腦機接口的標的,但盈利甚少,股價波動極大,如過山車般,見番2個幾機會可遇不可求,但在3個幾是常態,今早因隔夜一隻蝕大錢的腦機接口美股狂升238%,搞到553一度被炒上6蚊,之後升幅收窄至25%,報4.8.另一隻大升的是微創腦科學2172但似是走鬼格,升到高一高之後大幅回落,2隻都是超大成交,相信都是北水在出出入入.馬斯克的腦機接口業務重係在得個講字階段,幾時可轉化成盈利,成果隨時被中國提早超越.

 數年前,中國的糧食自給率只有6成,經過多年努力,出台各項政策,如保有18億畝農田的紅線不能觸碰,早年有耕地不用走去起樓的事不可能再出現,而年產13萬億公斤農作物也是最低要求,要達成目標只能發展優質農地,配以高科技,新裝備,新種植技術配合,24年已首次突破年產量14萬億公斤,全國糧食自用率已升到95%,距離自給自足已不遠.難怪央視新聞晚晚都大幅報導農業消息,甚麼超標完成播種,又不浪費地高效收割收成之類,更專题介紹如何操作智慧農地,又5G,又無人機播種洒水,專用平台利用大數據專人監控生長進度,又介紹新型農機如何提高效率,濰柴旗下的沃爾農機更是频频出現鏡頭前.但潍紫動力同第一拖拉機的A股冇物反應,農機只是濰柴的部份業務,不是全部,更已準備分拆農機業務來港上市.而一拖就只做農機,政府補貼農民做農機替代已是既定事實,第一拖拉機應該大幅受惠.H股的38一拖近個幾月已升左2成幾,之前因首季業績盈利下跌而導致股價跌落5個幾,而家除埋淨息又穩袋股價又升上7個7,計埋股息已是8元,現價才買好似遲左,追入是否值博就要視乎今年盈利會否如想像般好,有平貨在手者就繼續揸.至於2338濰柴,股價已長期在高位,所以升得較緩慢.最大憧憬是濰柴農機來港上市會否優先配給現有小股東甚至送,但相信機會唔大.

 港股通全日成交1278.17億,佔港股全日成交55.71%.淨流入57.43億.淨流入最多股份外賣仔11.15億元,939建行11.08億元.淨流走最多股份小米18.79億,騰訊6.2億,信達生物2.85億,百濟神州2.28億.建行過去5天已被北水増持左3.37億股,你覺得股價已升得太高沽出獲利,但在北水加持下股價越升越有,你覺得北水買甘多939是為左短炒定係買來長坐？

 1133已升到痴線,除完淨扣埋高股息還要一路狂奔,升到而家市值已42億,升到7個6就夠50億.要入港股通不一定是她狂升的主因,基本面轉好過去過度低估才是主因.若入左港股通,國內老散,傻散的資金隨時再將佢舞上天都重得.就静待看吓劇情是否如已寫好的劇本發展.另一隻2722重慶機電原來今天除淨,冇為意,又有股息落袋,呢隻野最近人事大清洗,舊有的領導層共4人全部消失,換上新的7位,19號開始一連2天搞路演,又住酒店又提供餐飲招待,介紹集團内最賺錢部門的現狀同未來展望,國企搞得呢d野,一定係覺得股價太低,想話俾人知我係筍盤,唔買就走寶,股價可望在路演完成後有較大的升幅

 從寧夏輸電到湖南,用的是沙戈荒方式,即是在沙漠,戈壁,荒漠的土地起風電,光伏發電站,然後以高壓特變形式輸往湖南,在十四五規劃中,總共有9條類似項目,今年是十四五收官之年,來緊就是十五五規劃,第十五個五年計劃.此寧電入湘項目是由龍源電力母公司國家能源集團負責,當然會益親生仔916一齊玩,兩母子拍擋齊上,另一參與者就是陀地湖南電力資源,23年開始興建,916有50%權益,每年能發電36億至40億度電,初步估每年會為916帶來20億盈利.投資916只能看長線,國有資產不可能會蝕本,一旦收成期到來,盈利和派息一定會大增,在盈利短期不是太亮眼甚至有些令人失望時,股價低迷之時才是收集良機,就算買入時股息只得3厘幾4厘,但一旦盈利強力増長,且不計到時股價會升幾多,單是増加派息的力度已會令你手中持有的916的息率大幅上升,隨時十厘八厘,待盈利被確認已大幅增加且盈利會長期保持在一定範圍内,股價到時一定會被人買上而大升,到時才追入可能息率都不會太高只得4厘多,你早人幾步,提早1至2年趁低買入,到時就會享受到長期收10厘息或更多的樂趣.916的A股一早被人買貴左,16個幾人仔一股,H股就只得7蚊唔到,沒有港股通户口的内地小散戶恨得牙養養,要買只能買A股龍源電力,買唔到916,但内險瑞衆就不停買入916,不理會股價高低狂買,買到已持有16.04%.北水就揸到52%.他們抱着的是長期持有收息心態,本地老散持股一個星期都嫌長,那會同你玩坐貨坐幾年等收成的玩意,他們還會認叻教你知唔知甚麼是機會成本,用同樣的錢去追逐成長股,升幅大的股份,回報會是幾多倍.但現實是一百個人當中起碼有90個不是輸到褲到冇,或是被深套,就算是甚麽輸10%就止蝕,止蝕多幾次,100蚊本金得番一半,就算日後俾你買中隻升5成的股份,都係番唔到本,重係輸好多,機會成本都是偽命題,赢就有用,輸就隨時連本都冇埋.

有人認為通縮的形成是貧富懸殊加劇,少數富人掌握大量資源和資產,越來越有錢,而中層階級為了跨越階級,也積極參與富人設定的遊戲規則去玩資產增值遊戲,而佔大多數的底層,一旦被壓榨得太勵害,連生活都成問題,何來消費意慾,不是產能過剩問题,而是想消費都不敢消費.過去幾十年少數富人持有的資產大多是房地產和勞工密集企業,即所謂的舊經濟,但隨着新科技不斷成長發展,少數富人也會大洗牌,原有既得利益者有些會因過度安逸,不求改變而跌出富人階層,被敢於創新早早進入新產業的人代替.進行緊財富大轉移,不論東方西方都是如此.香港過去十幾二十年更是如此,大部份人都把房地産不斷升值視作跨越階層的特快通道,若能知所進退,跟住食時代紅利,安份地短時間內指少於20年供完一層樓,而非以持有更多物業但又冇足夠財力為目的,妄求短期致富,如月入得3萬用盡槓杆借盡,月供2萬幾都唔怕,又是一堆出租有人會幫你供樓,只要樓價只升不跌神話不滅,買多幾間都重得,小中產小炒家一間起幾間止玩音樂椅遊戲,富二代甚至富一代若野心太多,是一幢幢寫子樓買,幾十個鋪位甘買,音樂突然停止,就會由天堂跌落地獄.香港就是遲遲不肯及早轉型,還沾沾自喜身為全球樓價最高,不吃不喝多少個十年才買得起樓.近幾年才撥亂反正,急起直追發展新產業,而非一味靠搞地產,遲係遲d,過程痛苦也肯定好痛,遲做好過唔做,傷疤始終有愈合的一天.未來想致富或跨越階層應不能靠房地產,用内地用語以股權思維代替房產思維,不能再追求短期暴富,而是買入偉大企業,百年老店,壟斷性央國企而盈利,派息穩定的企業股權,長期持有, 慢慢致富.只要這些企業能長期活下去,你是小股東,更可把收益承傳下去.現在一鋪養三代神話已幻滅,揸住大量幾隻高息好股可能不只養三代,更可傳承多代.

