彭博又發放極大利好但未經證實的消息

 彭博在港股收市後,發佈一訊息說内地有意寬減内地個人投資者透過港股通買入H股收取的利息稅,避免雙重收費,例如收取941股息100蚊,首先如本地散戶收取10%利息稅,得番90蚊,之後内地重要收多20%利息稅,即90X0.8=72蚊,實際就係要俾28%利息稅,呢28%稅全部都係國家收,而家講緊就係是否減少20%或直情唔收20%,訊息話已正式向國家備案申請,能否成事是後話,中證監同香港監管機構拒絕評論有關傳聞.若彭博今次唔係放流料而中央又衡量過收入同整盤大局而接納有關建議,一大堆高息中特估隨時會短期内升番20個巴仙,之前大大聲話有生之年都見唔到恒指4萬點的某位所謂著名經金經理點算,上天會唔會體恤這人,唔執行佢的意願.呢條友好最近轉哂呔,話内地資金特別係内險資金會流入香港買高息股,港股可能有轉機,重申現在揸得安心的港股都係已升左2年的5,941,883,而家重加多幾隻如華潤電力,神華同紫金等資源股,點解的股份同我個倉甘相似,不過我肯定買平同買早過佢好多,佢高位都敢追貨,我都希望佢反敗為勝.

留言

發佈留言

此網誌的熱門文章

内地電力股全線上升

 A股有多間電力公司已率先發佈首季發電量,全部都有雙位數増長,與中國首季工業生產回暖相當吻合,生產増加用電量也隨之增加,加上人工智能廣泛研發,數字經濟加速進行,大量基礎設施如數據中心,算力中心都是極耗電的,還要不斷興建的充電椿,一旦缺電甚麼都做唔成.今日港股的内地電力股全線上升,其中以火電股902,1071升幅最誇張,可能與近日内地煤炭價格持續下跌有關,憧憬這批火電股今年盈利會進一步増加.升得最有秩序和令人安心是華潤電力836,自2月中開始,北水平均每天淨買入2至3百萬股的速度買左超過1億股,持股量升左2%,去到17.5%,期間升幅20%,慢牛式上升,相信是有大機構慢慢收集,上星期五冇北水下,股價一度跌穿18蚊,今天有番北水,又升番哂上去,若北水持續買入,股價又每天慢慢升,好快就20蚊樓上見,到時又不知不覺,無聲無息甘升左3至4成,呢種升法係我最樂見的,呢幾日潤電會出3月發電數字,若増幅理想,又會升多些少,畢竟市值才900億,去年賺110億,現價8倍市盈率,7厘幾息,今年賺多2至30億非難事,到時20幾蚊股價的話,市盈率都重係8至9倍.
閱讀更多

恒指維持82隻,但權重有變

 剔走碧桂園服務,加入比亞迪電子.權重作出頗大改變,金融類權重大増至33.12%,加隻幾隻内銀股權重,建行加到5%以上,加埋工行中行權重接近11%.科技類則減至29.3%,ATM3隻加埋唔夠22%.資源類佔9.32%,三桶油加神華加紫金佔左絕對份額,電訊同埋電力股歸埋一類,佔7.5%,中移動十中電十聯通十華潤電力佔左大份額.地產類大減至4.8%,全部中港地產股加埋都唔夠一隻建行多.另外醫藥類也不成氣候,只佔2.27%,最後是消費類,佔13.2%,比亞迪也歸類消費類,其餘一大堆都是中資内需消費股,啤酒,牛奶,礦泉水,運動鞋,旅遊股物都有.新權重實施後,恒生指數就好難再大跌,就算ATM同時大跌,都21%,整個科技版塊不足3成權重,況且重有小米,百度,網易等頂住,冇可能全部一齊跌.中特估三個主要牌塊,金融,資源同電訊電力加埋超過5成權重,若再加埋以中資股為主的内需版塊,已達63%,地產同醫療加埋7%,可以不理,最近内銀内險大升,金融,資源,電訊的話語權已掌握在中方手中,大量北水不論散戶或國家隊已重倉左呢類股份並會長期持有,港股已有左定海神針,不易被外資惡意沽空,若外資掉轉槍頭,由於冇中特估在手同沒定價權,改為買入權重已大減的新經濟股,配合中特估升勢,恒指後市好大可能會升到懷疑人生.恒指目前82隻成份股,本地股份只佔29%,中資股佔71%,日後擴容至100隻,本地股佔比會越來越少.
閱讀更多

機會永遠留給有準備的人

 呢次的升市,有參与一早買定貨的散戶相信不多.更多的是冇貨接近空倉,蟹貨就一大堆的散戶,較為進取有在低位買港股的,升少少就走都走唔切,還要自鳴得意周圍講落左袋的錢先叫嬴錢,但又看不慣别人贏大錢,又不知自已認知不足,就搬出一大堆大家都只有兩隻眼,一個鼻,一個腦同四肢,甚至我頭髮又多過你,又靚仔過你,憑甚麼你贏錢多過我,就唔放過自已,之後又會高位追番貨,後果往往都是輸返之前所贏的,其實別人贏好多關你物事,與人攀比何其愚蠢.港股多次出現極低位,恒生指數連續兩年都出現過低過萬五點,之後都出現強力反彈,不能強求能在最低位買貨,但在萬五,萬六點時有足夠時間俾大家研究買甚麼貨,就算唔想用腦做懶人,大可以買2800等收成,只不過太多人自以為醒目過人,跌到萬四都唔會買貨,等萬二至買,到萬二又會話到八千,更有甚者,遠離港股,高位走去接美股,日股ETF,輸到頭破血流,左一巴右一巴,到港股似乎轉勢,又要多觀察一會,到所謂專家都講確認升勢,有買貴冇買錯才大手進場,到時市況一旦逆轉,又輸到訓街.反而心口得個勇字,只跟大勢第一時間衝入場專買跌得最殘最多,前景唔好的垃圾股份的人,短時間就執幾十個巴仙,賺夠就走,就冇錯過呢次盛宴,剩下個d左計右計千揀萬揀的智者就走去接火棒,成為輸家,有時順勢而為的凡人往往勝過智力過人又靚仔的聰明人百倍.
閱讀更多