 重慶市成為消費最勁的國內城市,1至4月零售消費金額5385.43億人仔,超越上海成為消費之都.重慶市人口3190萬,2310萬人住在城中,889萬住在鄉村.人口比較多不是消費多的主要原因.比對香港數字,香港有740萬人,1至4月零售總額只有1237億港元,1月份零售額有353億,但到4月份已跌到289億.重慶人口是香港4.2倍,人工肯定低過香港好多,按人口比例對比,重慶市消费能力高過香港好多.且不談香港,為何重慶消費數字好過北上廣深,主要原因是重慶樓價只是北上廣深的八分之一,房貸壓力低,不受地產霸權掠奪,有閑錢剩,居民就算搵得少過北上廣深,但消费能力極高.第二是中國已把主要的工業搬哂去四川,重慶,而當地居民已不同往時,唔駛遠走去珠三角打工,死慳死抵唔消费,儲錢回鄉.而現在就可原地就業,原地消費,可消化大量勞動力,再加上甚少外省民工會西飄去四川打工,文職北飄往北上廣深甚至香港就大把.中央已投入大量資源去開發成渝雙城,現已漸見成效.難怪大量四川,重慶企業的港股股價表現好過同業,2間銀行1963重慶銀行,3618重農行升幅高過哂4大内銀,就連公路股,四川成渝升幅高過哂其他省份.業務集中在四川可多加留意,可能有滄海遺珠.

 早2個月重入港股通後,568都出現過2天升1倍的情況,好多人覺得北水是傻的,唔理真傻定扮傻,贏到可抬住袋錢走就一d都唔傻,陪佢哋傻的散戶只要不太貪心,一樣可贏大錢走但都唔知點解會贏.隻山東墨龍今早大成交下,20億成交升8成幾,回極俾人獲利走貨都有6成幾7成升幅.業務做石油開採設備,去年蝕錢,今年有冇盈利都係靠估.我的春秋大夢股196宏華都是做鑽探石油裝備,陸上海上都有佢份,幸好不是港股通,唔會一日升哂,逐日逐日升d最好,今早在只得百幾萬元成交下就大升12%,之後升幅收窄只得6至7%,股價已升上2毫子樓上,1年新高,較我買入價帳面已升左8成,距離升10倍又近一步,繼續傻吓傻吓揸落去,見證幻想成真.

 中航科工同中船防務因國內A股軍工股大升而跟升,升幅當然冇A股甘多,但4至5%升幅點都有,2357經常跌穿4蚊後就跌唔落,伺機又會上番4蚊樓上,都提供不少出出入入低買高沽賺少少的機會.6月16號法國會舉行軍事航空展,中國可能會成為大贏家.伊朗從來不用中國制戰機,只用俄羅斯.其他世界小國家,軍事實力隨時俾鄰國欺壓,有對等實力先可以講和平共處,中國正可提供機會俾佢地買平靚正武器.軍工版塊潛力無限.

三隻都識做部分核電設備,上海電氣2727都識,但股價唔聽話,人升佢跌,所以可看少隻,等佢日後股價起動先至介入.1133已鐵定跑出先贏幾條街,不斷創歷史新高,派完高息除完淨,跌都唔跌,又非港股通,但一樣照升.1072就相對升得克制,但其實H股己升得比A股特别多,等緊A股東電發力先至會大爆發,佢係港股通,北水一早揸左2成幾擺响度冇走,至於2722最有潛力再爆升,同1133一樣非港股通,股價由幾毫子升上來,消化下d獲利貨,再等超好業績再爆上,同1133一齊升到市值50億可入港股通為止.雖是一廂情願想法但確實正逐步行近目的地.

 最好伊朗報復埋美國,以色列就目標達到.美國已講趙伊朗唔關佢事,係以色列獨自行動.今次唔止係空襲核置施,以色列話重暗殺埋伊朗三軍統帥,幾個伊朗核子科學家,伊朗一定會大報復.大摩即刻跳出來搬龍門,話戰事惡化的話,伊朗會封鎖霍爾木兹海峽,影響全球航運,油價會升上130蚊美元一桶.聽吓就算,油價升跌冇人可準確預則到,只要買入的石油股能長期盈利,長期派高息,西方石油好,中海油又好,低位買入坐住收息一定贏到開巷,巴菲特不斷買入西方石油OXY,越跌越買,是他老左變蠢左,但人們又封佢係股神,成日話要學佢甚麼價值投資,但又極度看淡油價,是否極度矛盾,精神錯亂.

 世界立立亂,侵侵早一日已講以色列會郁伊朗,但制止唔到.怪不知呢幾日國際油價升甘多.

 北水全日成交1297.36億元,佔港股全日成交53.08%.大幅淨買入9868小鵬汽車7.67億,1801信達生物4.37億,939建行3.98億,康方生物2.2億.大幅淨流出9988阿里巴巴16.4億,700騰迅8.32億,1024快手8.17億,883中海油3.91億.

A500指數成份股中,十大權重股只有三隻分别是招商銀行,中國平安,美的集團是大型企業又高息又同時在AH上市的.非十大權重股就有十隻甘多,分別是工中建農四大内銀,三桶油,中國太保,中國神華,中國電信.重話係經過仔細分析,結合國策同影響力而得出的結果.呢13隻都是熟口熟面,大部份近期已升完再升,再有更多資金流入,可能股價重未升完,就算唔升,都唔會大跌.

 第一期鴻鵲新華保險同中人壽共出500億入市買A股,第二期200億元也獲批,現在到第三期,新華同中人壽各出115億組成規模230億的第三期基金,新華保險會以不超過150億入股,基金用來買A500指數成份股中的大型股包括A十H,得閑要問吓元寶有邊堆股份是高息又同時在AH上市,縮窄範圍,早佢一步買入,到時派貨俾佢哋或和他們長期持有共同富裕.第三期基金初步維持十年,買入股份後應該揸足十年,十年後再續期.

 我講的是196宏華,之前已多次提及為何買入.首先要重申此股是受國資委監管的央企股,應不是騙子股或坊間那些微信女推介股,我貪佢超級便宜又見虧損多年開始有盈利,就在毫零子買左些少,之後就不時有利好營運的官方通佈發表,不久前曾有一天早上大成交下升左25%,之後打回原型只升幾個巴仙收市,跟住的日子就每天升少少,2至3%,已由當時0.14升到今天0.189創一年新高.我是抱住玩的心態看吓呢d毫子股央企能否在短期內升10倍,大家千祈唔好學,也千萬不要買此股,無謂害大家有損失,換作是正正常常的央企,短期内已升左5成,一早食胡走人,唔食哂都食一半留一半,但今次就任性一次,為實驗就算冇息派升1倍都唔走,就毫不科學地估佢來緊的業績會好好,若估錯就投降止賺,若股價跌穿買入價就唔沽,坐到佢贏為止,因買得唔多,中途又冇加倉,輸得起,輸到佢執笠都唔怕,況且可能性不大.之前d馬鋼,鞍鋼等央企連年蝕到阿媽都唔認得,股價跌到得番幾毫子,變左冇息派又唔属於中特估的央企,但在加強市值管理的威力下,全部升番上個幾2蚊,若當時在幾毫子時無腦式買入,回報又係以倍計.今次一於揾隻196來試,看吓今時今日條方程式重有冇效.祝自已好運.

中央前2天已出哂文件,要深圳在人工智能和低空經濟上更進一步,成為世界科技中心,本身深圳已具備發展高科技本錢,華為,騰迅,大疆等科技巨頭均是在深圳落地生根造大造強,加上全國人才均來此城市尋夢和謀發展,使這座城市充滿活力.中央發左聲,各方也積極加以配合,務求在財政,人才,科技統一管理,加強成效.例如會在深圳加建多所高等院校,確保人才的延續性提供,在已發展的領先科技中,如已有300條載貨無人機航線在運行中,一年起飛架數已超過170萬架次,接着就要加大力度,同發展載人飛行器商業化,例如廣汽造左架似直升機多些的空中飛行汽車,要戌百幾萬一架竟選擇在香港首發,有人買都唔識點用同用唔到,除非深圳又整條低飛航線往來香港,香港又拿拿臨立法通過配合,甘就幾貴都有人買,就好似多年前周星星執導拍的環保笑片美人魚的劇情一樣,當年亂嗡的科技今天竟成真.至於財政上,國有銀行會大力支持暫時沒有盈利的科企融資和上市.昨天更宣布包括港澳在内的大灣區城市中的公司,可以以預託證券形式在深交所上市.面對如此形勢,香港應如何自處？只能加快發展科技,輔佐深圳呢位科技大佬,要取代佢應該冇可能,唔俾人嫌阻定已好好.唯一不能輸同可以發圍的只有金融呢一塊,一定唔可以俾深圳超越,香港若冇左國際金融中心呢塊金漆招牌,失去集資引資功能,就會淪為一個生活生平如2線國內城市的存在,到時憑甚麼可以高人工過北上廣深,樓價又憑甚麼重可以甘高.

 6月14日是侵侵生日兼美國陸軍成立250周年紀念日,個日侵侵會舉行閱兵典禮.但昨天,沃爾馬老板出錢在紐約時報刊登全版彩色頭版廣告,號召群眾在全美各大城市搞NO KlNGS DAY抗議示威.侵侵隨後在社交平台回應,若當日有人搞事,會強力鎮壓,因這已是叛亂行為,一定唔會手軟.侵侵多數都是大隻廣,若真係說到做到,美國真係已距離出現内戰不遠.

 河南省人口過億,是國內大省.民營企業出左三隻河南巨象,分别是胖東來,蜜雪冰城,泡泡瑪特.胖東來主力高品質同服務,在卷到死的超市中賺到死,員工福利也是超高的,全國最大超市永輝都要求助胖東來,幫手把分店逐步胖東來化,蜜雪冰城同泡泡瑪特更是殺出國外,成為國際名牌,股價更是升到冇人信,全世界都話是泡沬,早晚爆破.特别是9992,10蚊升到幾十蚊,大把磚家話危險,越話危險就越升,升到而家距離300蚊已不遠,是否泡沫幾時會爆破是另一回事,在幾十蚊買入同在2百幾蚊買入就是2個世界,前者全無風險可拿得住,若股價日後再倍升也不會錯過機會,後者買入就担驚受怕,升少少就會走都走唔切,稍為回落就會止蝕.而河南省的央國企也同樣不差,564鄭煤機已升到傻左,高息兼好多年新高.第一拖拉機也不是省油的燈.

 中海油883派6毫6股息俾你,而家升4毫幾,幾乎即日填權成功,昨日買同今日才買相差甚遠,若睇淡油價永世唔會買的就無需操心,但冇必要天天出來好心提醒油價只會跌不會升,跌到幾低都不可以買,就像從不會買内銀的就算在極低位時都會大力唱衰,甚麼壞賬多,會減派息,中國經濟惡化等所謂的善意見解,鬼古一講就講左多年都唔厭.倉裏幾隻中特估今天除淨,此刻股價全部上升,感覺十分良好.

 港股通全日成交1129.72億元,佔港股全日成交額48.04%,淨流入13.76億元.淨買入最多是建設銀行7.07億,美團3.7億,信達生物2.16億.淨沽出最多是小米18.32億,騰迅12.56億,阿里巴巴7.82億.

 呢幾年中特估已是大牛市,行左3年,揸得住唔走,基本上已做左股市大贏家,唔沽也不代表是紙上富貴,期間已真金白銀收左大量股息,如何運用就各有各做,進取的就逢低再吸,増加攢股數量,日後收更多的息,覺得靠收股息都收到可以躺平甚至擺爛的,就可以學人玩詩和遠方,若你已届40至50歲,就可去狂買20歲想買的東西,30歲想去的地方,雖然遲係遲d,也失去當初意義,但可以圓夢也是件美事.更大可用大量時間去博攬群書,中外都可,學埋書法國畫甚至中外樂器都重得.唐詩宋詞,上學時只是為考試而死記,根本不知當中含意,大個左為生活用時間去換取不對稱回報,學校永不會教你如何投資,只會呃你努力就會成功,設定左一條所謂好路俾人行,讀好d書,揾份好工,做到退休,就可以高人一等甚至可欺凌弱勢,嬰兒潮出世班老鬼就可以跟住呢條路而得益,遲2代出世如8,90後就可能瀬野,不懂提早投資,想做到老到3,40歲都會被嫌棄,揾得錢多,高薪厚職自以為中產,食物鏈上層但又不懂投資或儲唔到錢的群組,一旦被栽或被平價後浪取代,應該會好大鑊.最好做到蘇軾的心境,回首向來蕭瑟處,歸去,也無風雨也無晴.無論經歷大雨或陽光,都可安穩地前進上路.就像在股市裏,跨越牛熊,無風無雨地收獲滿滿.原本倉中又有4隻中特估明天除淨,分别是中海油,哈尔濱電力,華潤飲料,第一拖拉機,過埋今日,好快股息好快又到手.不要相信來日方長,來日並不方長,現實是世事無常.要投資就越早越好,已擁有的人和事要懂得珍惜.

 中人壽已連升多日,今天更一度升近5%,平保一如既往慢升,股價抛離幾條街的新華保險繼續狂升,完全唔知個山頂在哪裡,連券商招商証券,中金都被人炒上.順便一提中央匯金除左是内銀的大金主大莊家,最近更成為五家證券商,2家公募基金的實控人,大金融這一版塊已完全掌控,有價格發言權同定價權,股價合理價是多少才合理,只有中央匯金說了算.

 這是第三條疆電外輸,也是最大的一條.總投資286億,全程2260公里,新彊起步,途經甘肅,陜西,四川,止於重慶.全年能提供360億度電,相等於1千萬個家庭全年用電量,可強力保障到重慶有足夠電力供應.由於新疆地大風多陽光多,大都採用新能源裝機發電,減少碳排放.參与比計劃的運營商有2間,分别是華潤電力和華電,華電佔多d,華潤佔少d,投入服務後1071同836盈利應會増多,不是叫大家現在沖入去買華潤電力同華電,利申我有大量低位買入的836同相當部份零成本的836股份,而今天836除淨買入都收唔到息,若股價有機會非理性大跌,就可留意下看是否值得買入作長線投資收息用.香港遠離大西北,斷估都唔會輸來香港,否則揸住2隻本港電力股的股民有排震,但核電就唔敢講,一旦内地有足夠多的核電廠,就要開始提防,況且目前中電有5成以上電力來自内地核電廠主要是大亞灣核電站,而中電又有權益而已.一旦有新的更大型的核電站被規劃建成,又唔預你一份的話,本港電力市場就會起翻天覆地變化.

廣汽,一汽,東風幾間國企車企先後宣佈承諾會在60天内找清所有供應商貸款,一來可顯示財力雄厚,不會是汽車界的恒大,二來又可幫助民營供應商加快現金流流動,大把錢的華為一號汽車賽力士也玩埋一份,承諾60天内清數.大間的如比亞迪,吉利,小米,幾條小龍開始頭痕,不知有冇能力玩此遊戲,明明有能力又唔玩可能會俾人懷疑欠水,冇能力的只能我行我素扮無野,又或者東蓋冚西蓋頂硬上照跟. 最大車企比亞迪也不得不跟大隊同國家政策,同樣60天内找數,話響應國家促進汽車業健康發展,幫助中小企進一步發展,令供應鏈上下游企業健康成長.政府呢ー招是防止車企鬥内卷,為左市佔率不斷盲目増加生產,靠不斷擠壓供應商貨期換來緩解資金壓力,務求消滅對手同能令自已生存下去,甘樣做早晚出事.不過中國行的是計劃經濟加部份資本主義經濟,即是具中國特色的市場經濟,不全是自由經濟,為左國家利益,國民利益,政府隨時會出手介入化解大規模風險發生.要在中國賺大錢不是不可能,但要賺盡又不理國家整體体局成為富可敵國不受控制的怪獸級企業就想都不要想.

 全日港股通成交1248.68億,佔港股成交49.88%,淨流入75.9億.淨流入9.86億3690美團,7.62億1093石藥,5.2億1801信達生物.浄流走18.92億騰迅,8.9億小米,7.72億阿里巴巴,6.56億快手.北水還是大買醫藥股,狂沽權重科技股美團除外,但恒生指數幾乎冇跌,微跌18點,全因權重中特估持續上升,待北水獲利沽夠騰迅巴巴小米之類倒轉買回之時,而中特估又繼續升,恒指才會有較大升幅.

 不知是誰人,高10格買左1手1000股1292,也是今早至今的唯一成交,就令到股價升左近2%,創好多年新高,最好繼續甘玩下去,貨源歸哂邊,市值超低,又是央企,長期有盈利公司,低PB低PE,母公司稍為注入資產或俾多d生意俾佢做,盈利就會倍升,股價再升到幾高可隨意想象.我低位有貨,希望在除淨前不要再大升,等我收埋2毫子人仔股息至好亂甘升,免得我又把持不住做渣男又沽左佢,之後再狂升又要再次遺憾.我個名唔想係叫遺憾,叫知足會更好.

手中持有的金融類股股份如建行,光大銀行,重農行,新華保險,中行繼續升升升,升到開始懷疑人生,非金融類的中特估都是唔識跌,絕大部份都是持續上升.不含金融類的中特估央企高息ETF3437,除完淨後升左十幾個巴仙,大幅跑贏個別中特估同期升幅,上市唔夠1年,首年已派左7毫子股息,免扣10%股息稅,今年同以後好多年派息只會不斷増加.上市價10蚊,得2日股價在10蚊樓上,之後全在8個幾到9個幾上落,就算你是在上市價10蚊高位買入,但已收左7毫子息,現價都還有盈利,若在8個幾9個零買入,已財息兼收,但此ETF不是用來短炒賺差價,是用来短期快速收息收番成本同長期永續收高息.就當你均價9個幾買左1大堆3437返來擺,第一年已收番7毫子,成本會係8個幾,第2年若派8毫或更多,如此類推,好快就會靠收息都收回成本,股價升幾多都不用理會,就算股價他日升到20蚊時,派息只有1.7元,當時息率都係8厘幾,但你係9個幾買的,到時講緊係收近20厘息,若已是零成本持貨,更是瞓响床上d錢都會自動來揾你,呢d先至係真正的價值投資,永續派高息先係重點,就算1間半間公司出事都冇影響,全部50幾間央企同時爆雷像做你世界般停止派息,可能性是零.

 侵侵叫左十幾間大上市公司話事人開會,商討新生嬰兒計劃,計劃係為在2025年至2029年底出生的美國嬰兒,政府為佢地設立一個特朗普賬戶,注入1000美金啓動,跟住嬰孩的父母或監管人或其他人如嬰孩父母的僱主,每年上限可注入5000美元入落賬戶投資,只準買美國股市指數基金,直到個細路到18歲先可以動用該賬戶.到場開會的大公司老細紛紛表示全力支持,並表示會動用幾十億元長期為旗下僱員注資入特朗普賬戶.我之前多次建議應儘早為小孩定期投資高息的央企指數ETF如3437之類,到佢地長大成人就會有一筆可觀的資金,可以作更多人生規劃同選擇.唔知係侵侵條傻佬或者係佢的幕後智囊諗出來的,若日後侵侵被歷史定性為1條大傻佬,我豈不是又係1名傻西,我唔想做侵侵,我係我,同佢唔係同一類人.

 北水全日成交1145.54億元,佔港股全日成交46.6%,但只是淨流入7.17億元.浄買入最多是1801信達生物11.25億,美團10.46億,2015理想汽車4.52億,1093石藥4.08億,三生制藥2.65億.浄流走最多股份騰迅21.41億,小米14.52億,阿里巴巴9.4億,泡泡瑪特1.45億.北水已數唔清十幾日不停買入3690外賣仔,不停沽騰迅同小米,巴巴就日買日沽,沽的數量多過買的數量.另外就連日狂買醫藥股,隻石藥似是買來長揸收息,另外大堆港股通醫藥股,上唔到成交榜的,全部都大升,升十幾個巴仙有好多隻,近來北水特别鐘情醫藥股,唔理係唔係B仔股,可能1年内由低位升左10倍8倍的醫藥股都有3至4隻,所以繼續尋寶.

 泡泡瑪特今天市值一度升穿3000億,創辦人王宁持股市值200億美元,因此成為河南首富,取代牧原股份董事長的河南首富地位.而牧原股份己在5月27日申請以H股來港上市,牧原是全球最大生豬養殖商,第二至第四名加埋都唔夠佢多.24年養左7千幾萬隻生豬,劏左1200萬隻,賺錢多過泡泡瑪特,市值反而唔夠9992多,來港上市後市值應可反先泡泡瑪特.可能豬肉你唔一定要食,但潮物拉布布,哭泣寶貝等唔可以人有我冇,再加上唔係平貴問題,是朋輩身份認同問題,重係世界性潮流,呢個潮流幾時完結冇人知,只知股價自上市後已升左十幾二十倍,點到你唔服.

用左近4年時間,玩左4次以溢價回購小股東股份,跟住注銷,願者就賣俾佢,唔賣都冇所謂,第一次2.8元,第2次3個幾,第3次4個1,但當時小股東嫌太平,於是提升價格到5個1,最近呢次今年3月,以溢價14%每股3.11元回購3億幾股跟住注銷,上星期五宣布完成,雖收唔晒所有股份,但都收左近96%,大股東黃氏家族持股也由當初40%變左67%,連埋幾個高管持股已揸左近7成,4次共用左40幾億,期間派息只派左9億元,時派唔派,4年行動用左50幾億,同上星期五市值相約,市值60幾億但未完成注銷10億元回購股份,實際市值都係50幾億.同業1070TCL2年間由唔到3蚊升到9個幾.751明顯大落後,大股東已持左近7成股份,再回購股份已冇多大空間,最大可能是把準備回購的錢轉作派高息派番俾自已,不知是否如此,今天此股升左10%.60億市值的公司,賣家電年年有錢賺,還有2間全資内地上市子公司,做數子科技,市值成2百幾億,冇理由私有化,真係估唔到呢個家族收晒d貨的動機是甚麼.

 我自問才疏學淺,好多野都唔識.以為核子醫藥市場應用唔慌會大.原來同腫瘤藥,治癌藥息息相關.更同冷凍供應鏈有密不可分關係,秘魯甘大個國家,連一個幅照站都冇,要找識起的1736幫手興建,幅照站可殺菌,令出口的食品更安全,可擺放更耐,好多國家都會要求進口的食品經過幅照處理才可在超市上架.呢種技術由國企掌控,應該又是壟斷性生意,冇對手,長賺長有的企業.上星期四升左1大棍,星期五回番一格,今天又在冇物成交下再升過創新高,升得極為克制.

 吧2間野淨係做抽水蓄能設備d單要做多3年先夠國内需求,若國家要發揮更大影響力,幫d友好國家搞新能源發電,呢2間野會好唔得閑.最緊要全世界都話要搞核聚變,核電廠.呢2間野又係部份設備主要供應商.之前多次問左無所不知的人工智能,最鐘意問元寶,同一條問題相隔一星期再問會有更詳盡的答案,因佢天天不斷更新收集最新資訊同數據,再以冇人性冇立場的邏輯思維給出答案,若佢俾出的答案是你心中希望見到的,會怕自己問得有傾向性,引導佢俾你心中所要的,大可掉轉頭先設定問題講衰間公司,講d唔大可能發生的事,若佢用數據駁斥你的論點之餘,又用大量資訊同數據講呢間公司如何好,甘呢間公司真係唔會太差.我問左幾次1133同1072的狀況,一次比一次好,核設備定單越來越多,連我唔想知但其實好有用的一大堆其他資訊短時間內彈哂出來.

 上星期五大把錢的印尼考慮買入10架歼10C戰機而不買西方戰機,窮過鬼的巴基斯坦就落實買入40架更先進的歼35隱型戰機,搞到生産商中航沈飛又漲停,升完又升,中國出口軍工市場一旦被打開,海陸空,火箭,導彈等定單一定大增.港股中2357唯一一隻做軍備的公司,317係造船的,但唔一定係造戰艦,都會造商用船隻.中航科工擺明係做軍備的,持有幾間在A股上市的軍用直升機公司.股便在4蚊樓下行走好耐任人買,今日升上4.1元,若企得住,慢慢向上爬,上番年内高位5蚊都唔係難事.

 首5個月,中美貿易額1.72萬億,下降8.7%,美國只是中國的第三大貿易伙伴,已跌破10%,只佔貿易金額的9.6%,就算冇哂美國市場都冇有怕.其中出口美國貨值1.27萬億,下跌8.1%,進口美國貨4475億,下跌6.3%.又是嚴重順差,擺明搵美國着數又如何？唔再買美國任何石油,天然氣,大豆,蕊片,呢批貨完全可以用更平價錢向他國買入或靠自给自足解决,而美國幾乎冇野可賣俾中國,相反美國冇左平靚正的中國貨品,就找不到替代品,鬥大邊個會先退缩,誰怕誰,相信答案已一早出左.中國已連續60天停止入口美國油氣,大豆.一樣運作如算,冇絲毫影響,中國還有2大皇牌,稀土同西藥原材料,如狠心唔賣俾佢,物野先進戰機都造唔到,唔夠原料藥,藥都會唔夠用.

一向強勢的939,941,388,5持續慢慢升,已可令恒指不會大幅下跌,加上AㄒMJX,平保等冇抱後腿之餘,還有全部上升,甘就輕輕鬆鬆升3,4百幾,圖表派之前說24000好難破,唔好買貨,等跌到唔知物物線在物物線之上,出現物物叉叉至好買.如今24000已破,好想知班財演點兜,希望係聽到唔好置住,待升到唔知幾多點確認升勢至好買,甚麼寧可買貴,不可買錯之類廢話.最怕佢地話已升破物線,確認升勢,可買入,甘就多數個市已短暫見頂會大幅回落.明明一隻股票跌到1蚊好平時叫人看定d,唔好買些,升到3蚊又話未確認升勢,買入好危險,到升到5蚊先至話圖表好靚,物野均線排列,多頭向上,已確認升勢可以買.傻的嗎？完美演譯高買低沽的韭菜級炒股標準.莫講在低位収集已久的大户,就算在1至3蚊買入的小散,唔割你韭菜都對唔住自已.

 前任汪老總做左6年,由57歲做到63歲退休.換上同是57歲的新話事人,可能做足6年又榮休.上任汪總算是超額達標,已令883變得越來越強大,退休前也會傾向保守,不會做太多進取的舉動,最起碼任内已清除左幾個貪腐的高層,相信舊有貪腐勢力已被徹底摧毀,把1間近乎印刷機的公司留俾下手.但上星五收市競價市段,不知是哪路資金把升得好地地,用少少錢把883砸到倒跌1格收市.收市後新任命出來,新官上任,點都要發火,拉升股價,夾死造淡者.

先是侵侵同馬一龍在網上互片,馬斯克甚至玩大出帖暗示侵侵搞細路,之後又删除左 ,侵侵事後問幕僚佢是否隊左草,又話侵侵最多得3年幾玩,佢起碼重有40年玩,但若人都唔响世上就立刻冇得玩,因此馬一龍已加強左保安以保人生安全.跟住又話要成立美國黨,馬上有6百萬人話會入黨.侵侵此刻口頭講唔會同馬斯克和解,並警告變節幫死敵民主黨贏取明年中期選舉,要佢付出沉重代價會死得好慘.與此同時,民主黨老巢加州,全球GPD排第四位,僅次於成個美國,中國,德國,超越日本的最富有州份都俾侵侵搞,在洛杉磯因拘捕非法入境者發生大規模警民衝突,侵侵加調2000國民警衛軍平亂,重批評加州州長是垃圾廢柴,無能力做呢個位.國防部長話若局勢惡化,已準備左現役陸戰隊隨時入城平亂.加州州長話政府想奪權.今次若打唔沉民主黨,三年幾後俾民主黨上番台,侵侵走佬都唔掂,不過唔怕,普京同習主席都係佢口中的好朋友,一向都對佢哋好好,應該會幫番佢.

6月6日京東劉強東帶同京東健康負責人和京東一眾高層前往深圳華潤集團總部會見華潤集團黨委書記兼董事長,而華潤各子公司負責人也悉數出席,在雙方話事人見證下,簽署戰略合作協議,利用各自的優勢合作做到互利共贏.在内地市場,雙方在大健康,大消費層面已有合作.今次合作目標是圍繞香港及海外業務.華潤早前執哂幾乎所有零售鋪,如華潤堂,華潤萬家,只剩極少量的便利店,全世界都以為華潤撤離香港市塲,現在看來是戰略轉移,一早知在超高租金下做零售鋪是死路一條.今年年初京東就突然高調殺入香港市塲,勝在錢多,要在香港做電商一哥,王维基檔HKma11都唔知會唔會被巻死.京東香港負責人近期重話有無限子彈開拓香港市場,再加上香港不是内地,根本冇強大的競爭對手.早前美團插足香港冇耐,已做左外賣大佬,兼令一間主要對手消失在香港,剩下的一間也在苦苦掙扎.加上美團的無人機送餐已反覆測試成功,政府也發左牌俾佢地設立起飛地方,五分鐘就可以從科學園橫跨海面飛去馬鞍山,只要同各大屋苑傾掂數,在屋苑範圍設立收餐區,無論市區或新界的大型屋苑一樣做到.至於京東在內地做左甘耐電商都生存到,在香港做簡直是小菜一碟.華潤有大量商品賣,甚麼啤酒,潔净水,飲料,藥品,保健品,阿胶等在國内已是十分受歡迎,借助京東打開香港市場,土生土長老一辈香港人可能會抗拒,但新一代同為數越來越多的新香港人,通才,專才,内地外勞就會對這類内地品牌非常熟悉和受落.目標消費者也可能是這一大群人.内地企業無論是國企或民企,已在香港落地生根,涉足各行各業.毛主席金句天要下雨,娘要嫁人,要來的始終會來,只有接受新事物,不斷學習,不斷適應,才能活得輕鬆自左,活得精采,過去成功的個套已經過時就要徹底放棄.講番正题,不知華潤啤酒,華潤飲料,華潤醫藥,華潤醫療等同零售,健康有關的股份會受惠而股價上升.

中國50後,60後是存款主力軍,6年間就把居民存款翻左1倍去到161萬億,而這群人也超過全國人口的22%,他們最唔想見到的是存款利息不斷下跌,但偏偏現實就不如他們所願,存款息率頻密地下跌,活期已近乎冇息,1年定存跌穿1厘,再存錢入銀行已不是辦法,一定要把存款找出路.把部份資金投入股市就是當局想見到的,所以一定會用各種手段令已上市的公司增加分紅派息,才能吸引龐大的新資金進入股市,民營企業當局管不了,但央國企一定會跟隨,民企肯派高息的股價一般都會好,有在AH同時上市的股份,不管是民企央國企都會受惠持續増加派息,特别是中特估,只要每年都持續加派股息,股價縱使已升左好多都會繼續升,未買的會等待大跌時才買,稍為跌多些少,就會大把人爭住上車.一早買左的人絕大部份都會不理股價升跌繼續持有.真正的股神們都是那些國内大媽或香港牛頭角顺嫂,他們過去只是做對一件事,就是以年計不斷累積收集内銀,中移動,資源等中特估,每年收股息都收到唔知點使,直情就立於不敗之地,有本錢有底氣做職業兒女的僱主,啃老族的至愛.中特估都行左3年大牛市,可能重會行多好多年.

 呢3隻野近2天先至有稍大的跌幅,是否方便俾北水傻散覺得平大手買入,你精北水都唔係真傻,大炒特炒就一定會,但唔會瘋狂搶高股價至買入,可能會反高潮,讓股價下跌時先收集,跟住玩音樂椅門快走遊戲.

號稱國際金融中心的香港,好多野用左幾十年都唔變,如股票實名制,全世界都用緊,内地已用左N年,1間香港上市公司有多少小股東,理倫上是查唔到的,若真係要查,要大費周章去查各代理人持股名册才能做到,冇人會做甘無聊的事,因此除浄後又要用幾天時間核實,又要私人持有者在指定時間內去打厘印才派到息,941已算快,20天後就收到錢,有些除淨後個幾2個月都未收到.如用股票實名制就唔駛搞甘多野,又可知有幾多人買左呢間公司股份.内地公司年報都有清楚列明有多少個人或機構持有公司股份,對比上一季度是増加或減少,十大股東又是何人之類.另外買賣物業要查契之類更是可笑,過往為左保障既得利益者過往的所謂精英階層如律師,為左收服務費,若遇上經常易手的單位,要查過往唔知幾多年的樓契文件,樓契文件幾乎高過半個人,要搵地方安置都麻煩,但仍然不能完全保障到買樓者,業權唔清唔楚發生爭抑時有所聞,完全係浪費地球資源,話要採用統一業權法登記,一勞永逸,但在回歸前講到而家都係得過講字,呢些不合時宜的落後程序早晚都要改,人工智能不斷發展,事務律師,秘書,即時傳譯,甚至會計師都是夕陽職業.

 今天北水成交額1006.57億元,佔港股成交42.2%,比昨天減少,恒指也因此在連升3天後首次下跌.但錄得77.78億元淨流入,淨流入買得最多股份分别係1211比亞迪25.95億,3690美團9.95億,939建行6.95億,1093石藥5.29億元.淨流出沽得最狠得1隻700騰迅,浄流出13.9億元.由於有一天假期關係,北水今周成交額只有4095.53億元,佔港股全周成交额40.2%,成交額較上周大跌超過4成.而全周淨流入只有149.28億元.

 持有石藥的感覺十分良好,見證了由低谷上番山頂,如廣東話講的打逆境波,猶如先輸一粒,完場反勝7個1皮個種喜悦.3320形勢更好,開波頭15分鐘重係0比0,等緊發力,勒住贏4比0收場已足夠.

 除左941,883呢d一早鎖定以公佈業績當時匯率,以港元計價派息的超級巨企,如中移動派2.49元,中海油派6毫6股息之類.另外一些則會在除淨前後才公佈實際派幾多,如在除浄後股價好似跌左好多的107四川成渝,每股派0.29元人仔,近日才確認每股派0.3153港紙,今早收4.7元,加埋收息,計死數都在5蚊樓上,根本就冇物跌過,4個7先高追,見到接近5蚊息都唔要就沽出的人完全冇着數.中移動今日除浄,20天後就收到股息,若唔係已鎖定每股派2.49港元,而是計最近的匯率,隨時多2.49港元好多.26號又有大把糧草送到,又可放開手腳在股市短炒找尋獵物.

 原以為昨天會升10%,但升唔夠4%,今日再升近4%,分開來升同一日升哂冇分别,重更健康,更不會引人注意.成交量始終是小,但已較平時多好多,也反映出股份已歸哂邊.埋伏左年幾,俾佢悶足年幾,不計收息,股價都接近倍升,長安汽車變左獨立央企,呢隻市值超細的1292,可以有好大的想象空間同盈利空間,都俾佢悶左年幾,唔介意再悶多幾年,只要年年派高息俾我,股價再倍升都會揸落去.

 後知後覺現在才選擇買941來收息的人,昨天嫌貴,以為今天除淨後股價會大跌,今天才買會有着數,但世事不會你想點就會點,今天才買入者,金額上是比昨天買少左,可以自我安慰話買左平貨,查實今天才買入是買貴左1%,因收唔到未期息每股2.49元,其實股市是專收自以為聰明過人但實際上是蠢蛋而不自知的人.憑運氣起初贏到錢的韭菜,往往會以為自已高大左,靚仔左,在股市中大顯身上,以為一本通書可看到老,憑着一文不值所謂經驗,成功往績就可無往不利,最終都係搞到雞毛鴨血.就似含著金鎖匙出世的富二代,若胸懷大志要超越父祖輩,大都都會搞到一地鶏毛,若只顧吃喝玩樂富二代,父祖輩留下的產業反而可承傳下去.

 呢2隻野升又唔會升得多,但勝在又肯跌,跌完又會升番,低買高沽好過出花紅,如蒙牛千辛萬苦先升到20蚊樓上,维持不久就可跌番17蚊任人買,跟手好快就番上18個幾,想賺多d等到上番20蚊先沽又得,唔想等短時間18個幾沽左佢賺5至6%又得,最緊要肯上上落落,區間遊走,做番幾個細T,20至30%回報輕易而舉,做大T就要俾時間等,華潤飲料情況更好,升到14個,15個幾俾人走,跟住可跌落番12個幾任人買,幾天時間就上番13個幾,即走又可執5%以上,想贏多d就等佢升多d.唔係隻隻股都可以甘玩,央國企最穩陣同容易成事,央國企有市值管理,股價跌得多會抖番佢上来,只要你唔係高追,每逢回調多些少就買,唔駛好耐執幾個至10個巴仙是大概率的事.今早我就走左蒙牛,走左就望佢跌俾我買番,華潤飲料就留耐d,看吓會唔會短期升上14蚊再作定奪.

 馬一龍一離開政府,就大數特朗普不是,話政策唔得,會害死美國,話冇左我,侵侵根本贏唔到選舉,做唔到總統.侵侵又強力反擊,話對佢好失望,但冇左佢,在賓州我一樣會贏得選票,更撤銷左之前應承左馬斯克的某些政策,都是些會令馬斯克賺少好多錢,甚至令身家縮水的電動車政策,更揚言馬上收回對特斯拉的優惠補貼,可令美國庫房立刻有幾十億美元進賬,馬一龍也馬上把太空飛船退役,美國現時的太空探索活動的發展同經費,都係靠馬斯克,在如此反哂面底下,美股只是輕微下跌,但特斯拉股價收市大跌近15%,買左tsla股票的散戶就最慘,有做槓杆的可能已被斬倉,冇做槓杆的可能嚇到止蝕清倉,但若呢2條友又係在做戲,在tsla大跌前已做淡數緊錢,tsla大跌後再造好,只要稍後呢2條友突然檻頭攪頸出現在鏡頭前,話我哋冇事發生,都係為令美國更偉大而奮鬥,到時tsla就股價大升,散戶就左一巴右一巴陪葬.他們2條友仔,似乎是為左在股市中獲巨利而來多過為令美國再度偉大而來.

 原來今天883在香格里拉酒店開了周年股東大會,有不少本港散戶一早報定名參加,有小股東全程錄音發問大會並轉化成文字擺上網供人查閱,每位小股東只能發問2條問題,為時半小時.開頭有小股東無聊到問下次可否不派百X超市現金券改派其他超市禮券,主事人話不是問題.接着都是追問會否増加派息比率,有人問派得45%,單去年就有700幾億留低,有否考慮十年後,揸住甘多錢怎樣處理,為何唔派多些给小股東.負責人答25至27年已講明不會少於45%,而45%派息比率在市塲上已極具競爭性,45%是下限,若盈利理想是可調節的,至於為何要留甘多現金在手,佢話中海油是國際性大企業,一直積極尋找和等待機會造大造強,若機會到來但冇錢在手,就不是機會.又有人問若油價大跌,會否減少開採支出,省回的錢轉為増加派息回會饋小股東,答案是開採支出是一早計劃好的,不會隨意増加或減少,而中海油的強項是採油成本低,長期控制得好,而產量又持續增加,油價升跌都不會造成太大影響.中海油的長期小股東應該是被寵大的,收左甘多年息,物本都收夠籌,若不満意一早已沽貨離場,最好派到8成,9成,我都想,若派到8成幾9成或更多,股價重唔升到飛天？只要股價穩定,長期能派高息,收息都已經收到唔駛本,為何重要望佢加派多d股息,加多d股息只會令股價升太多,對未買夠貨同想買平貨的人不是好事,一早買夠貨,儲夠足夠股數的人就當然希望越派越多,但基於共同富裕的良好願景,都要俾機會後來者安全參与.

 南向資金全日成交額1079.94億元,佔恒指全日成交額48.64%,但淨流入只得7.41億元.淨買入最多是1211比亞迪13.84億,不停買的外賣仔10.75億,創歷史高位後回落的6181老鋪黃金2.37億,9992泡泡瑪特1.35億.大舉抛售浄流出都是權重科技股,1810小米16.12億,700騰迅14.54億,9988亞里巴巴2.28億,981中蕊1.36億.

 新華保險年頭舉牌増持A股杭州銀行,杭州銀行之後升左30%,跟手又増持左H股392北京控股,392升幅雖沒成都銀行般誇張,但也不差.最好笑高盛一星期前出硏究報告調研一衆内險股,例牌話只建議買入平保同中人壽,目標價定得好低,至少呢2隻野重未達標,是可接近範圍.但對新華保險,目標價由19元升至20.5蚊,建議沽出.真係想問句,食左藥未？若有客戶信跟佢地建議操作,就更加係食錯藥.

綠電長期應該有運行,唔理風電,水電,光伏發電甚至垃圾發電都會受惠.怪不得隻龜速上升股836華潤電力今早都有1%以上升幅,好快又會除淨,正考慮為左貪個0.619元股息好唔好加倉短炒,本身已成手貨,夠哂貨有突,見唔駛扣10%股息稅,有3厘幾息落袋,就算除淨後股價唔郁或唔升,都可以坐貨再等收息做長線,但唔想揸太多,嫌佢升得慢.

 3厘唔到的股息,好過冇,只要股價慢慢上升,或者可能揸耐些少.看見隻金力永磁今天又狂升,個心真係好痛,明明已擁有,伴在身旁的東西不懂珍惜,賣飛左.近日在狂loop網絡神曲有一種遺憾叫做我們,一想到往後餘生陪妳的是别人,妳怎知我的心臟有多疼.真係講中哂此刻我的心情.女死女還在,揾過第二隻補數,繼續做股市渣男.

 過去個幾2個禮拜,央視新聞總會用不少篇幅介紹中國農業如何走在時代尖端,收成大増全因高新科技介入,如用無人機播種,洒肥料,所有拖拉機,收割機都接入5G,數據入雲端,在全國各地有農機監控平台,確保運作,收割有序.邊度農機壞左,馬上有專人前往解决之類.完全唔見有牛隻的身影.農機升級已是必然趨勢.鏡頭前出現的拖拉機,各種農機不是濰柴的沃爾,就是一抱的東方紅.而38第一拖拉機今年首季盈利下跌10%搞到股價跌落5個幾,個幾月時間在低位任人買,今天不知不覺又升番上7蚊,都升左好多,重係升左冇人知個隻.農機應該是一朝陽行業,單是舊換新升級已有排做,潍柴更準備將拖拉機業務分拆出來在A股上市.38第一季盈利下跌並唔代表全年盈利會下跌,之前股價下跌其實是買入的良好機遇.

 國資委已批準中國兵器裝備集團的汽車業務長安汽車拆出來獨立運營,實控大股東仍是國資委.我埋伏左年幾的長安民生物流1292今天股價應該有反應,唔太貪心,升10%已足夠,等除埋浄收埋2毫子股息先好亂升,呢隻野超級奇芭,成交極少,平時有傻散低十幾格都會沽貨走人,重係沽1千股個隻,個日股價就會大跌,相反若有老散掛高幾格,1萬幾千股求沽就會被人掃清,個日股價就會升幾個巴仙,股價長期在一年高位附近上落,貨又收唔得多.

今天北水買入賣出共1063.3億元,佔港股全日成交49.99%,淨流入35.16億元.之前有混左幾十年的老餅財演,經常說北水可以不理,買得幾多啊,港股成交要多始終都要靠外資同本地資金,現在已經唔敢再提,之前可能傻吓傻吓以為每天淨流入或浄流出只有幾十億,多極唔夠2百億,所以才有唔駛理北水的偉論.今天北水買得最多都係外賣仔,浄流入14.14億元,已是連續淨買入第十三天,股價也連升多天,其次淨買入6.2億元阿里巴巴,3.67億元信達生物,3.31億元石藥,1801同1093已連續大升好多日,今日信達生物更是雙位數升幅,而家先追入有極大風險,北水買夠貨正等緊接盤俠,隨時要幾多佢哋都俾哂你.沽得最狠都是個2隻,淨沽出14.36億元騰迅,13.15億元小米.

 發改委同國家能源局早幾日講到明將會把大量用電的企業,直接接入綠電,用電只能用新能源發電,解决左綠電不能被充份消納的担憂.916同836長遠來講應該有排升,盈利平穩增長,派息也會逐年遞增.此2股近來表現幾好,股價慢慢上升,916都叫做有吓波幅,間中跌多少少,跟住又升番.836就不動如山,每天升1至2格,慢慢爬.呢2隻野冇物街貨,俾北水買左好多又唔放,隻916H股揸左成52%,836冇A股,H股水揸左23%,大股東揸左69%,根本是隻冇物街貨的藍籌股,平日成不會太多,一天有幾億元成交已叫好多.

 首先呢隻野重沒大幅爆升1倍或以上,還有上升空間同較值博.公司名有個幅字都應估到佢做甚麼業務.中國同幅1763是央企中國核子集團旗下子公司.專做核子醫藥,如精確檢查身體時要先注入同位素,同位素就是他們的主要產品,另外又經營醫療設備,如X光機等,年年有錢賺並持續上升,更重要是要做到不假外求,塡補在核子醫藥的空白和差距,其實都可視為軍工醫藥股.年頭至今升幅至今不足3成,近月股價明顯轉強,有類似業務的民企512遠大醫療早已翻倍,升到唔敢買,想趁墟炒番轉新醫藥股的話,1763會較安全.

 寵物,稀土,軍工類股份在A股有好多選擇,升起上來好得人驚,升完會跌,但總體是大漲小回,朝着升的方向走.港股相關的股份不多,但隻隻都是大漲小回,繼續升個不停,好耐之前已提及的稀土股6680金力永磁,個人都有參與短炒走幾轉,但是拿不住總是出出入入,收益遠不及長期持有.不久前提及的寵物股6601朝雲集團更是回都唔回,大升過後重一路升,完全唔俾機會以較低價追入,今天又創左好多年新高.至於2隻軍工股317中船防務同2357中航科工就冇甘癲,317其實都升左唔少,2357就慢慢升.但好股同當炒股實在太多,冇甘多子彈同時間去玩,求其就手隨心用少許資金買幾隻炒吓短線過吓手引増吓值都好足夠,就像一張可不停増值的八達通,繼續嘟唔同的股份.

昨天臨收市見107被人大手拉升至5.06元最高位,收市也是5.06元,就知昨天冇在除淨前買入短炒是錯誤决定,昨天5蚊至5.02元任人買,臨尾抽高至5.06收市,除淨價是4.74元,今早股價已填權填左1半,升到4.9元,若昨天5蚊買入,都有近4%利潤,貪心d的,揸耐少少,上番5蚊樓上應不難,跟住沽出短時間就可白賺6厘幾息.雖然昨天沒做去年做的事,但都不是好介意,因有平貨在倉,股價股數冇變下,但收左18厘息,股價會否再大升已不重要,若今年此股盈利再上升,派息再派多10%,甘25年就會收20幾厘息,到時股價再大升,息率得番4厘幾5厘都唔關我事,我繼續快活去生活,唔駛拼命去生存,繼續收20幾厘息,進一步證實長揸壟斷性高息股才是王道.

 晚上宏華集團又出左份自願通告話在5月26日接獲一份價值2.4億人民幣的造船定單,為國内一艘深海探測船提供部份工程,而去年11月中國自主研發的大洋探測船夢想號正式入列,宏華深度參与建造,此船排水量4萬多噸,可鑽探到海底1100米的物件,載員180人,可自給自足99天去到世界任何地方,為中國成為海洋大國立下里程碑.如今又造第2艘,夢想號應是中船防務建造的,而中船防務去年及今年首季的盈利都急增10倍,可能是對上一年基數低,就算是為國家任務造船,也有可觀盈利,相信宏華今次的定單都應該有可觀盈利,唔會冇錢賺.26號簽約,27號股價在早上在大成交下升近25%,之後才大幅回調,今日股價曾一度升至0.161,收市報0.157,較26號收市價高10%以上.年初至今此股已升左32%,對此股越來越有信心會成10倍股,只要不急升, 慢慢收哂d獲利貸,周不時又出吓通告接左甚麼新定單,鑽探呢家野近乎獨家,冇競爭對手,毫幾字股價,市值唔夠13億,去年初見盈利得幾百萬,只要1年盈利幾個億,股價升幾倍是閑事.我就繼續發春秋大夢等佢暴升.若明早又大幅急升,引哂d獲利貨出來搞到升幅大為收窄更佳,每個星期升10%已足夠,慢慢升冇人理會最好.

 北水全日成交945.37億元,佔港股全日成交額46.44%,淨流入39億元.淨流入左10.89億元美團,9.76億元建行,9.3億元石藥,5.11億元比亞迪,6億元康方生物.浄流出沽左11.31億元小米,6.25億元騰迅,2億元泡泡瑪特.建行已買足好多日,美團就越跌越買,低位買夠貨或許會借消息升一波,小米同騰迅就持續獲利沽貨,畢竟已升得太多,要找人接盤出貨,跌夠就再買番,玩上落.

 ATM只是輕微微升,但一眾中特估權重股隻隻有唔錯升幅,特别是幾隻内銀,搞到個市升左3百幾點,再一次證明現時港股就算大升,ATM唔一定會升,唔跌已經當幫忙,只要恒指公司做好些指數權重比例分配,不是過度集中在幾隻股份身上,港股會是易升難大跌格局.近來恒生銀行大幅裁員,其中一個重災區是恒指服務公司,希望被炒的是那些拿超高薪又專做蠢事又交唔到貨的管理層,而非做牛做馬的基層員工.

 星期4買941還可以收到2.49元股息,星期五股價就會扣番2.49元,若星期四收市價是90元,星期五941除淨價就是87.51元.過去4年,每次除淨後都會好快填權完成再升過,只是時間長短的分別,有心長期收息就不要等甚麼除淨後股價平左或者下跌買,股價唔跌的話,自然得個吉,股息又冇得收,又要高價買入,就算股價在除淨後下跌才買入者好似好着數,但若股價好快就填權,同除淨前買的人對比,根本無着數,因已收少人家1次股息,已失去買來長期收息的初心.

 四川成渝107明天除淨,今天買入重可以收到0.29元人仔股息,明天買就冇,股價還會扣番0.29元人仔.去年呢個時候,股價得3個幾,為左0.26元人仔息,除淨前義冇反顧衝入去増持,期望短期內就填權成功,9厘息就白賺返來,去年就十分成功,好似十天八天就填完權,股價升番上買入價有突,馬上沽出,2星期唔夠就白賺左近9厘息.但今年107已被人炒上5蚊樓上,股息率6厘多d,似乎唔多值博,都係唔好搞甘多野,橫掂有一堆個6買番來的貨,講緊今年收緊18厘股息,已是躺住贏,無謂太貪心,再増持作短炒賺幾厘回報.

昨天早上,在冇北水情況下,内銀股全部跌2至3%,收市就跌幅大幅收窄.今早返來,建行,工行成交急増,股價大升2至3%,昨天早上敢増持今早沽出都有5至6%收益,其實只要坐得住,昨天冇俾震哂d獲利貨出來的人都是贏家,揸住939的朋友,今早又破3年新高,7.11元,坐得住已是贏,若在昨天手多6個8沽左佢,真係無謂.

 近日已呈強勢的165,今日再爆升15%以上,主要是早前投資入股左隻穩定幣公司,而此公司在前往美國IP0的途中,央企入股穩定幣公司有點意思,肯定得到國資委首上才做做,之前光大集團貪腐嚴重,多任領導同高管都要踎監,現在已是全新領導同新作風,谷底反彈已成.連帶同系的光大環境今天除淨後,股價還要上升,升多過已扣股息,即日就塡權成功.另外隻光大銀行,股價一早已跑贏同行好多,今早再升3%,但未期息連除淨日都沒公佈,做野有點慢.

 農夫山泉9633總市值4400億,H股市值近2000億,鐘先生也因此而成為中國首富.反觀華潤飲料成間公司市值得310億,又手持現金100億,上市又圈左一堆錢返來,雖然農夫山泉盈利是2460的4倍,市盈率又高過華潤飲料好多,華潤飲料市值升到1千億才算合理,1千億當太大貪,升到6百億總可以吧.13蚊樓下的華潤飲料可買來長揸等運到,唔想等太耐,低買高沽做下T也可以.我昨天在12個幾就買左些少儲緊貨,最好跌回上市後低位10個幾俾我買.